UPSC CSE, 2022 FINAL RESULT

Union Public Service Commision (UPSC) chuan 23th May, 2023 khan final result an ti chhuak a, tling 933 zingah North East state hrang hrang aṭanga tling 20 an awm a, Mizoram erawh kan vanduai rih a, tling kan awm lo thung.

North East state hrang hrang aṭanga tling zingah Assam aṭanga tling tam berin, 6 (paruk) lai an tling a, Manipur 4, Nagaland 4, Arunachal Pradesh 3, Sikkim 1, Meghalaya 1, Tripura 1 ten an dawt a ni.

Tun ṭum Civil Service exam a pakhatna chu Ishita Kishore niin, Garima Lohia, Uma Harathi N ten an dawt a, top 10 chinah hmeichhia 6 leh mipa 4 an lang. Top 25 ah hmeichhia 14 langin mipa 11 an lang.

A pumpuiah mipa 613 leh hmeichhia 320 an tling. General category aṭangin 345, Economically Weaker Section (EWS) aṭangin 99, Other Backward Classes aṭangin 263, Schedule Caste aṭangin 154 leh Schedule Tribe aṭangin 72 te an ni.

CSE, 2022 ah vanduai mahila, tun hnai kan thlen chin ngaihtuahin hma kan sâwn ve zel a, kuminah phei chuan interview pahnih kan nei ve.

Tunhnai kan thlen chin tarlang zuai ila:

1. 2019 - Preliminary Examination paltlang - 6

2. 2020 - Preliminary Examination paltlang - 3

3. 2021 - Preliminary Examination paltlang - 8

4. 2022 - Preliminary Examination paltlang - 12

Interview - 02

UPSC CSE hnuaia exam a, a tawp thlenga hlawhtlinna chang thei kan neih hnuhnun ber chu Pi Elvina Leivon (2016) a ni a, hemi hnulamah erawh tling kan nei leh tawh lo. Indian Administrative Service (IAS) bika Mizoram mi tling hnuhnung ber chu Grace Lalrindiki Pachuau (2014) a ni a, Indian Police Service bikah phei chuan 1995 hnu lamah tling kan nei leh tawh lo.

UPSC CSE service hrang hranga tling kan neih hnuhnun berte:

1. IAS - 2014

2. IPS - 1995

3. IPS (postal) - 1999

4. IFS - 2005

5. IFS (Forest) - 2013

6. IRS - 2013

7. IDAS - 2014

8. IDES - 2014

9. IAAS - 2016

UPSC Exam a Mizo tling kan tlem chhanah hian mawhpuh tur kan zawng a, society, education system, English thiam loh vang, 8th schedule ah Mizoṭawng a tel loh vang tihte hi a langsar zual an ni. Nimahsela, heng hi kan tlin theih loh chhan a ni chiah em? Vaiho zingah Hindi medium sikul chhuak, English pawh thiam mumal lo an tling nual tho si a, eng vangin nge kan tlin theih loh bik? A chhan nia lang chu kan taima tawk lo fo tih hi a ni. Kum tin exam a awm ziah a, Aizawl centre a kum tina exam hi 300-700 vel bak an ni ngai lo. Chumi zinga 10-20 vel chu tih tak takna nena exam nia ngaih a ni a, a bak zawng chu experience atana exam an ni. A chhan chu, kaihruaitu mumal nei lo, mahnia tawnhriat chawp ngai ang kha an tam em a ni.

UPSC exam hrim hrim hi tum thut chi a ni lo a, naupanlai aṭanga rilru puthmang thlenga lo sawizawi a ngai a, a kalphung man a ngai viau bawk. A har kan tih fo chhan chu, syllabus, question hlui, question kalphung kan zirchian peih tâwk loh vang a ni.

- Eleazer Tetea Hmar