Politics Revival

Ram tinah kraws thina hlu chu lo thang nghal se tul tak a ni tih lam hi chuan lamtualah min khalh lut mawh viau, chutihlaiin Vanram kan thlen hun chuan tih lam hian a hlawp hlawpin lamtualah min khalh lut thung.

Inkhawmpui nikhuaah kan hla tuipui chu vanlam ngaih hla a ni tlangpui, nitin rim taka thawktura kohna lam chu sirah kan hnawl daih. Ringtu lungleng tak kan ni a, vanram ngai mi kan ni, chuvangin leilung luah dan kan thiam tawk lova eng emaw hlekah ral tawh mai se lei ninawm hi tiin kan thle kual mai mai a ni.

Harhna chan kan chak chhan lian tak chu hlim taka lam hut hut hi a ni ber, kuthnathawh taima zawnga harhna chan te hi chak ila ṭha tur; thatchhiat chhuanlamah thlarau zawngin a peih, tisa erawh a chak si lo kan ti zawi ruih ṭhin a nih hi. Khawvel hi kan kumhlunna tur a nih loh thu uar takin kan sawi a, khawvel thil buaipui ber lo turin kan inzirtir ṭhin. Mahse, vanlam ngaia kur kur ṭhin, van lam ngaih hla sa a lam suau suau te hian khawvel thilah duham em emin kan nung si, sum kan atchilh bur bawk si.

Kan Kristian dan hian khawvel kan thlir dan a ti piangsual a, siam ṭhat pawh a har tawh a nih hi. Politics chu sual lam awn tlatin kan hmu a, kan inzirtir bawk.

Kohhrana rawngbawl­tute chu Politics boruaka in hnamhnawih lo turin kan in beisei ṭhin a, piangthar tan Politics a rawng neih a him lo tiin kan in chah awl lo a ni. Khawvel thil kan ti a, Pathian ram pawh beisei lem lo te buaipui turin ram Politics hi kum tam tak kan lo dah tawh a ni. Hetiang hi kan ngaihdan a nih avangin ram chu a lo chhe zo ta a ni, Kohhran huangah fekfawn taka kan in tih vai ṭingṭang chhungin khawvel mi kan tihten an lo ei zo duak duak a, an duh ang angin ram Politics an lo chichawm a. Mihausaah an in siam a, sawisel chungin a rukin kan tlawn leh duk duk si a. An hausakna zar zo pha nih te chu kan intihtheihna a ni zawk mah a, chinghne koham tia Party worker te kan chhuah laiin anni lah an lo in sawh muk im em si a, khuareiah kan awt leh si a nih hi maw! P

arty Politics hi Indian Political tradition a nih miau avangin Politics luhchilh turin Party kal­tlanga khawsak a ngai a, chu tak chu kan hmu khawlo zo tawh si a, a buai­thlak ta vek a nih hi.

Kan ram Politics siam ṭha tur hian rorelna duhtu pawl din chung chung lam a ni lo, a bulṭhut (grass root) aṭanga ṭan a ṭul. Tunlai chhuan te hi Politics thlir dan dik lovin a khuh buai hman tawh, chuvangin naupang sikul kal rual te hi nasa takin zirtir ila, chu chuan hun lo kal tura atan ram Politics thianghlim a siam ang.

Khawvel hi Pathianin enkawl turin min ti a, hmasawn duhin kan ring kan fan kan fan. State dang kan thlir a, hmasawnna kawng an zawh a, rual awh a na tiin kan insawh mek a ni. Kan khawsak danah kan lung a awi tawh lova, ram chu a damlo tih thu hi khawi hmunah pawh thupui thlan hlawh ber a ni. Ram siamṭhatna bul ṭan nan kuminah Pathianin kawng min hawnsak a, ram hruaitu thlangin bul kan ṭan dawn a ni.

Engpawhnise, khawvel thil riau a kan ruat Politics hi thlir dan dikin I thlir phawt ang u. Kan Kristianna rilru put hmang (mind set) hi zau takin her ila, piangthar ṭha leh Pathian au tam apiangin Politics hi luhchilh sela; a lairil lamah zuang lut sela, chuta ṭang chuan siamṭhat hna a thawh theih ang. A chhe lai siamthatu ni turin i luhchilh ang u. Party worker party tana inpumpek te hruai ngiltu, party office thian thianghlimtu nih hi Pathianin rawngbawlna min pek a ni ti ngam rawn pung deuh deuh rawh se. Pialral ram nuam ngaia kan kur kan kur chhung hian, ei zotu in a lo ei zo duak duak a nih hi.

Kohhran tana mi ṭangkai kha ram Politics-ah mi ṭangkai ni ve tawh sela, political party te hi thlarau thianghlim nena kuangkuah a hun ta a ni.

- Rosangzela