Beidawnga in puh political speech

Tunlai Mizo­ramah political speech belhchian dawna belhchian dawl si lo, ni thei awm anga lang, beidawnna politics hi tlem chu i han chhui zui ve dawn ang hmiang.

MNF Politician zinga beiseiawm deuh tura ngaih ṭhangthar, media lama mi hmelhriat hlawh te chu an rawn in chawk 'zero' tlat mai. An au hla chu, "Mizoram hi chhe veka chhuah tum an awm a, Mizoram hi a la chhe vek lo," tihte a ni.

An auhla dang leh chu, "Ṭhalaite beidawng tura fuihtu an awm," tih a ni bawk a, ZPM an puhna a ni. ZPM thusawi ni awm tak anmahni zawkin an sawi chhuak a, chu thu sawi chhuah chu anmahni bawkin an han chhang leh bawk a ni.

Pakhatna hi kan chhui chuan Mizoram hi chhe veka chhuah tum an awm tiin ZPM an han puh a, Mizoram chu a la chhiat vek bîk loh thu an sawi. Mizoram ṭhatzia leh MNF Sorkar hnathawh ṭhatzia sawi lovin ZPM puh a nia anmahni bawkin an sawi chhuah chu a sawi chhuaktu bawk chuan a chhang a, "Chu pa chuan chu i chuan a sawi a," tia sawi tur nei si loin mahni leh mahni an inchhang tawk vêl a ni.

Ṭhalaite hi beidawng tura fuih theih an ni lo. Mizo ṭhalai te hi an fing ve tawk, ZPM Party naupang ber hian an fuih beidawng hauh lo ang. An beidawng a nih chuan MNF leh Congress vanga beidawng an ni tih a chiang mai.

Beidawnna hi inhrilh theih a ni lo a, Congress leh MNF ah miin an beidawnzia an sawi hian ZPM fuihpawrh an ni lo tawp ang.

Delhi mipui pawh khuan Chief Minister Sheila Dikshit kaihhruai Congress Party-ah beisei an nei tawh lo a, Aam Aadmi Party an thlang tlinga Arvind Kejriwal-an state dangte entawn tlak khawpin a kaihruai mai. Mipui hi an fing tawh a, zui tlak leh rin ngam hruaitu chu an hre mai a, rin ngam loh chu an paih thla mai; tu fuihpawrh emaw thlem emaw mah an ngai tawh lo.

Tunah pawh Kejriwal-a hnuaiah Delhi chuan hma­sawnna an tem mek a, Congress an ni emaw BJP lam pawhin, AAP hian mipui an fuihpawrha sorkarah beiseina an nei tawh lo a, AAP an thlang tling ta a ni, an ti lo. Miin ram tana theih tawp a chhuah chuan mipuiin an hre vat a, zui tlak chu an zui mai ṭhin a ni zawk.

Kum 40 dâwn state kan nih hnua kan thleng chin leh tun thlenga kan dinhmun hretu ṭhalai rual MNF Sorkar rorel danah an beidawng a ni zawk si a.

- Lalhlimpuia (Mahlima)