MIZO ZAWNG ZAWNG RORELNA KHAT HNUAIA AWMTIR HI MNF THIL TUM A NI - ZORAMTHANGA

He thu hi MNF President leh Chief Minister ni bawk, Zoramthanga chuan nimin khan Mizo Hnam Rûn-ah a sawi a.

1. Tun hma kum 60 chuang daih tawha an sawia tharum chhuaha awmtir an tum tawh; an hlawhchhampui tawh chu, eng vanga thu thar sawia han sawi leh mai ṭhin nge maw a nih le?

2. Hetianga kan awm theih dan hi India Danpui Article 3-a awmsa a ni a, chu chu Peace Accord-ah ziah a nih thu a sawi a. Kum 40 chuang zet tawh hnu pawha a taka thil thleng a la awm rih si loh chuan eng nge a awmzia a, eng nge a ṭangkaina ni ang?

3. Manipur-a awm te chuan an duh an thlang thei a ti a. “Keini chuan kan bei tawh a, martar thisena baptis tawh an ni. Tunah chuan an kutah a awm tawh a, an inchhandam nan an duhthlanna a pawimawh,” a ti a. An tih ang khan tharum an thawh ve tur a ni a tihna em ni ang? An hlawhchham ang khan rawn hlawhcham ve rawh se, a tihna em ni ang? An tih ang chuan han ti ve se, hlawhtling chuang si lovin thisen chhuahna leh mi tam takin nunna chan phahna awm se, a ti em ni ang?

4. Nationalist inti ve dang te chu, ‘sabengtung sakei vun sin ang chauh an ni’ a ti a. Anni chuan MNF chu thil tum hlawhtlinpui chuang si lova, thisen chhuaha nunna chan tam taka awm phah a, mipui tam tak tan tuarna rapthlak tak thlentir bawk si chu, ‘àt sona’ chi khat an ti ve thung a, tu nge dik zawk ang le?

5. Political Party dang hruaitute pawh hian ‘Zo hnahthlakte rorelna pakhat hnuaia kan awm’ an duh thu leh an beisei thu hi an sawi vek a. Chutianga kan awm theih nan chuan awmze neia thiltih engmah an nei bawk si lo va, eng nge a awmzia?

6. A reng thu-ah awmhran kan duh chhan hi eng nge ni? Independence kan duh a nih chuan Mahni Kè-a kan din a ngai a. Mahni kè-a ding thei tura tih ngai apiang atan Cental Sawrkarin min pe chunga, chawmhlawm titiha awm reng site hian, engtia mahni theihnaa mahni kè-a ding thei tura inngai nge kan nih?

7. Lo awm hrang ta i la, Central Sawrkar thuhnuaia kan awm chung pawha Party hrang hrang thawk ho thei lote hi an lo inngeih kan ring em ni? Kohhran hrang hrang 100(za) chuang awm te hi kan inzawmkhawm theih kan ring em ni? Heti khawpa inthurual lo leh inngeih lote hi mahni-a kan awm hran chuan kan invaw darh vak zawk mai lo’ng maw?

8. Jerusalem han tih leh hluai ṭhin pawh hi eng nge maw a awmzia le? Chawmhlawm, Kutdawh ti tiha awmna hmun hi eng nge a ropuina ni anga, a thlàkhlelhawmna ni ang? Chawmhlawm Kutdawh ti tiha awm tura midang han sawm belh te hi a zahthlak lam deuh zawk lo maw? Jerusalem tak tak pawh khu eng nge maw a nih chiah le? An inkàp deuh bur bur reng a ni lo’m ni? Van Jerusalem pawh mumang lama kan suangtuah a ni deuh lek fang lo maw?

9. India hi hnam hrang hrang awmkhawmna ram a ni a. A neitu bìk tu mah an awm lo va. Politics-ah a ni emaw, sumdawnna thilah a ni emaw, a thiam leh a theite hlawhtlin nana kawng zàu tak inhawnna a ni. A tawizawngin sawi i la, Garo Tribal Tlangval, Purno Sangma Union Cabinet Minister bàka Lok Sabha Speaker a ni thei te khan chu chu a lanchiantir a ni. Khasi, Garo, Naga, Arunachali te zingah Governor, Union Cabinet Minister, Chief Election Commissioner, Union Public Service Commission Chairman/Member an awm fer fur thei te hian chu chu a lanchiantir lehzual a ni.

10. Keinin hetiang nihna kan neih ve theih lohna chhan hi eng nge ni? Ngaihsan tur leh Ngaih hlut tur hre lo va, Huau Huau, Hlim Hlawp leh ṭangkaina nei lo thil dang danga kan inhman ral deuh vek vang hi a ni.

11. Dawtsawi leh Lemchan Nun bansanin Takna hi nunpui ve i la, India ram ropui takah hian midangte ai pawha kan thlensàn theihna kawng a inhawng a ni tih i hria ang u.

12. Thil thleng danglam deuh a awm apianga Politics Khelhna remchanga hman zen chìn hi i bansan bawk ang u.

- M Lalmanzuala