Motor lei khap (1st Jan, 2020)

National news lam kan bih a, Mizoram State sorkar hnuaia Departments/ Boards/ Corporations, ADC te sum renchemna (Auster Measure) atan motor lei a khapna thuchhuah 30th December 2019 order a lo lang a. Mizoram state sorkar sum renchen tumna hian min tilawm hle. 

15th Dec 2018, MNF sorkar thar lo piang kha sum leh pai enkawlna kawngah nasa taka an fimkhur a ngai tih kha ka lo sawi rik ve a ni. Central sorkar sum harsatna tawh dan GDP leh Mizoram state budget thlirna pawh post ka siam phah nual. 

Central sorkarah sum zuk hai chhuah zung zung tur awm khan an ring tlat a (An zuk hmu pawh a ni lo, an ring a ni ber), Minister ṭhenkhat phei chuan Project Reports te an pawm thla ṭun ṭun hlawm a. MLA ṭhenkhat pawhin an bial chhunga pawimawh an tihte project an siam tir zung zung nghal a. Tunah chuan Central sorkar leh state sorkar financial din­hmun harsatna kan hre chiang deuh tlang tawh turah inngai ang. 31st Dec 2019 - Union FM Nirmala Sitharaman chuan kum 2025 thleng atana National Infra­structure Sector pipe­line Rs 102 lakh crore ruahmanna a puang a. Cheng vaibelchhia hlir nuaih za pahnih chu tam tak a ni. Mahse, pawisa chu khawi aṭanga lokal tur nge, tih hi a buaithlakna a ni. RBI Rangkachak te kan hralh fai vek a nih ngawt loh chuan Former, BJP Gov't FM Yashwant Singha, Subramaniam Swamy, MP (RS) BJP, Former, Chief Economics Adviser of PM Modi, Avind Subramanian te hi FM Nirmala thusawi awih lotu ber an nih leh ngei ka ring. 

Kum 2024/25 vela India economy growth US dollar 5 trillion kai tir tumna thusawi reng an awih lo. Tun hnaiah buhfai, purunsen leh var, tel man a sang em em, petrol & oil man a sang zel. 1st January, 2020 ni hmasa ber news kan en chuan gas leh rel chuan man tihsan tur a ni a, New Year present duhawm lo tak a ni. February thla tir lamah Delhi Assembly Election neih a ngai lehnghal a, PM Modi & Co tan chet fuh a harsat phah ka ring. Central sorkar hian sum leh paiah har­satna namen lo a tawk tih a lang reng. State tam tak mangang chuan petrol & diesel, vehicles tax zu chhiah te an tisang vak a, an ziaawm deuh. Chutiang dinhmun aṭanga thlirin a bik takin Mizoram state sorkarin sum leh paia inrenchemna kawng hrang hranga a kalpui nasat hle a ngai tih hi kan zavaia hriat tlan a ṭulin ka hria.