VEC THLAN RESULT DARH CHIAM KHA

Tun hnai têah social media-ah MGNREGS hnuaia Village Employment Council (VEC) inthlan result leh political party-a an awmnate an rawn post chiam fo mai a, mak ka lo ti deuh a. Mak ka tih chhan ber chu - ka hmuh leh hriat vawi khatna a nih vang a ni; kum hmasa lamah ka la hmu ngai lo. Thil reng reng hi party politics thilah kan la lut nasa ta lutuk em ni?

NREGS khawih thin BDO thenkhatte sawi danin, VEC-ah hian VC president chu chairman a ni nghal a, VC secretary chu secretary a ni nghal. Member dang mi 5-7 vel chu NREGS hnuaia job card nei chhungkuaa mipui kal khawm, gram sabha-in an thlang thin. He inthlan hi political party thila kalpui tur a nih loh rualin, political party-te'n line-up an lo siam ru thin a ni àwm e.

VEC inthlanah kum dangah pawh party-te'n line-up an lo siam tawh thin ngei a nih hmel a, mahse, khaw pawn lam thleng thlenga puanzar leh, party chakna anga tarlan chiam a awm ngai lo a; kumin hi a vawi khat awmna a ni hial mai thei.

Hriat atana pawimawh chu - VEC member tur thlan hi political party-te inbeihna tur a ni lo a, Election Commission of India leh State Election Commission ten inthlan an buatsaih thin ang a ni lo, tih hi a ni. Thlan tlinte zingah khawi party mi emaw an lo tling tam deuh a nih pawhin, party-in hnehna a channa anga sawi chiam chiam chi a ni lo.

Mizoram pum huap pawl thenkhat inthlan hi political party ni miah si lo hian, party inbeihna ang hiala kalpui a awm nual a; hei hi thil tha a ni lo. MHIP Gen. Hqrs. inthlan phei chu kum eng emaw zat kal ta atang khan political party thenkhat chu an inrawlh nasa hle - line-up te an siam thin. Party thenkhat worker-te phei chu PRESS tih badge (identity card) siam chawpin an inrawlh duh hial zu nia! A zialo tak zet. Khatiang mi kha MHIP thatna duhtute an ni lo a, MHIP-a party thiltihtheihna tuh duhtute an ni. Chutiang lo hmang tangkai duha pawl hruaitu nih tumte pawh pawl tana thatna aiin, pawl tana mi hnawksak an ni zawk. Hetiang hi pawl dang then­khatah pawh a awm.

Hetianga inthlan kalpui hi chìn zui atan a tha lo viau àwm asin. Pawl tan a tha lo a, pawl lungrual lohna leh innghirnghona siamtu a ni a, member-te tan lah a tha hek lo.

Chutiang bawkin, VEC inthlanah hian party politics hi lak luh chiam loh hi khawtlang tan leh job card neite tan a tha zawk ang. Party politics thila a kal chuan mahni party mite duhsak bik duhna te, mahni party ni lote hrêk duhnate a awm thei. Chu tak chu khawtlang leh mipui tana tha lo chu a ni. Party politics thila kalpui loin, khawtlang leh mipui tana tha tur ngaihtuaha thlan ni se a tha ber ang.

- Kezo