Tui kan ziaawm nan Reservoir

Ṭhâl a ni a, Aizawl khawpui châwmtu Tlawng lui tui tlêmzia thlalakah te ka lo hmu. Hetiang hi a ni kum tin deuh thaw tawh dawnin alang a. Tui pump tur awm mang loh thla a awm fo thei dawn a ni a. Hetiang a thlen ṭum pawh a, tui hnianghnar zawka pump tur a awm theih nan sorkar hian Reservoir a siam hi tihmakmawh a ni chho tain a lang.

Tlawng lui, Darlung kai chhak lam emaw deuhah hian reservoir tur tui khuap ila, ṭhâl lai tui tlêm hunah reservoir-a mi tui chhuah ṭhen thin ila. Hetianga kan tih chuan tui pump tur tam zawk kan nei thei dawn tihna a ni a. Ṭhâl va-êk chârah pawh tui pump tur khamkhawp neih loh a awm thei lo ang. Aizawl khawpuiin tui hnianghnar zawk kan neih theih nan reservoir hi kan ngaih pawimawh a ṭul ta hle mai.

Environment hum­halh hi a pawi­mawh­in a ṭul hle a ni tih kan dinhmun hian a hril chho ta hle mai a. Mi pangngai chin chuan a ṭulzia leh a pawimawhzia an hmu thiam zel mai. Chutihruala buaithlak chu kan economy hi a ni. Mi tam tak hi chuan ramngaw pawi­mawhna te, nungcha pawimawhna te an hria a, mahse an khawsak a harsat miau avangin a ṭulzia an hriat pawh hi an duh angin an humhalhin an dimdawi thei lo a ni.

Evironment humhalh ṭha tur pawh hian hma kan sawn a ngai a, ei leh bar dapna awlsam zawk kan neih a ngai. Gas man a to miau avangin, chhungkaw tam tak tan chuan thing tuah loh theih a ni lo a. Thing tuah tur an kih a ngai a ni. Ramngaw vat chereu lo tur chuan eizawnna nghelnghet an neih a ngai a, chutiang a nih chuan lo neih bak thlan tur dang an nei lo tihna a ni. Hetiang a nih avang hian ramngaw humhalh pawh tam tak chuan duh hle mahse, an dinhmunin a zir miau loh avangin an hum­halh hlei thei lo a ni.

Hetiang hi kan ram economy a nih reng rih avang hian kan tui hnate hi a kang rih telh telh dawn niin alang a. Chutiang laka mipui tam takin kan tuar loh nan chuan tui dahkhawlna tur liau liau hian lui tui kan khuah a ngai ta hle mai. A bikin Aizawl khawpui phei chu tun dinhmun kan tui hi a hâl reng a ni ber mai. PHE lamin theihtawp an chhuah chung hian kan insu ṭha ngam lo reng mai.

Reservoir hi kan ngaih pawimawh thuai loh chuan tun aṭanga rei vak lovah chuan tui harsatna hi a zual hle ang a, harsat­na tam zawk pawh a thlen mai ang tih a hlauhawm. Kan ram hruaitute hian Reservoir hi ngaih pawi­mawhah nei thei se, tuiah chuan tun ai hian kan intodelhin kan hnianghnar zawk ngei ang.

- Ramropuia