KAN SAWRKAR CHUAN...
India ram hi khawvela democracy lian ber an ti thin a, mipui aiawha roreltu tur thlang thin kan ni. Mizoram pawh India rama awm kan nih angin kan inthlang thin a; kumin kum tawp lamah inthlan beiseiin political party tinte an inpuahchah mup mup mek a nih hi.
Inthlan dawnah hian political party-te'n inthlanah thlan tlin an nih a, ro an rel huna an tih tur chi hrang hrang tarlanna, manifesto an tichhuak thin a; manifesto-a tarlan chiah lohte pawh an tih tur tam tak an sawi thin.
Political party-te leh an hotute'n "Kan sorkar chuan..." tiin an tih turte an sawi puangzar thin a; chungte chu mipuia an inzawrhna a nih mai bakah, an intiamna a ni. Mipuia an tiamte chu sorkarna changtu party-te'n an tihmâkmawh a ni, kan ti thei ang.
"Kan sawrkar chuan kan ti ang," an tih hian, term khat (kum 5) chhunga an tih turte an sawina a ni a. Term dang lo la awm zel turte chu sawi kêp nghal ngawt chi a ni lo, sawi kêp theih pawh a ni lo. Chuvangin, an policy leh manifesto, mipuia an intiamte chu term khat chhunga tih ngei tur a ni.
Mizorama sawrkarna chelh tawhtu party-te hian inthlan dawna mipui hnena an intiamnate chu an sawrkar chhungin an ti em, an tihlawhtling em, tihte chu hmuh leh hriat theihin a awm àwm e. Tihhlawhtlinte pawh an nei ang a, chutihrualin, tihhlawhtlin lohte pawh an nei ngei tih a hriat.
Tuna sawrkar ding mek, MNF party hi entir nan han hmang ta ila. Thlan tlin an nih chhan lian tak pakhat, zu khap chungchang chu rei vak loah an tihlawhtling nghal mai.
Chutih laiin, thlan tlin an nih chhan pui ber tih ngam, SEDP hmanga chhungkaw tin hnena Rs 3,00,000 sem an intiam erawh chu tun thleng hi chuan an la tihlawhtling lo tih kan hria. SEDP hnuaiah chhungkaw tanpuina pawisa an sem ngei a, mahse, an intiam zat chu sawi loh, tun thleng hi chuan 25% pawh an la sem lo. Hemi chungchang bikah chuan thlan tlin an nih chhan pui ber an la tihlawhtling lo tihna a ni.
Eng pawh ni se, political party tinte policy & manifesto hi thil pawimawh em em mai a ni a; mipuiin kan lo zir chian ve a, an tihhlawhtlin leh hlawhtlin loh chîk ve thin ila a tha ngawt mai.
- Kezo