RORELNA ṬHA KAN VA MAMAWH EM!

Ram rorelna hi politics aṭanga siam a nih avangin political party-te aṭangin ram roreltu turte kan thlang ṭhin. Sawrkar ṭha an nih ngei beiseiin kan thlang ṭhin  a ni. Mahse Mizoram state kan nih hna sawrkar kan hrawn tawh kha han thlir let ila, anmahni party tan chhungpuipa ṭha tak ni turin theihtawp pawh an chhuah ṭhin hmel khawp mai. 

Opposition mite tan erawh nuhrawn sual tak anga an awm leh ṭhin hi a pawi ka tiin mak pawh ka ti ṭhin. (State kan nih hmaa roreltute kha chu CM-te an thi tawh a, an chhiat an ṭhat sawi a ṭul lo va). 

Tuna kan sawrkar mek hi han sawi ta ila. Party dang sawrkar aiin an mak a, an sual bik ka tihna a ni lo, kan ram sawrkarna inthlak tawh ṭhinte kalphung kan sawina a ni. Sawrkarna an chan tawh chuan opposition te aṭanga thil ṭha zawk ni âwm rawtna te lakah chuan, an beng an chhu ngawng tlat zel a. Tun ṭuma Covid 19 do chungchang-ah hian, Mizo mipuite kan ṭangrual hle a, kan sawrkar pawhin theihtawp an chhuah ngeiah ka ngai. Hetia lungrual taka hri kan do ṭheuh lai hian, sawrkar hotuten kan ṭanho dial dialnaah lawmthu an sawi fo a. An ṭawngkam te ka lo ngaithla ṭhin a, kohhran te, NGO te, ṭhahnem ngaia duty task force chungah te, damdawi lam hnathawktute chungah te lawmthu an sawi ṭhin; Opposition party-te chungah hian lawmthu an sawi ve miah lo niin ka lo hria a. Ka lo hre fuh lo palh a nih chuan min ngaidam sela. TV-a an lawmthu sawi vawi hnih/ vawi thum lai ka ngaihthlakah chuan an telh ve ngai tlat lo. 

Opposition MLA-te pawhin thawhlawm an thawh tam viauvin ka lo hria. Tin, tlawmngaia task force duty-te pawh an tlawh bawk ṭhin kha a nia, lawmthu sawinaa sawi tel ve kha a har loh tehlul nen aw, ka lo ti rilru ṭhin. Hrikai enna khawl pawh opposition-te lei chu an duh hauh lo bawk a. Lawm takin lo pawmin, mipui hriatah thiam takin lawmthu te han sawi ve sela, ram nu leh pa nih tling takin lo welcome thiam sela a petute tan a phUrawm ang a, kan hotute lahin ram nu leh pa nih tling tak an nih an lantirna aṭangin a credit chu anmahniin an chang dawn tho asin mawle. 

Tuna inthlan tur thuah pawh hian, hun danglam bik tak a nih avang hian opposition lam te pawh rawn duh phei sela chuan a ṭha ber an thleng ang a, kan fak laih laih zawk mai tur a ni. Mahse, chu em em zawng an tlin lo a nih pawhin an demawm love. SEC leh state sawrkarin thutlukna hi an siamah ngaih a ni a, chu chu an tihawm a ni tho. Mahse, ngaihdan hrang, Covid 19 a darh chak chhoh mek si avangin, inthlan hi a hun lo e, VC/ LC-te term chu state sawrkarin a ṭul chuan thla 18 (kum khat leh a chanve) pawh sei theihna a nei bawk a, chumi chhungah chuan kan boruak thlir zel ni se, ti zawnga rawtna a tam tehreng nen, sawrkar chuan a beng a chhu ngawng tlat mai hi ṭha lo hlein ka hre bawk. 

Hetiang hi chuan, oppo­sition lamte nen sawiho sela. Chuti khawpa rilru ṭha chu an tlin lo a nih pawhin, SEC thu angin emaw, sawrkar ngaihdan anginemaw thiam tak leh mipui ngai pawimawh takin chhang mai sela. Inthlannaah hri hi a darh loh beiseina huai taka an neih thu te pawh sawi ve in, mipuiten kan khawtlang roreltu tur thlan hi i ngai pawimawh ṭheuh ang u, ti zawngin thu te chhuah ta sela, kan dam huai ka beisei. 

Chuti ni ta lovin, oppo­sition-te laka an lalna lantir hrim hrim an duh nge, Zoram mipuite lakah an lâr palh ang tih an hlau nge, mipuite laka hawihhawm chhuah hrim hrim hi an tlin lo nge, an ngawi reng mai, a va ṭha lo em! Hetiang a nih chuan, state leh state ramri thuah nasa taka innuai pawh lo thleng ta sela, mipui zawng zawng ṭanrual hunah pawh opposition-te chu ṭanrual pui aiin, mipuiin an fakang tih hlau hrim hrimin hup beh kan tum dawn em ni ang le? 

Kan hotu pa hatin, “Kan chhUngte pawh nisela, kan pawl an nih loh chuan engah mah ka ngai lo,” a tih ang chi hi kan ram nu leh pa ni tawh te, ni mekte leh nih tumte nunah hian awm tawh lo hram teh se. Hlauthawng chung chunga kan inthlan chuan, neutral-te an phur lo va, ruling tan a ṭha zawk ṭhin a, chu chu tuna kan ruling party hian an tin zawn rân ni ngei tura an suangtuahna te pawh a ṭawmpui awm tulh tulh mai dawn alawm le. 

Political party-te hi kan ram a lo dinchhuahna tur thil leh kan ram mipui nu leh pa nih tling tur chherchhuahna tur a nih hi i hre reng ang u. Party thlarau dik lo tak hi kan vawn tlat zawk chuan, din chhuahna nghahhlelhawm tak chuan hla takah min tawlh bo san daih ngei dawn si a, a va pawi thui dawn em! 

Tin, party tina hruaitute chauh hi an pawimawh lo, party-ah chauh eizawn tum maihote hi hotute hruai sualtute an ni fo. Party-ah hian eizawn tum mai lovin, party-in ram dinhmun ṭha a siama eizawn theih hun hi nghak ila, chu eizawnna chuan mitin min huap dawn a ni. Kan Pathian thuin, “In hmaah nunna leh thihna, malsawmna leh anchhia ka dah...chuti chuan nunna chu thlang rawh u, in nun theih nan, nangni leh in thlahte nen…,” tih thu kha, Pathian thunung kan hmaa la ding reng a ni. 

Chutichuan, Pathian hnena inpekna thianghlim tak chu, ram leh hnamte tana inpekna thianghlim a tling a, ram leh hnam tana inpekna thianghlim tak chu Pathian tana inpekna thianghlim a ni bawk. Chutichuan, Pathian ngaiha thianghlimin ram leh hnam tan inpekna thiang­hlimin i inpe ṭheuh tawh zawk ang u.