Congress an ral dâwn tih hi

Party ruhrel lian Congress ho an ral dâwn em? tia zawhna zawh hial ngaia an awm thut hi thil mak a ni. Pu Lal Thanhawla hoin kum 10 kal ta mai kha chuan Mizoram hi an sawp hneh hle a, MLA Seat 40 zinga 34 an lâk bakah VC inthlan leh District Council lam pawh an hui phiar a, tunah hi chuan Congress tana MLA tlin theihna hi a vang khawp mai.

Pu Hawla chawl kha a duh vang renga chawl emaw tih laiin an nawr chhuak a lo ni reng a, Pu Hawla a President zui zel chuan Congress aṭanga a hlawma chhuah tum an awm tlat a ni.

Pu Hawla chu a lo tar ve tawh a, chawlh a hun tawh tho a, an hmel ti mawitu ber tih hre lovin Pu Hawla a chawlh rualin 'CONGRESS THAR' din an tum ta a ni. Pu Hawla avanga sorkar tih inhre duh loin a chhia zawng zawng Pu Hawla an puh a ni. Pu Hawla a awm lo chiah a, 'Ṭhat loh theih lohna bawm' an zuara Pu Hawla hnuaiah chuan a ṭhat theih loh an ti chu a ni ber e.

Pu Hawla tel loa inthlanna lian hmachhawn hma­sak ber chu Lung­lei Municipal Coun­cil inthlan kha niin Congress in can­didate an nei ṭha ti siin an hniam em em tho a ni. Lunglei lama ding tura an thlem chhuah candidate tura an puan hial Officer Pension phei chuan Congress candidate nih a tum leh tawh lo. Pu Hawla kha chu a lo ropui a ni, a awm loh chuan Congress chu an nawi ta hle.

Tunah an Trea­surer Pu Zodin­tluanga chu a bâng tawl mai. Pu Zodintluanga hian a bân chhan chu Pu Lalsawta vang tih a banna lehkha Social Media lama darhah khan a ziak chiang a ni. Pu Lalsawta chu dictator ang maia che tiin a puh a, a bang ta hial a ni. Pu Zodin­tluanga ban hnu hian Congress mi leh sâ an bang nasa a, a la awm chhun pawh an tui tawh lo khawp mai.

Congress MLA hlui leh Minister hlui mai pawh ni lo MLA ni lai zingah ngei ngei pawh party danga va in zuar an awm ta. Hei hi Pu Hawla awm loh nghawng na tak a ni. Congress hian ruhrel lian inti em em hian tlinna tur bial an vàn a, Treasurer bang ta Pu Zodintluanga chu a la tling leh thei ber tura ngaih a ni.

NE State dangah Congress an ral nasa tawh hle, Mizoram hi an dinhmun tur chu kum tawpah a hriat ang.

- Lalthangmawia