Khawinge kan mamawh? SAWICHHUAK TAM THEI NGE THAWKCHHUAK TAM THEI?

Kum 30 chuang state kan nih hnua kan Politician-te in sawitheihna ber chu 'central sorkar sum sawi chhuak thei' nih hi a ni. 

Sawi chhuak thei chu...

Nula pawh hian pasal tak tak tur chuan pa te Pocket Money dil chhuak thei ai chuan mahni a sumdawnna emaw, hna lian deuh thawk emaw kan duh thiam fur tawh laiin Mizoram mipuite chuan Central a kut dawh thiam thiam chu ram hruaitu ṭhaah kan la ngai a. Mipui piansualna chuan Politician te a ti zeng tlat a, zeng tih in hre lo lekin sawi chhuah tam theih chu hruaitu ṭha nihnaah an ngaih phah a, kan piangsual zo ta a nih ber hi. 

Flagship hi kan han nei thawr ah! MIP, NLUP, NEDP, SEDP kan ti thul, kum 3 chhunga ei bara intodelh, Mizo buh chauh rin, Ruaa economy chawi kân kan ti, a engamah hian Silchar kawng ping lakah kum 30 chhungin min la chhan zo der si lo! 

Ni 2/3 Lockdown, Silchar truck driver nuar leh ramri buaiah mei kan khup tak zul zul a. Kan ramri lah chu chinchang hre bera inchhuah chung zelin issue a awm loh chuan thehmeh ang kan ni reng mai si. Aw Zoram, khua var tawh mai teh. 

Party a ni lomihring a ni

Kan Party neih ho hi an chhe vek a ni lo, a hotu, thu petute hi an expire tawh a ni ber. Hei hi a ni fin a ngaihna chu. Kal ngaihna hre tawh lo Chakai Farm leh Ruaa min About Turn puitu ringawt te, NLUP aṭanga NEDP a kawi mai mai te, Sawhthing bak sawi tur hre lo hruaitu kan neih chhung chuan chung Party chu hnualsuat a, Party tê ber pawh thlan tlin hial a hun tawh zawk a ni. 

A ṭhenin vision an nei leh lutuk a, an ûm pha lova, 2020 aiin 90's Politics ah an la chêng a, a ṭhen rinawm tluk mai, thatchhe em em, mawngrit vision nei lo, naupangtê emaw inti tlat an awm bawk. Kum 30 chhung midang awm chuang lo thâwka thawin an chapo bawk a, mithar lah thunei a pui tam vangin an inzuar thiam hlawl lo bawk si; ṭah lam lam hi a chhuak ṭhin. 

Nl. Mimi thupuan lah chu Sorkar mek tan chuan kum 5 chhunga mawihawih sawi lova inhai vurna hmanrua a chang thei bawk si. 

Thawk chhuak thei

Vajpayee, Sonia, Modi etc tlawn hluam hluam lo leh an laka nuih tlawn sáng aia Kristian Politician, ram intodelh tir, Zoram mipui lak aia ring lo vai Politician laka tûm kawh bar thei hruaitu, kuthnathawktute hmanga state economy chawi kang thei hruaitu, 'thawk chhuak thei' politician hi engtikah nge kan neih dawn? 

Kan zawlneite thupuan zulzuia phuahchawpa kal ve ngawt lo, thupuan thlen dik tir thei hruaitu kan awt ngawih ngawih mek a nih hi. 

Duhaisam

Kan Politician bawlawk hruaitute aia kut hnathawktute in leh lo a ṭhan duan hunah, Party a in hmangte aia mimal taimate dinchhuah hunah, social media a hnêawm khawpa rem leh rem lova lawina Party fak tlawrtute aia mipuiin an chawimawi hunah,  Unit, Group leh VC vel campaign bur bur a ngaih loh hunah chuan kan ramah hian sawi chhuak thei aiin thawk chhuak thei an dingchang zawk ngei ang! 

Tlipna

Kum 30 liam ta Politics kha Politician ṭawmkailote avangin uiawm takin a liam tawh a, kan liam tir leh mek a ni. Thawk chhuak thei Politician nei tur hian mipui hian engtia rei nge nghah kan huam fahran le! Mawl tawh lovang u. 

Pamhmai takin ṭhang hnih kan en liam tawh a, 2020 ah hi chuan, mumang ram ata harh ila, kan ram riang te hi mi hlui chin phar mai mai atan phal tawh lo ila. Mi mâwl thlang chhuaktu chu mi mawla chhiarin awm ve tawh se, Politician te aiin a thlangtu mipui hian mawhah i la ngam tawh ang u.