PEACE BONUS
Mizorama chengte hian ram ralmuang kan nih avanga kan nihlawhna hi kan chhut ngai em le. Kan ram buai lai (1966-86) hre pha lo ṭhangthar tam tak tan chuan ralmuanna hlut zia hi an ngaihtuah phak lo hial awm e. Ram a buai tak tak kha chuan mahni in lum luah ngam lovin, ramhnuaiahte, State dangahte leh ram pawn (foreign) thlengin himna zawngin kan tlanchhe dawr dawr a nih kha. Sipaiin kan Pathian Biak in min luahsak a, Curfew vangin Kohhran tan hma lak ngaihna a awm lo va, kan thlarau nun thlengin a nghawng hle a nih kha. Tun hunah erawh chuan ram buai avanga himna zawngin ṭhenawm State mai bakah ram dang (foreign) aṭanga himna zawngte tlankhawmna ram kan lo ni ve ta reng mai a, hei hi "Peace Bonus" dik tak chu a ni e. Kan Zo hnahthlak puite chauh lo pawhin Peace bonus hi an rawn chèn ve mek a, hei hian remna hlutzia min hriat thartir se la, ram hmangaihna kawnga min ṭanrualtirtu lo ni ngei teh se.
Mizoram himna hi pawn lam aṭanga min rawn tihchhiat a hlauhawm hran loh va, a chhunga chengte hi kan inpumkhat tlat chuan kan ralmuang zel mai ang. Hemi kawngah hian mipuite kawng dika hruai turin kan Politics kalpui dan a dik tur a ni ang. Sawrkarna siam duh luat avanga ram leh hnam tana ṭha lo, mipui min ṭhen hrang thei ang chi, dawt pawisak lohnate, dan leh thupekte leh Kohhran thu pawisak lohna thlenga Politics kalpui hi a hlauhawm hle a ni. Ram hmangaih ber anga insawi ringawt hi a tawk lo va, kan ram hi kan hmangaih tak tak a nih chuan kan enkawl danah a lang tur a ni ang. Buaina siam hi a har hauh lo va, mahse a chin fel harsat zia hretute vek kan ni a, Manipur buaina pawh hian eng chen nge a awh dawn hriat a ni lo a ni. Hei vang hian kan State ralmuanna tichhe thei lakah kan vai hian mawh kan phur a, kan ram roreltu apiangte leh Politician-te hian mawh an phur zual a, kan Politics kalpui danah hian ram leh mipuite hi ngaih pawimawh ber fo tur a ni a, mahni ṭanghma haina tur a ni lo. Kan ram leh hnam leh kan Sakhua a himna turin Pathian duh zawng rorelna dik hi kan mamawh ber a ni reng fo.
Thuthlung hlui hunah khan roreltuten an bawhchhiat chuan Pathianin a hnuk hniam mai ṭhin a, nasa takin mipuiin an tuar ṭhin. Thuthlung hlui hi Thuthlung thar hlimthla a ni tih hi roreltuten an hriat reng a, dik taka ram rorelna an kalpui chuan remna leh muanna hi kan nei zel mai ang. Ram roreltuten an bawhchhiat erawh chuan kan ram hi a ralmuang reng kher lo thei a, Peace Bonus hi kan dawng reng lo mai ang tih hi thil awm thei a ni e. Ram rorelnaah hian Pathian ram hi thleng mawlh teh se.
- H Lalchhuanliana