Compensation avanga inthikna thleng chu!

Tun hnai kum 10 vel chhung hian Mizoramah compensation ṭau a ṭet a ni hawt e. NHIDCL lam chuan kan beisei phak loh kawngpui ṭha tak tak an rawn siam ta chur chur a, kawngpui min pe pawh hi kan lawm tawk tawh vei nen; chumi tluk zeta lawmawm chu mahni Bank Account lama nuai nei ngai reng reng lo chhungkaw tam tak chhim hmar chhak leh thlanga miin compensation hmangin pawisa tel hlawm lian an la nasa a ni. He pawisa hi dan anga NHIDCL min pek a ni a, tun hnai hian pawisa dik lo, pawisa thianghlim lo, dan loa sum siamna anga sawi a tam em avangin ka rawn áng chhuak a ni. Compensation hi a phuten an lak hi dik lohna pakhat mah a awm lo tih kan hriat a ṭha a ni.

NHIDCL hian pawisa an ngah a, an hausak ren rual loh a ni. Mizoramah a vanneiten an huan lo ram leh in chu an kawngpui siamin a sut dawn avangin pi leh puten zángnadawmna kan tih mai compensation an la a, chu chu sawisel phet tum kan awm a ni. Politics thil anga sawi duh pawh an awm hial an ti, a pawi khawp mai hei hi. Mizote hi ṭapte ṭahpui thiam tak hnam kan ni a, lawmte chu lawmpui thiam lo kan ni an ti. Entirna angin sawi ila; Thingtlangah hian kawm chhak pa chu an in hmun an laih chhiat avangin kawngpui siamna tur aṭangin compensation nuai 30, nuai 50, nuai 100 hial an dawng thei a, a hmaa lo an neihpui ṭhin an kawmthlang pa kha chuan a dawng ve miah lo. Kawmchhak pa hausa thut, motor lei thei leh in pawh sa ṭha thei chu kawmthlang pa chuan thikin sawi chhiat an ṭan ta a ni. Dinhmun inthlauh thut vang a ni ber mai a ni.

Hetih lai hian kawngpui pal tlang tur ram lo hre lawk, politician leh sorkar hnathawk zingah compensation tur liau liau atana ram lo lei lawk fuh an awm chuan chu chu corruption a ni ka ti ve thung. Tun hmaa Rel kawng siam compensation an tih khan Officer rualin compensation an la sup sup an tih chu. Kha tah khan kawng kalna hre lawk khan an huan ni miah lo kha an leia pass lem (pass tak siam chawp?) an nei bawk si a, huan an neihna ni lo, thlawhhma pawh an la neih loh na ram aṭang chuan nuai tam tak an la a, chu chu corruption a ni.

Tuna Keifang Tuirini chho an siam mek hi sorkar hnathawk lamah kawng pui kalna tur hria, bengvar tak tak midang hminga pawisa rut ṭeuh an awm nual tih a ni. RTI Act ang hian chhui pawh ni se a taka latu ni lo ram nei tu hmasa hming a awm zel dawn a ni. Lawngtlai District pawh compensation vanga an buai kha, Serchhip District lam pawh hausa an tam phah hle a ni. Tuna an sawi hnaih Kolasib District Highway sial tur ah hi chuan khawtlang hruaitu aṭangin inhrilh fing tawh an tam a an huan leh lo chu pass an lo nei zela Politician leh sorkar hnathawk hausa tak tak, Kolasib District kawngpui ni si Aizawl District lamah compensation sum a lut tam tih a ni. Hei hi chu corruption a niin do tur a ni. Mah se la a tir a kan sawi khi chu a dawngtu dik in an ram chhuh sak an nih tak avanga NHIDCL aṭanga pawisa an dawn hi sawi hnawm tur a ni reng reng lo a ni, an sawi hnawm chuan thikna thinlung tenawm a ni zawk. Tih tak emah chuan an vannei a ni mai a, mi vannei itsik avanga an pawisa dawn tur dan dik tak chu dan lo kan tih sak zel chuan thikna avang leh pawisa avangin kan inhmu khaw lo zo dawn a ni. Dan loa pawisa siam tu pass lei khawm leh pass siam chawp mi thil ti thei te nen sawi kawp chi a ni lo a ni. Lawmte chu kan lawm pui mai zawk tur a ni.

- Vanlaltluanga