Ram leh Hnam chhan nan Hnam dang vulh tawh suh!
Tunhnai hun engemaw ti aṭangin Vai hnathawk tura chhawr ṭhin sawiselna a tam a. Mizo ngei mistiri neih ve duh vangin Central YMA pawhin Mizo ṭhalaite in sa thiam chhawr tlak kan neih theih nan training a pe.
Vaite hi India khua leh tui an nih a, dan ang taka kan rama an awm a nih chuan ILP neia hna thawk turin dikna an nei. Hlawhfa ruaitu paw'n ama zalenna hmangin a duh apiang a ruai thei. A bikin mistiri hna te pawh a pawimawh a, Vai mistiri ten an thawh zawh loh nan Mizo ṭhalaite pawh hemi kawngah hian kan ṭan lehzual a ngai.
Vai mistiri-in thing phek ṭha a tan chuan, a mamawha a tan ni maiin kan hria a. Mizo mistiri-in thing phek ṭha a tan erawh chuan, "Enga ti nge i tan a... a dang phuah khawm mai tur a awm lawm ni, kha chu nakinah thil dangah kan la mamawh dawn asin..." etc etc kan ti a, Mizo mistiri-te chu an tla nghal zel.
Vai mistiri-in "ka pu, balu hi a ṭha lo, a dang la mai rawh" a tih chuan a ṭha lo em em a, a dang lak vat a ngai. Mizo mistiri-in, "ka pu, balu hi a ṭha lo a dang la mai ang" an tih chuan, "a ṭha ang, eng nge a ṭhat loh chhan, chumi khami te pawhin an hmanga a ṭhat lohna engmah an sawi lo" an ti tlat a, lu thing nu nu chungin an rilruah an hnampui mistiri-te thusawi zawm duhlohna a awm tlat ṭhin.
Vai chhawrte hian, "Mistiri... ti mai mai rawh, uluk vak suh", an ti mawh viau, muang mah se, a harsa viau niin kan ngai mai.Mizo kan chhawrin an uluk a, an muanin hna thawk muang kan ti bik tlat a, "uluk lutuk suh, a hautak em mai, ti mai mai rawh" tih thlakzen kan ching. Mizo hnathawktu dah hniamna rilru hi paih a hun.
Miin, "In in hi vai sak nge Mizo sak" an rawn ti a, "Mizo sak." 'Mizo chuan vai hi chu kan tluk lo deuh a ni' an ti zui a, sawiselna tur an zawng a, an hnampui mistiri-te chu an tla nghal vang vang.
Hna thawh tur neiten Mizo mistiri ṭha rawih tur in hmu ngang lo a nih chauh loh chuan, vai chhawr intih hmuh hi sim teh ang u. Kohhran leh Mizo NGO-te lek phei hi chuan vai chhawr lo ngam ang u, Vai khan sawma pakhat phei chu a pe dawn miah lo!
Mizoram chhan dan ṭha ber pakhat chu hnam dang tana hna siam sak rawh loh hi a ni. Hna pe ziah lo ila an sum neih sa hmang ral ringawt turin Mizoramah an awm reng duh miah lo ang.
- Vohbika Pu