MNF leh Congress an ṭang dun

Tunlai Social Media chu party naupang ber ZPM beih rawnna a ni hawt mai a, an mawh lo e. He ZPM hian aia upa zahna zuk nei tlat lova!!! He party thar naupang tak hian Lunglei inthlanah MNF leh Congress a phelh mualpho a ni. Zemabawk inthlanah pawh an rawn invawrh sang leh tho a, thingkung ding mar at chu a rah a chhuah si chuan an vawm an vawm mai loh nakah, vawm a la tawk dawn chauh a ni ZPM hian.

Kan thu hmahruai khian ZPM chu a ti nui var var ngei ang le, kan Lalpa pawhin fak hi a duh a ni. Fakna khi an lawm chuan selna khâ pawh an dawng zo tho tur a ni. ZPM hi anmahni mai hian an la tling phak lo nasa tih an inhriat tel a ngai a, chapo reng reng suh se.

Ka theih tak emaw an intih chuan veng tin khaw tinah ZPM hi an chhiar anga a hnung berah an awm dawn tun dinhmunah hian, ka sawi ngam sak. Chu ZPM chuan sorkar a tum chuan a luan hniam a ngai, a inhawn zau a ngai, a dawh theih a ngai, a inngaih tlawm a ngai, a teirei peih a ngai, a huaisen pawh a ngai.

Tunlai hian MNF chuan game nalh tak an khel a. Congress an sawi lian chho mek a, inthurual ta ang mai hian MNF mi chuan Congress pa FB post a like a, Congress pa pawhin MNF pa post a like a, an post tam ber chu ZPM sawiselna a ni.

MNF party hian Congress an tet hi an hlau em em a, an hlauh chhan chu hetiang hi a ni a :- Congress hi party lian sa an ni a, an tet chuan MNF lamah an kal dawn si lova ZPM ah an kal dawn si a ni. Hei hi MNF tan hlauhawm a tlin phak avangin Congress chu belh tlak tak Party lian la ni reng anga an chhuah a ngai a, Congress an len hian ZPM a peng tur an veng thei a, chu chu MNF hian an hre thiam a, MNF chu fing tak an ni.

Congress hi chuan survival an fight a, Treasurer berin President chu dictator leh party dan zawm lo tiin a puh a, a post aṭangin a bang a. President chuan amah sawisela a banna pehkha leak out chunga Treasurer nihna chhuahsantu chu party aṭangin a hnawt chhuak ngam lova, inawih nun dan an ngaihtuah ngat ngat a, tlin tum aiin MLA nei tlem ber nih pumpelh an tum chho mek.

MNF leh Congress hian ZPM hi an beih rawn meka hei hi an tuar zo lova an zam a nih chuan ZPM hi sorkar tlak an la ni lo. He beih rawn hi an tuar chhuak zo a nih chuan ber thla tir lamah chuan ZPM boruak hi a kang sang tawh ang tih hi ka mimal thlirna a ni.

- Vanlalmawia