DAWT SAWI 40 HI A TAWK VIAU TA E

Mizoram buai inṭan, March 1, 1966 hma deuh lawk, hun rei vak loah khan MNF President Pu Laldenga khan Aizawl Theater Hall-ah thu a sawi a. Hetiangin: 

‘ …Tichuan, India sipai chu an lokal zel ang a, Durtlang Leitan ah khian Lungsahbuak kan lo kam ang a, kan khung tam tawk ta maw tih hunah kan han sah mai ang a, India Sipaite chu a deng hlum puk puk mai dawn a ni. Vaite chu khamah rawn lawn thei dawn hek lo...’ tiin. 

A ngaithlatute chuan kan lawm khawp a, au nen, chang tum nen, a ṭhenin skirting rangva kha an lo beng ri vak vak a, thawm chu ṭha tak a ni. He thuziaktu ngei pawh hi thil ni thei a ni nge ni lo pawh ngaihtuah lovin kut benga au vak vak zingah khan zuk tel ve tho i-a! Mihring hi thluak suk tawh kan nih hnu chuan Pu Lalbuanga ṭawngkam takin, kan chhaw chhawih tawh mai ṭhin zawng a nih hi maw! 

A sawitu kha chuan khatiang thil kha thleng thei lo tawp tur a nihzia chu a hre chiang ber ngei ang, sipaia lo ṭang tawh te pawh a ni ve a. He thila lo lang chiang tak chu, kan hruaitute hian zuitu an ngah theihna tur a nih dawn phawt chuan hetiang ang dawt te lek lek hi chu sawi an pawi ti miah lo tih hi a ni. 

A dik lo tih hre reng chungin mipui hmaah an sawi pawp pawp ngam mai zawng a nih hi. 

Hei hi tun hma kum 50 chuang liam taa thilthleng kha a ni a, mipui changkan hma, bum kan nawm lai hun ami kha a nia kan ti mai dawn em? A nih leh tunah hian engnge kan an tak le, tih hriat nan kan ram hotupa ber, kan Chief Minister hi lo en ta ila. 

Hetia thil ni thei lo pui pui a sawi leh ṭhin hi eng dang vang mah ni lovin hmana a zirtirtu, a ngaihsan em em hnung zuiin a hawina lam apiangah a duh duh a sawi ta ṭhin tihna a va ang ve, thuhnu pawh dawn  lovin. 

Khatiang hun lai tun aia bum kan la nawm daih laia Pu Laldenga ten an duh duh min sawi khum ṭhin lai kha chu tunah hi chuan kan ni ta hauh lo mai le. Hei hi kan Chief Minisrter hian hre tho chungin mipui pawisa lo hian a pu tih dan ngaisang chung zelin a la au chhunzawm ta zel a nih chuan a va hun ta lo ve. 

Mithiam leh fing pui pui, CM seat a an ṭhut loh vanga thil tithei lo ni mai hi kan nei tam tawh teh a nia. Chuvangin, kan CM hi kal fimkhur deuh tawh se, a sawi awm lo pui pui a sawi belh leh zel zawngin ziaktu pakhatin a dawt sawi 40 a tih hi belh chhah a nih leh chuan a tam lutuk dawn. 

State dang people ten min nuihzat lutuk palh ang e. Sawi belh lul tawh teh suh se. A laka tlaktlum leh a zar zo tum lutuk ho pawh hi lo insum deuhin thurawn (advice) te pawh lo pe ngam ta se a va ṭha dawn em. 

Kan pu sawi apiang hi Mizoram sawi a ni zel mai si a!