HLIMNA VAN PIALRAL

Tunlai chu kan khawvel leh Zoram hmun tin leh keini vengah ngei pawh thihnain thla a zar a. Ni tin tualthihna rapthlak a thleng reng bawk. Han hawi vel ila, na tuar rumri leh lusun ṭap thawm tlang tinah hriat tur a awm a, thihna kut vawt hian min man tawh chuan sum leh pai ngahin min chhan zo lo va. Chhungkhat laina neih tamin min chhan thei hek lo. Harsatna vantla leh kan siamchawp harsatnain min hnuk hnawk a, chu chuan buaina leh chungpikna min thlen mek bawk a ni. Damdawi an hmuchhuak a, nimahsela, natna tihdam harsa chi dang a lo chhuak zel bawk.

Kan ram ṭhenawm Manipur leh Myanmar rama kan Zo hnahthlakten buaina an tawk a. Chu chuan ka nun ram hi a uai tliak a, a chhan chu kan unau leh kan thisen zawmpui an ni tlat a ni. An tawrhna chu keimaha hnam hmangaihna rilru (nationalism) hi a sawi nghing dawt dawt a ni. An natnaah hian mi pangngai chin chu kan na ve a, kan hmangaihna hi Tuivai leh Ṭiau lui boundary hian a dang zo lo ve. He thil hian insuihkhawm leh zai min neihtir ngei se a duhawm hle mai.

Khawvela remna zawngtute’n remna leh muanna a thlen theih nan theihtawp an chhuah a, silai mu leh bomb hlauhawm karah palai hna thawkin kan ram leh ram inkarah mahni ṭanghma hai hman lo lékin an thawk a. Heng mite hi International Politics buaipuitute an ni. (Party politics ni lovin) Heng mite hi chuan eiruk tih lam an ngaihtuah hauh lo. Khawvelah remna a thlen theih nan an nun an pe a, nimahsela, tih theih loh chin an nei. Ram leh ram an indo reng tho. A chhan eng nge ni ang? Ralmuang hmun reng hi a awm lo, Lalpa hnen kan thlen hma hi zawng.

A nih leh khaw’ nge? Eng tin nge? Hetiang teh nuaih khawvelah hian kan dam khawchhuah tak ang le? Khawvel chanchin chu a hmaa kan sawi tak ang khan, indona, inpawng nekna, natna, lungngaihna leh ṭahna hlir a ni. Nimahsela, khawvelah hian Pathianin min dah si a, kan damna tur chu kan ngaihtuah a ngai si.

Keini nung dama awmte hi kan boral hunah Lal Isua a lo la kal lo a nih chuan ni leh thlate a la eng zel dawn a. Bazarah mihring an la zi muah muah dawn tho a, intihhlimna leh football khelh runpuite a la kal zel dawn a. Phawngpui tlanga chhawkhlei parte a la vul zel dawn a ni. Khawvel a kal ngaia a la kal muah muah tur hi thlan khur aṭangin hre thei ta ila, kan lungawi ang em le? Lunglenna ṭangkai lo bak keimahniah hian a thlen hauh lo vang le.

Khawvelah hian duhtawk chin a awm reng reng lo; a mak teh asin. Mi hausa, sum nei ngahin an duhtawk lo va, thiamna nei sangin duhtawk an inti lo va. Thla leh arsite hi mi thiamte’n hriat belh zel tumin an zir a, sikeisenah khian in leh lo han nei mah se la, lungawina leh hahchawlhna an hmu lo vang. Lalna te leh thiamna te, thuneihna, hausaknate hian lungawina leh hahchawlhna, hlimna tluantling min pe thei hek lo.

Pathian chuan kan rilru, kan taksa leh thlarau kan engkim atan a fapa thisen leh nunna min pe a. Pathian fapa Lal Krista chu kan engkim atan min pe a. Amaha rinna nghattute chuan kan taksa dam nan kan hmang ngam tur a ni. Kan damlo a nih pawhin na chunga rilru damna, lusun chunga khawhar rehna leh thlamuanna, tuar chunga lawmna, hlauhna hmuna muanna an nei a, vanram khi an hnukhnai a, ‘Nang I awm chuan lei van a chang ṭhin,’ an ti nia.

A hmangaihnaah chuan kan nun hi hahchawlhtirin, a hruai theih turin kan nun hi a hnenah hlan ila. A malsawmna lo sur chu keimah niah a dawnthleng lo rem dikin, Ani chuan lei sual hmun thim ber pawh a rawn chhung eng ngei dawn e.

Halleluiah, Aw! Halleluiah Amen,
Kalvarya hmangaihna thisen zarah;
Ṭahna ram leh lungngaihna zanthim hi,
HLIMNA VAN PIALRAL khian a rawn ên.

- Hruaia Sailo, Tuikual North.