Nuai 3 min tiam a ni lo em ni?

MNF President Pu Zoramthanga video hi en lêt leh ṭhin ila, nuai 3 min pek hi a tiam chiang a ni. Politics lama vote duh vanga pek theih loh min tiam a nih chuan vote nawn leh hi mipuiin kan ba lo. Nuai 3 tlin puitu party hian nuai 3 hi an tlak phah thei.

Nuai 3 kan sawi chuan MNF Sorkar hlim khan Pu Robert Romawia chuan opposition lam chu deusawh takin 'SEDP nuai 3 hi khawia mi nge an sem ang tih hi a MAWL Thlak lutuk, keini chuan a tih dan kan hria' a tih kha kan la hre reng a nia. SEDP Nuai 3 semna tur hria chuan an la sem miah lo. A zawhna zawttu mipui (Voter) mawl an ti ngam bawka mipuiin Nuai 3 an la dawng si lo. Mipui hian mawl titu te mawl an tih hun a thleng dâwn hnai a ni. Mipui hi min ngai mawl viau tawh suh se.

Assam Rifles insawn leh insawn loh chungchang inhnialna pawh kha a la rei lo. Journalist Pu Vana khan insawn kha chan chawp a tia a thudawnna a dik thu a sawi a. MNF Minister pakhat chuan an insawn dâwn tih duhtawk lovin thu uar em em khan, 'An kel sâ kanna bel nen lam' kha a ti a, video ah khan a lo lang a, an la chhuak lo. Hetiang te te hi ṭawng fimkhur a ngai khawp mai. Sawi lo mai se an mualpho lo ni mai tur hi an han ṭawng pung pung ṭhin a ni.

Opposition lamah pawh hian sawi loh tur sawi ching, sawi chhuah avanga mimal leh party hlawkna awm chuang si lo hi a tam a, an sawi sual avanga Social Media châw tui ber ni zui hi a tam khawp nia. Pu Tawnluia te chu an ngawi tlata sawiselna tur awm mang loin an awm thei. Pu Tawnluia han sawi kai chuan Assembly Speaker Pu Rina Sailo khan Deputy Chief Minister, i Department ah cheng nuai 100 ziah bo a ni tih kha a sawi a. Pu Rinliana hi Deputy Chief Minister hian a chhang lo a, kha nuai 100 ziah bo a nih khan khawia pawisa nge bo ta le? tih chu zawhna a ni.

Zawhna dang awm leh chu Pu Rina Sailo, kan Speaker meuh khan dawt a sawi a nih chuan MNF hian mahni Senior Vice President nuai 100 bona Department enkawltu tia puhtu chungah hian kut an thlak ngam dâwn lo em ni? tih mipuiin an thlir. Nuai 100 thila ngawi bo zui Party an nih chuan kum 2023 inthlanah chuan mipui tán rin ngam an ni tawh lo.

Nuai 3 min tiamtute hian mipui hi ngai mawl viau suh se. Mipui hi Rs 25,000 te te a vawi 2 pawisa pek hian an lung a awi dâwn lo. Pawisa an la tho ang, an vote zui kher dâwn lo. Veng hrang hrang leh khaw hrang hrang titi inṭawm chu SEDP pawisa dawn zawh hnua party dang zawm a ni. Intiam angin nuai 3 sem tak tak se an chhuah san lo ang MNF hi. SEDP Rs 25,000 dawn hnua an chhuak a nih chuan heng mite hi mi le lo anga puh theih an ni lo, Nuai 3 tiam avanga vote tu an nih chuan a le lo hmasa chu Nuai 3 tiamtu an ni zawk.

SEDP ah hian Nuai 3 em em hi mipui hian an phût pawh ka mimal ang chuan ka ring lova, Nuai 2 chu sem se an tling leh var var ang. Nuai 2 chu sawi loh Nuai 1 pawh sem lo tán mipui hi neih reng theih a ni lo e. Congress hi zawt ila an chhang thei ang, Congress hian Nuai 1 an sem chung pawhin an tla tho tho a, NLUP Nuai 1 dawngtute khan a pawisa an dawn hnu kha chuan Congress vote nawn kha an ba lo tih an hria. Congress khan min vote tlin chuan Nuai 1 kan pe ang che u an tia an vote tling a, nuai 1 dawn kha chu an chanvo a ni. Nuai 1 an dawng zo chiaha Nuai 3 tiamtu MNF lamah mipui an thle dual.

Mipui chuan Nuai 3 an duha MNF an vote. Rs 25000 den den sem tur chu hria se Nuai 1 sem thei Congress kha an vote zawk a rinawm a, MNF chuan Nuai 3 an tiam avangin Nuai 3 duh in an vote a ni. Rs 25000 dawn hmang hi chuan mipui hi chelh beh theih an ni dâwn lo. SEDP an dawn hnu hian an kal bo duak dawn tih a boruak ah hian a lang reng a, hei hi mipui thiam loh aiin Nuai 3 tiamtu lam thiam loh a ni.

Mizoram Politics ah hian mi hi an mawl lova bum bum theih loh an pung zela Social Media lamah video hmangin sorkar intiamna a la ding reng a ni. Nuai 3 an sem thei dâwn em? tih hi mipuiin an nghak a ni.

- Lalnuntluanga,

Bethlehem Vengthlang