Written by
Vohbika pa
Cheng nuai thum sem a hun
Tunlai hian Mizoramah rulling party MNF demna a tam hle a, CCA duh lotute leh mi nawlpui rilruah MNF hi a buk a rit lo riau mai. Hetiang a nih chuan an chet chhiat chhoh zel a hlauhawm ta tlat a, an tawktarh neih ṭha deuh cheng nuai thum sem tur (SEDP) kha han sem thut se a va ṭha ang.
Mizote hi a bikin pawisa sem hmanga hneh theih kan ni tih a chiang hle mai. Congress sorkar theih chhan kha NLUP min pek an tiam vang kha a ni ber a, tichuan an sorkar ta reng bawk a. Chutiang deuh chuan tun inthlanah khan MNF chuan NLUP aia tam zawk, SEDP mipui hnenah sem an intiam ve leh a, an tling ve leh mai. MLA election hnuhnung berah khan Congress an tlak kha mi nawlpui pawhin an ring miah lo; a chhan chu eirukna leh thil dangah hming hliauna em em an nei lo a, opposition party lian ber MNF pawh khan han beih viauna tur an hre lo hial a nih kha. Mahse tunah heti taka MNF an rawn tlin chhan chu SEDP vang a ni a tih loh theih loh. Mi ṭha chu an nei ve ve alawm, an candidate te hi en ula, MNF pawhin candidate chu an nei ṭha a, Congress pawhin an nei ṭha; mahse rulling zawk Congress an tla daih... a chhan chu mipui hian a thlawna sum dawn kan duh vang a ni mai.
Tichuan tunah MNF boruak a hniam chho mek a, MNF party tan SEDP hi theh chhuah a hun ta viau mai, chhungtina cheng nuai thum sem hun kan nghakhlel tlang tawh a ni e. Nimin hun rei lote chhung khan budget-ah cheng vaibelchhe 750 lai mai kha an dah thei a ni a, SEDP pawh hi an duh phawt chuan engtik hunah pawh an sem thei dawn tlatin ka hria a ni. Congress pawhin NLUP an sem vak thei alawm! Mahse mipui insem tur, SEDP zinga cheng nuai 612.90 ve lai kha Taxation Deptt,-in an chang dawn tih kan lo hriat te kha a dik a nih chuan MNF hian SEDP hi an sawi angin an sem thei ang em aw. Home Deptt, School Edn Deptt, Labour Deptt, Cooperation, Power and Electricity leh PWD hman tur te kha eng emaw zat an sem kha a ni a. Sakhaw labingho thil tih, CCA vang mai maia MNF party a tlakchhiat ai chuan mipui rilru lak pen nan SEDP hi MNF sorkar hian sem thut mai rawh se.
- Vohbika pa