SEDP versus MKHC Inthlan Thuchah
Mizoram Kohhran Hruaitute Committee (MKHC) inthlan thuchah chu kar hmasa Pathianni khan kan kohhranah chuan an chhiar chhuak a, ka rilru lo dek zartu chu, "Political party-ten a taka tih theih loh tur zuara mipui bumna ang thil intiam loh nise," tih leh a hnua, "Sum leh therhlo hmanga min lei tumtute lakah kan vote (zalenna) hralh loh nise," tih hi a ni. Hei an chhiar chiah hian SEDP a rawn lang nghal a ni.
Kum 2018 inthlan dawn khan SEDP cheng nuai 3 an zuar a, an tih theih tur thu an sawi a ni. MNF President Pu Zoramthanga phei chu a duhthawh si a, "NLUP dawng tawh pawhin nuai 3 an dawng dawn," a ti a ni. A thusawi hi a video pawh a la awm miau avang hian ka sawi lo reng reng a ti thei lo. Chhung tin nuai 3 sem an tiam a, hei hi an sem theih loh avangin kum 2023 inthlanah hi chuan sawi ri tawh lo se a ṭha ang.
SEDP tuna an sem dan hi MKHC hian a enfiah ngam nge ngam lo? tih zawhna a piang ta. MKHC thuchhuahah hian "Inthlan dawna vote leina anga ngaih theih sum leh thildang sem emaw pek emaw," tih hi an duh lo.
SEDP hi kum nga chhung khan an ngawi tluan deuh zak a, inthlan dawnah MKHC duh loh ang takin "vote leina anga ngaih theih" tih chiah chiah hian an sem a ni. MNF Unit leh Block in mi an sawm dan pawh hi Vote leina rilru a ni a, MKHC hian SEDP hi Vote leina angah a ngai nge ngai lo? tih hi an sawifiah a ṭha a ni.
SEDP hi sorkar pawisa liau liau a ni, MNF pawisa a ni lo. Mizoram ta Mizoram sorkar pawisa a ni. Nuai 3 pek min tiam nghe nghe a ni. Nuai 3 an tlin loh avangin Rs 25000 in an phel sin ta a ni. Rs 25000 hian tu chhungkua mah an ding chhuak dawn lova, mipui retheihna chu vote zawnna remchang atan an hmanga inthlan dawnah tak SEDP dawngtu tur an zawng kual a, SEDP hi sum leh therhlo hmanga vote zawnna nge mipui eizawnna tur? ni zawk ang le. Eizawnna a tling si lova an sem hun nen hian vote zawnna liau liau nia a lan avang hian MKHC hian SEDP ni lovin SEDP pawisa sem dan kalphung zawk hi a ngaimawh ngam dawn lo em ni? tih zawhna a awm a ni.
Sorkar pawisa a ni a, inthlan dawna an sem sawm dan hi chu mi a nileng lo tan chuan an sem chhan a chiang a, MNF President ngeiin SEDP sem leh SASCI sum an tlinpui tur thu a lo sawi tawh a ni.
- C Lalchhuanawma