HLUTNA

Khawvelah hian mi hlu bik leh hlu lo bik te hi an awm riau ni hian kan hre ṭhin a. Mahse, tu pawh mai hian hlutna hi kan lo nei vek mai. Khawvelah hian hlu lo bik riaua inhriate hian mal ngawih ngawiha inhriatna te neiin, mi tam tak chuan nun hian awmzia a nei lo nia hriain mahni nunna lak mai duhnate a lo piang ṭhin. Mi lar, hausa, lehkhathiam leh fing emaw kan nih loh avanga hringnunin awmzia nei lo hle a hriatna hi ṭhalai tam tak rilruah a awm ve ṭhin. Mi ṭhenkhat chu mi lar tak te an lo ni thut a, an hluin an ropui khawp mai. Mahse, larnate hi damreina a ni chuang lova, hlimna lah a ni chuang bawk hek lo. Mi lar tak, mi te ngaihsan huai huai te hi an nun chhungril hi an hlim vek bik lo; Pathian hre lo mi ngat phei chu an nun hi a beidawng ru em em zawk. Mi lar zingah mahni nunna la mai te, ruihhlo ngawlvei an tam a, a dam lah an damrei lo zawk emaw tih tur a ni.

Achang chuan mi hausa tak nih te hi hlim viau tur leh nuam viau turah kan ngai ṭhin. Mi hausa hlim lo an tam em mai! Engmah hi a lutuk chu ṭha reng a awm lo. Pathian hre lo mi hausa kan tih te hi an chhungkua belhchian dawl lo tak tak, thlamuanna nei lo an tam em mai. Hauhsak emaw lar emaw ngawt hian hlutna a ni thui lo viau. Nu pumchhung aṭanga kan lo piangchhuak hrim hrim hi mi hlu kan ni nghal a, Pathian siam leh din kan nih tlat avangin.

Tunlai ṭhalai zingah hlu lo ni a inhria kan tam a, rilru hah nan leh beidawn nana hmang kan tam a, hei hi kan thlir dan dik loh vang mai a ni. Mihring ka nih hian ka hlu tawk a, vanduaina avanga pianphunga rualbanlote lo awm ṭhin te avang hian mi pangngaia ka lo awm hlut ziate hriat a pawimawh. Pianphunga rualban lova lo piang leh vanduaina avanga lo awm ka nih pawhin, tih theih ka nei a, hlutna ka nei a nia. Rualbanlo mi hlawhtling tak tak an awm a, engmah ni loa inhriat a ṭhut ngawt tur a ni lo. Theihna ka nei a, mi tih ang ka ti ve thei, mi hlu ka ni tih inhriatna, kan hlutna tilang chhuak tura hmalam pan tura ke pen hi ava pawimawh em!

Mi hausate, mi lar kan tih te pawh hi awlsam taka lo hlawhtling an ni lo; theih patawpa an beihna avanga lo hlawhtlinga lar chauh te an ni ṭhin. Chumi ni tur chuan mihring te hian hlutna leh theihna ka nei vek a ni.

Cerventes chuan “Khawvelah hian chhungkaw pahnih chiah an awm a, Neia leh Neilova te chhung an ni “ a ti a. Mi hausate pawh hian mi rethei hi an hmusit emaw, diriam mai tur a ni miah lo, mi retheite avanga hlu mai an ni. Mi retheite hi ngaihsaka ngaihlu viau tur an ni zawk a; chutih a hnekin mi rethei hmusit a, an hauhsak avanga chapo ta viau maite hi mi a tak an ni tawp mai. Khawvel mihringte hi hausa ta vek ila, retheih awmzia kan hre lovang a, Pathian mamawhna kan nei lo bawk ang. Kan lo hausa lo va, kan rethei a nih pawhin kan hlu hle tih hriat tur.

Khawvelah hian tumah hi inhmusit leh in diriam thei kan awm lo. Kan in mamawh tawn a, kan in ṭawiawm tawn avanga nung a, hausa a, lar a, hausa thei chauh kan ni.

Mihring hlutna hi hausak leh lar emawah a innghat lo; khawvelah nungn tura ka lo piang chhuak hrim hrim hi mi hlu leh hlutna nei ka ni tawh. Ram hruaitute pawh hi mipui thlan avanga MLA, Minister ni thei chauh an ni.

Hausak leh lar te hi chapona atana hmang lova, mahni hlutna leh midangte hlutna hrethiam apiang hi mi vannei leh awhawm an ni zawk a, mi hlawhtling tak an ni duh bawk. Mihausate ti hausatu leh chawimawitu chu mi retheite an ni a, mi hausate chuan mi rethei zawkte chu an ngaihluin a theihna a pianga an ṭanpui hi an mawhphurhna a ni. Mi lar leh ram hruaitute pawh an larna leh an tlin theihna chu mipuite an ni.

Chuvangin kan hlutna leh kan pawimawhna ṭheuh kan in hriat tawn a, kan in ṭawimawm tawn hian khawvel chu Paradise-ah kan siam mai dawn a lo ni.

- Reuben Lalnunthara Hnamte