MNF SAWRKAR HI ENGANG NGE A NIH?

- Vanlalhuma Kawlni

Kum 2018 MLA inthlan­pui campaign bul lamah khan, MNF Party hruaitute khan, kan inhmu chhuak tawh a, kan danglam tawh dawn tiin mipui mar an rawn dek ṭan a, mipui erawhin bar ah kan khawn lem lo. SEDP kha duangzo tawhin an Party chhungah Training te neiin in tihphur an tum viau na in, beisei an pha bik lo. Kha tih lai a Congress Sawrkar khan MLA 34 ngawt neiin a nghet mup a ni ber mai. Sawrkar anga an zawrh thar NEDP ah Sum ṭhahnem tak dahin, an MLA neih mek te bial vil nan Rs nuai 250 dah in, an tlin lohna bial 6 vil nan Rs nuai 300 ṭheuh an dah bawk ni a sawi a ni.

Inthlan Campaign kha MNF lam hian an bei ngawrh nghal hle a, mahse mipui lam erawhin an bengkhawn nghal mai lo thung. Hun a kalzel a, inthlan nan thla 2 vel a la awm tih ah chuan, Congress Sawrkara hnarkaitu pawimawh tak te leh CM inkar ah khi a lo awm ta. CM ngei pawh a che fuh seng ta lo. Serkhan (dai) kawng chho ah Motor pakhat rit phur chuan CM Motor a ken mai theihloh vangin pilot ten Silai kawm in an chhu a, na taka hliamin an tlansan tih chu Zoram dung leh vangah a thang chhuak ta. Heng hunlai tho hian CM hian Party sawhngheh a ngai tih hria in, Ka chhungte pawh nise Congress an nih loh chuan ENGATAN MAH KA TI LO tih thute sawiin heng thute hian a chhuan chhe zawngin vung a chhuah nasa hle bawk.

Hetianga boruak a chiri chhoh mek lai hian ZPM chuan boruak lian thawkhat tak an rawn siam chho ve mek bawk. Amaherawhchu, Sawrkar tur em chuan mipui lamin rinna an nghat ngamlo deuh a nih hmel, khawpui (Social Media chak na) tih loh ah chuan eng tehchiam an ni hman ta lo. Hetih lai hian, Congress Ministry-a Cabinet No 1 leh Cabinet Minister hlui leh an ṭhuihruai te chuan mak tak maiin MNF an zawm ta thut mai. He thil belhchhah hian Pu Robert Romawia Royte leh Er H Lalzirliana te pawhin a zawm ve nghal bawk. Heng thil hian hmun hrang hrangah MNF thlipui siam belh in, MNF zawm runpui a thleng a ni ber mai.

Ti chuan, Kum 1998 kuma Cheng hnih note zawr tak rawn thlak tu MNF Sawrkar chu kum 10 hnuah kaithawh nawn a ni leh ta. MNF Sawrkar hmasa khan CADC ṭhiah te, AR Sawn chhuah leh Ramri chinfel bak ah Kum thum chhunga intodelh chunga Suitzerland of the East tih hial tura Mizoram siam te min tiam na in, mumang ang maiin a thamral a tih theih awm e.

Heng bakah hian Mau­tam ṭam vanga mipuite puala Central lama an project siam BAFFACOS te chu an dil chhan theih­nghilh (anga ngaih theihin) a chingpen nasa hle a nih hmel a, hetih lai hian Opposition Party te chuan Mizo naupang hausa pahnih a hring chhuak nawlh niin an sawi thung!

Heng thil hre reng chunga MNF Party kan thlang leh thei mai kha kan fel tawh dawn an tih kha kan awih nge, MNF zawm tute thawm ri ruih ruih kha kan dawl zo lo? Nge SEDP Rs nuai thum kha kan dawng chak tih hi buk tham a nih rualin, kumin kum tawp lama kan vote thlak na turah inenfiah nan kan hman a pawimawh hle awm e.

MNF chu hneh tak in a sawrkar ta. Opposition an nih lai khan an President khan, Inzir chawpin kum 10 CM ka ni a, ni leh ngat i la chuan,ka thiam tawh khawp ang a tih te kha mipui rilru ah hian a cham reng. Tun hun hi a thiam hle tur hun kha a nih hmel a, thiam kan tih zawng ni hlawm tak maw le?

Kan CM hi, 2019 kum chawhnu lam khan, Central Sawrkar dawrin kar hnih zet Delhi a zuk cham a, mahse Prime Minister ber a zuk hmu thei tlat lo. A lo haw hnua Hnam Run Political Session-ah chuan, a fehchhuahna lama a hlawhtlin thute a sawi ngei beisei a nih laiin, Central lam hotute a vuak dûp thu a sawi ta chauh mai. Project siam chur chur theih a ni tih ṭawngkam erawh a sawi zui thung. Hemi ṭuma a thusawi hian Mipui beisei a phak lo hle. Inthlan hmaa TV Presenter ten an kawmnaah kha chuan, Mau/ Rua leh rubber etc ching tur te tan chuan engkim ruahmanna (ziak sa) an neih fel vek thu te, engmah Warm-up ngai lo a Bawngpui in sí ang phat a bul an ṭan theih tur thute a sawi kha a ni si, buaithlak hlawm hian.

SEDP hmanga chhung tinin Rs nuai thum an dawn tur thu an tiam hnuin, an sem thei dawn lo tih a chiang tawh a. He thil ben per nana Assembly House-a House Leader thusawi, chhung tin tan Health Care Scheme hnuaiah Rs nuai hnih ṭheuh dah a nih thute kan hriat hnuin, bumna mai a nih thu tichiang turin Rs vaibelchhe 70 chuang HCS hnuaiah Bill bà pek theih loh a awm mek a, ADB aṭanga Rs 1000 Crores pûk fel huna pek tum a ni tih a la ni leih leih.

A nih leh khawiah nge, MNF Sawrkar hmasak hunlaia hman loha lo awm ngar ngar Rs 150 Crores te kha, a pung nen chuan tam tak a ni tawh, an tih te kha? A nih leh Health Care-a inziah luhna fee zozai te kha khawnge? Thawktu (CSS) hlawh leh Medical Equipments zawng zawng Covid hrileng vanga Central Sawrkarin min pek vek lai a, hetiang dinhmuna kan din nachhan hi eng vang nge ni ta le?

SEDP Rs nuai thum an sem thei lovang, titu te chu an mawl vang kan ti maw kha, sem tura insawi chunga sem leh si lote hi an fing kan ti bík dawn em? MNF Sawrkar tirh lam khan chapo takin, a lo berah term 3 tal chu kan sawrkar ngei dawn an tih te kha a sawitu te hian an la ring cheu em le? Tunah chuan, mahni dinna bial tlansan lawng lawng thute kan hriat tak hi mawle....

Sawrkar hnathawk hlawh pek theih loh a awm ve dawn lo an tih te chu a letling thawk a, an hlawh an puk sak thul. A hun taka an pek theih loh sawi mam chungin thla thar ni khat chu ni 15 ah te min sawn sak ta a nih ber hi! Tuna kan ram dinhmun dik tak chu, Minister 3 vel bawr hian an fairel bel tih len nan theihpatawpin kan ram sum lokal hi inhlawh nan an hmang a nih ber tak hi. A makin a ná e. Mipuite kan harh a hun ta.