CENTRAL LEH STATE SERVICE CADRE-TE An awm loh pawhin kan kal thei

Kumina Union Public Service Commission (UPSC) exam result chhuakah, kan state (Mizoram) aṭangin pakhat mah kan tel lo va, pawi an ti hlawm hle a, zahthlak hlea ngaite pawh an awm. Kan education system leh kan taimakna thlenga sawiselte pawh an awm bawk.

He ziaktu erawh hi chuan, pawi ka ti lo va, ka zak bawk lo. Mizoram State-in kan hloh a awmin ka hre lo. Indian Administrative Service (IAS), Indian Police Service (IPS), Indian Forest Service, etc te hi mipui hna min thawhsak tur leh rawng min bawlsak tur (public servant) te an ni a, chu vangin tlingte zingah kan state aṭangin an tel lo a nih chuan, state dang aṭangin mi an lo kal ang a, hna min lo thawhsak ang a, rawng min lo bawlsak mai ang chu, an chunga thuneitu politician te kan nei tho a lawm tih ngaidan ka neih a, rilru hahdam takin ka awm a, ka zing thingpui in ṭhin pawh ka ṭhlulh hran lo.

Colonial hun lai khan, anmahni, United Kingdom (UK) rama Crown Civil Service an tih kalhmang zulzuiin, India ram tan Indian Civil Service (ICS) an siam a. Colonial hun laia ICS-te kha British mite vek an ni ṭhin. Colonial hun lai a ni bawk a, chu vangin India mite chunga intih milen dan pawh an thiam hle. An milian hle reng bawk. Colonial hun tawp lamah India mi tlem te ICS-ah an dah a. India miin ICS a han ni chu, Sap ICS-te inti milian thiam ai pawhin an inti milian zawk zia sawi te a awm ṭhin. A dik ang. India-ah chuan tun thlengin VIP, VVIP hnamzia kan la vawng nung hi maw. VIP Ration Card te pawh a awm kha maw!

India-in zalenna a hmuh hnuah erawh chuan, ICS tih ṭhin kha IAS tia thlak a ni a, service dang tam tak siam belh a ni. Khawvel ram tam takah erawh chuan, central leh state service hna nghet (security of tenure) system siam chu ṭul lova milian (bureaucrat) tihpunnaah an ngai a, an siam tawh hlawm lo. UK ngeiah pawh Crown Civil Service member chu tlem te chauh an awm tawh a, civil department bik chauh an enkawl tawh a ni awm e. Line department-tea thawk tur chuan, an line-a thiamna nei mithiamte an la zel tawh. Indiaah erawh chuan, central service leh state service te hi engkim thiama ngaih an ni chék a ni ang chu, civil department-ah chauh lo pawh, line department-ah te thlengin thawhtir an ni. Hei hi kal dan ṭha ber leh ṭul berin a lang hran lo.

Central service leh state service officer hna nghet (security of tenure) kalphung hi a awm lo a ni pawhin kan kal thei tho ang. Entirnan, Public Works Department (PWD) ah hian Director hna chauh ni lovin, Secretary hna thawk tur pawhin, engineer senior-te aiin IAS, MCS leh Central Service Cadre dangten an hriat zawkna tur thu leh an thiam zawkna tur thu a awm lo.

A nihna takah chuan, PWD Secretary hna thawk tur chuan, Bachelor of Engineering (BE) kum 4 zir zawh hnuah, internship kum khat tia, chumi hnuah engineer leh PWD admin hna kum 30 thawk tawh chuan, Bachelor of Arts (History Honors) aṭanga IAS tling a, thla eng zat emaw training neih a, kum eng emaw zat service neitu ai chuan, engineering hna leh admin kalpui dan tur a hre zawk em em ang. Chutiang bawkin, Health Secretary hna thawk turin, Bachelor of Medicine, Bachelor of Surgery (MBBS) kum 5 zir zawh hnua internship kum khat ti a, Doctor leh Hospital enkawl hna kum 30 thawk tawh chuan, Bachelor of Arts (BA general) a zawh hnua Mizoram Civil Service (MCS) tling a, thla eng emaw zat training neih a, service kum eng emaw zat neitu ai chuan, Health Department kalphung leh kalpui dan tur a hre zawk ngei ang.

Chuvangin State thuneihnaa tih theih a nih chuan, director chauh lo, secretariate-a secretary hna thawk tur pawhin, anmahni line ṭheuha mithiam leh senior-te aṭanga thawhtir zel ni se la, hmasawnna a awm thei zawk phian mai thei. Danin a phal chuan, Deputy Commissioner (DC) hna pawh hi IAS leh MCS ni loten an thawh theih lohna tur chhan a awm lo. Prime Minister, Chief Minister, Chief Executive Member hnate an thawh thiam chuan, DC vel hna te hi chu an thiam lohna tur a awm lo.

Central service-a tling kan awm lo avangin sun reng tawh suh ang u khai. Sawrkar hna a ni mai a, ram hmasawnahte chuan sawrkar hna hi chu mi tam zawkin an thlan duh ber hna a ni hran lo. Mipui tam zawk chuan mahni private business – company, factory, industry, etc te din an duh zawk daih. Chutianga private business din thei dinhmuna ding lote pawhin an zirna leh an thiamna hmangin private company, etc tea thawh an duh fe zawk a ni.

Chuvangin, state sawrkar meuhin ṭhalaite central service tlin theihna tur ngaihtuah a, coaching te buaipui a, scholarship te pek hi tih tawh loh a ṭha. Central servicea luh duhte chu anmahniin zir se la, coaching te kal se la, an in-exam ve mai tur a ni. Kan ṭhalaite lehkha thiam thei an tam tawh. Tling an awm chho zel mai ang.

Kohhrana “Central service kan tlin theih nan” tia ṭawngṭai thupui thawh ṭhinte pawh hi, Chung lamin engtin nge a ngai ang tih te ngaituah chian a ṭha hle. Central service tlin theihna tura ṭawngṭai ai chuan, kan ṭhalaite Pathian hriatna leh ṭihna nei a, dikna, rinawmna, thianghlimna, hmangaihna, finna leh taimakna nun an neih theihna turin ṭawngṭaisak zawk ila, Chung lam a tilawm zawk phianin a rinawm.

Central service-a kan ṭhalaite an lut ṭhin chu a ṭha. Lut an awm lo a ni pawhin khawvel tawpna a ni hran lo. Kan hloh a awm lo va, kan zahna tur chhan a awm bawk lo. An tlin chuan lawmpui ila, an tlin loh pawhin i pawm mai ang u. India mipui nuai 140,000,000,000 (1,400 million) te compete tur chuan, Mizoram mipui nuai 11 lekte tan chuan a hautak hle bawk a ni. Chuti chung pawh chuan kan ṭhalai lehkhathiamte an tling chho zel mai ang.

Central service leh state service te aia pawimawh zawk a ni lo pawhin, a tluka pawimawh leh ṭangkai chu, mahni line ṭheuha mi thiam, professional ṭhalai tam tak an chhuah hi a ni. Chutiang chuan state, national leh international private company, etc tea thawktu kan tam ang a, chhungkua, khawtlang, ram leh Kohhran tan malsawmna thlenpuitu an ni ang. Delhi leh state dangtea Mizoram State aṭanga central service cadre-te an awm chu kan state mite tan an ṭangkai ṭhin ngei mai. Chutih laiin, an awm lo a ni pawhin, kan tih turte chu kan ti thei tho ang.

Central service hi kan pathian biak palh ang tih a hlauhawm hle. Cenrtral service hi hna ṭha ber leh hna rôpui leh sang berah ngai tur pawh a ni bik lo. Sawrkar hna (public servant) pakhat a ni ve mai. Central service lo pawh hna ṭha leh ropui tam tak a awm tih hriain, kan ṭhalaite fuih phur ila, India state dang leh foreign hospital, university, bar council, hotel, airline, tourism, information system leh company dangtea professional thawktu ṭha tam tak nei zel turin hma i la ang u. Chutiang professional hna leh hna dang thawk duh loh leh thawk thei lohten central leh state service-ah te luh tum se la, an tlin chuan a ṭha hle bawk. An tlin loh pawhin a pawi lo. Beidawn tur a ni lo.

Hna zawng zawng hi a ṭulna leh a hlutna a inang tlang a. Hna ṭha zawk leh chhe zawk emaw, hna lian zawk leh te zawk emaw a awm hran lo. An pawimawh vek a, a pawimawh ber chu, eng hna pawh ni se, Pathian hre reng a, Amah ṭihna nen dikna, rinawmna, thianghlimna leh hmangaihna nunte nei chung a, taima tak leh fin taka thawk a, kan mawhphurnate hlen ṭheuh hi a ni. Chutianga thawktute chu ramina a mamawh thawktute an ni.

- Laiu Fachhai