Traffic jam siam chawp

Kan Chief Minister Pu Zoramthanga hian kum 2018 inthlan hma khan uar takin Traffic Jam awm lohna state capital siam a tum thu kha a sawi a. Chutihlaiin Aizawl Municipal Council (AMC) hian Traffic jam hi an siam chawp tlat bawk si a, Ramhlun kawngpui pheia Traffic Jam an siam dan hi nitina pal tlang ṭhin tan chuan a chiang khawp mai.

Kawngpui kama kea kalna tur footpath siam hi khawpui hma­sawnnain a ken tel a ni a, mipui hi lirtheia kal lo tam tak kan awm avang hian ke a kalna tur ṭha tak hi chu khawpuiah hi chuan a pawimawh a ni. 

Ramhlun pheia kea kalna an siam pawh hi a ṭha viau tho na chungin kea kal na an siam hi Traffic Jam siamna khawl a ni ta mai si a nih hi.

Tunah hian a nghawng nat turzia hi kan la teh thiam lo zawk ang. A chhan chu Covid-19 avangin kan la intlan chhawk deuh char char a, chu bakah mi hi a ṭul bik lovah chuan an chhuak vak lova, sikul an la chawlh char char bawk avangin zirlai hruai ṭhin leh college kal ṭhin te motor a la chhuak lo chung pawhin lockdown loh ni chuan Ramhlun pheiah hian Traffic a Jam deuh ziah ta mai. 

Kawngpui hi a zau em em si lova, City Bus leh motor pangngai intawh theih lohna a awm ta nual mai a ni. 

AMC hian foot­path an siam dawn chuan chu aia tih hmasak ngai hi an theihnghil a, chu chu motor parking hi a ni. Kawngpui sira motor parking awm chung sia footpath dah hi chu mahni leh mahni in hremna mai a ni. 

Khawpui cheina tur footpath siamna tur sum a awm tih vanga Traffic jam tur khawpa kawng ti zim tur hi chuan siam loh law law mai tur a ni a, kan Chief Minister in kawngpui chhawng siam a tum laiin ṭhenkhat lahin kawngpui awm sa ang ang kan lo tizim ve mek bawk a, hei hi vision inkalh tak a ni. 

Kawngpui kamah footpath a awm dawn a nih chuan kawng­puia motor parking hi phal loh tawp tur a ni. A nghawng hi a na dawn a nia, a chhehvela in nei garage nei si lo te leh he mi kawngpui pheia dawr nei zawng zawng hian an tuar vek dawn a, motor an park theih loh chuan sum­dawnna hi nasa takin a nghawng dawn bawk a ni. 

Mahse tunah hian footpath awm bawk, kawngpuia motor park bawk chuan Traffic Jam siamna a ni tih nitin kan hmu ṭan tawh si a, Covid-19 hi a reh huna motor a chhuah tam hunah phei chuan Aizawl hmar lam aṭanga khawpui lun lai lut tur hian kan buai dawn a ni. Footpath siam hi ṭhiah leh rual a ni tawh si lova, Ramhlun pheia Motor Parking hi khap vat a ṭul a ni, 

Kawngpuiah motor inpelh theih lohna khawpa zim a tam ta a ni.