ZOFATE JERUSALEM HI

Zofa inti Israel-te ngei pawhin, Jerusalem Airport an thlen pawhin, chingal leh sauma chawm seilen an nihna ram, an Jerusalem hmasa chu an mang lamah an la hmu fo ang. An Jerusalem hmasa rap ve lova seilian, duhlian ṭawng hmang lova Hebrai ṭawnga chawm seilen ṭhangthar (New Generation) te erawh chu Zofate lakah an pil bo tawh ang.

Chutih laiin Zofa ni reng si, ṭawng hrang avang leh rorelna hrang avanga, Seki khawnga kan chàipui theihte erawh chuan, an Jerusalem hi thlamuan nan an la rawn hmang zel ang a. An lungkham ram, lungmuanga an chawlhna turin, he Zofate Jerusalem hi, ram luahtuten engtin nge kan sawngbawl dawn le?

HNAM HUAISEN KAN NI NGAI E: Japan rál beia Lushai Scout kalte khan, Ulhbun leh Tukuli bak hman thiam an nei lo. Japan ralin laipui nen an rawn sài dup dup laiin, thing bul phenah, "Mizo tlangval kan zám ngai lo," tiin, Japan ral kha an nawr let thei asin.

India ram ropui tak pawh hlau lova ui hum tiat leka cheng Zofate khan, "Darkar 24 chhung kan kutah Mizoram hi a awm chuan, UNO-in min pui ang," tih slogan hmangin, Ulhbun leh Tukuli nen Vai sipai kan do ngam a. Hnam sipai hruaitute thinlungah, Flag Var lo lang sek lo phei se, mi huaisen rual an mankhawm takte duh dana kal ni phei se chuan, hei aia State ṭha lehzual hi an rawn kap chhuak mahna.

THLIARKAR RILRU: Ṭawng hrang hman avanga inunauna zung hai chhuak pha ve lote'n, ṭawng thumal inang 40% chu kan hmang ṭhang reng tih hre chhuakin, khaw hrang, ram hranga awm ni mah ila, intawhkhawm hun a lo thlen apianga unau inkuangkuah thei kan nihna thisen chuan min zawm leh tho ṭhin tih hria ang u.

A Mizo lo, Mizo ka ni lo, han ti siksawi kual vel mah ila, he Zofate Jerusalem leilung hi kan rah tlan phawt chuan, Mizo inti lo a inti Mizo a, Mizo ni lo titen an hmuh Mizo hun a awm leh tho tho. Thisenah kan inhlat tlat lo a lawm. Vai Mizo ṭawng thiam, Mizorama seilianin "Keini Mizo ho," an tih ve ngawt ai chuan, Zofa in hrang chang tawh, Zofa nihna hriaten, "Keini zofate hi," an tih nen chuan danglam tak a ni. Thliarkar rilru hi kan thai bo hunah, Mizona hian min la kuahkhawm tho tho dawn. Kan inhmuh foreigner-na hi a la bo tial tial ang.

CHU JERUSALEM CHU: A tlang a mawi, a ruam a rai nuam, sik leh sa inthlak a danglam thui lo. Ruah van tla a dawng ṭha. Sawngbawl chawp ngai miah lova ramngaw awmsa. Ram hring nuam leh mawi, Siamtu kut chhuak chentute hian, hmangaihna leh lainatna nen nge he ram hi kan enkawl a, a thau chiah sàwk turin kan hmanhlel zawk?

Intifing nge kan nih fing kan inti? Ram kan hmangaih nge hmangaih angin kan insawi? Luah tlak leh chen tlak ram ṭhaa min khalh luttu, chung Pathian mit hmuhah, he ram min pek hi hmangaih takin kan enkawl niin kan hria em?

Eng thinlung pu nge kan nih tak? Dikna nena rorel hi kan zo tak tak dawn em, hausa leh khawsa thei tam zawkte hian diknaa rolrelna chu kan hlau mai lo'ng maw? Mi retheite thlavang hauhsakna hian, mi thiltitheite a hrut na tawk dawn si a, chu rorelna chu mi retheite chauhvin em ni nghakhlel ta ang?

RAM ṬHA LEHZUAL KAN CHAK EM? Chhim lam hi kan kawtchhuah ni turin a insawngbawl mup mup mai a, khaw chhak leh khaw thlang pawh kawng zau ṭha tak a insial ruih tawh mai. Sairang thlengin Rel a lo lut bawk dawn. Vairengte aṭanga Aizawl 4 lane-in a pawh ruih bawk dawn. Heng kawng sial zawng zawng hi a zawh hun chuan, sumdawnna lian tak a lo lut zut zut tawh dawn a ni. Chu chuan ram ṭha lehzual nge a hrin ang a, thunun zawh loh sum umna ram, nun chhiatna ramah a chan zawk ang em?

He ram thlai ṭhatna hmun hi hai chhuah a nih a, a dehralna kawng sial a nih hunah, kan mi ngaihsan zingah farmer-te an tel ve nawk tawh ang a, BPL tlemna ramah he ram hi a din chhuah hun chuan, Zofate Jerusalem hian a nihna dik tak a la pho chhuak ang. Chu hun chu i thlir pha ve em le?

INRALRINA DAR KAN VUA E: Hmasawna ruhrel a induang chhuak mek, Zoram thar chu a la piang ngei dawn, chu ram thar lo piang turah chuan a dawh thleng i dawh fuh loh zawngin ram duhawm leh nuam ni tur kha, anchhedawnna ramah i kai lut thei tih inhria la, fing tak leh Siamtu Pathian bel chung zelin kal ang che.

TLIPNA: He Zofate Jerusalem hian Zoram thar a la hring chhuak dawn a, a unaute tam takin an la bawh ruih ruih bawk ang. A innghahna lungpui chu Chung Pathian a nih reng loh zawngin, thlaler ram ro, tuihna awm lohnaah a chang thei a, Golden Triangle hri chhiain a luahlan thei bawk. Zofate Jerusalem hian eng nge min thlen dawn le?

- Lalrinliana Colney