'Thlí' hi innghahna tlak a ni em?

Tun hnai, hun eng emaw ti kal ta aṭang khan Mizoramah 'ZPM thlí' a tleh niin an sawi a; a dik a ni ang, Lunglei khawpuia inthlan leh Zemabawk LC inthlanah an chak chiang em mai. ZPM thlí chu Mizote chenna, a bikin khawmpuiah a tleh na zual niin a lang a; chutih laiin, district council lamah chuan a tleh na lem lo a, Chakma area-ah phei chuan a thaw her her chauh pawh a ni mai thei.

Ni e, inthlana chak tur hian 'thlí' hi a pawimawh viauin a lang a, thli tlehtirtu ber chu party-a awmna nei lo, neutral-te hi an ni awm e. Neutral tel loin, party chakna leh tamna ringawt chuan inthlanah chak a theih loh tluk a ni a, neutral thlí a pawimawh takzet.

ZPM thlí chu eng ang taka tleh ná nge? Tuna a lan danah chuan khawpuiah a tleh na zual niin a lang a, khawpuiah pawh Aizawl leh Lungleiah a tleh na lehzual tih a lang. Thingtlang lamah hian eng ang taka tleh ná nge tih erawh hriat thiam a harsa viau rih.

Chu 'thlí' chu Aizawl leh Lunglei bikah chuan innghahna tlak leh ngaihṭhatna tham a ni ang. Aizawlah ngat phei chuan mahni veng ṭheuh han ngaihtuah ta ila; neutral an tam ber tlangpui awm e. Kan vengah ngat phei chuan political party mi zawng zawng belh khawm aiin party-a awm lo (neutral) an la tam zawkah a ngaih theih. Chutiang chu Aizawla veng tam zawk dinhmun a nih pawh a rinawm. Chuvangin, ZPM tan an 'thlí' hi khawpuiah chuan ngaih tihṭhatna tham a ni.

Chutih laiin, thingtlang lam erawh a danglam leh hret. Zirtirtu chauh sorkar hnathawk awmna ang khuaah phei chuan neutral tak tak hi an tlem pharh mai nia. Party-a awmna nei an ni fur a, sorkar hnathawkte pawh tun hma aṭangin an âwn lam a hriat tlangpui. Chutiang chu khaw tam tak dinhmun a ni. Party mi leh sa neih tam lamah ZPM hian party lian dang pahnihte hi an la tiat lo viau mai bawk si nen; an ZPM 'thlí' hi thingtlang lamah hian khawpui anga ngaih tihṭhat nghal ngawtna chi a ni ve kher lo ang.

Party-a inlawm luh chungchangah lah, party lian pathumte hian mi eng emaw zat an lawm lut niin an insawi reng a. An lawm luh zat tak tak leh khawi party-in nge lawm lut tam ber tih hriat a har. Chuvangin, ZPM hi an 'thlí' avang hian an lungmuang sual ang tih ka lo hlauhthawnpui a. Sawrkarna chan an tum tak tak a nih chuan, 'thli' tleh nia sawiah innghat bur lo a, nasa zawka an ṭan a ngai ngei ang.

- Zomuani Patea