ZORAM KHAWVAR A HNAI LO

Kan Vangkhaw tual nuam (Mizoram) ah hian Politic khawvar lo thleng tawh se, tiin duhthu lo sam chiam ṭhin mah ila, a la hnai lutuk lo niin a lang. Sawi anga awm ngai lem lote pawh kan en liam zel a, chutiang mi chu kan party ngainat zawng hruaitu an nih chuan kan rilruin a ngaidam tlat niin a lang. Kan rilru hian ṭhat leh hmasawn hi chak angin lang mah se, kan tlin rih lo a ni ber mai.

1. Inthlan dawn apianga Ramri leh Chakma foreigners chinfel kan tumna pawh kum 30 zet a lo tling ta. Ziak leh sawi lama thil ṭha duh, a tak taka tih tum chuang si lo party leh politician awmkhawm kan ni ber e.

2. Assam Riffles sawn chhuah te pawh vote hmuh tam nan hman kan la tum reng a, a hrin chhuah chu Dawt sawi Grade tisangtu leh nuihzat hlawhna mai a la ni.

3. Dikna chu Luipui anga luantir chung leh felnate pawh luipui kang ngai lo anga luantir kan tumna te pawh, thu bak a pèl thei lo. Hetih rual hian, Corruption a zung chawpa phawia phoro kan tumnate pawh a thamral a. Tunah chuan ṭhat tum ngai hauh lo nia kan hriat hnua mawngsawh dawta kan paihte pawhin zak hauh lovin 'ṭhat loh theih lohna bawm' rawn tah tharin, mipui bum nawn min tum mek bawk. Hengho hi an ṭhat tak tak ring pawl an awm leh tho zel nia!

4. Pathian leh kan ram tan tih thupui hi, Independent sual nan khan, inṭhuikhawmna thu mawi a tling awm e. Heng thilte hi India nena inremna siam hnu hian hman zui tawh loh tur (Write off) zinga tel a ni chungin kan la leklam hle a, inremna thuthlung bawhchhiatna nasa tak a ni.

5. Tuna kan ram hruaitu leh hruai tum (Party tam zawk) hi chuan, ram mipui tih changkana an mamawh pèk ai chuan, an party leh anmahni chiah an ngaihtuah tih hi hnial rual loha thudik a ni.

Kan ram hi INC leh MNF hian kum 35 chuang min hruai ta. Hetiang a nih mek lai hian, mipuite chu Vawkrêka fate ang zung kan la ni reng. Thlohpui rorelin (mumal lo takin) min kaihruai kum tin a, mipuiin harhchhuah kan tum chuang lo.

Isreal fate vahvaihna thlaler kha, a hnaihna lamah chuan Ni 14 kal chauh ni awmin an sawi a, keini pawh hi Kum 1984 aṭanga (Remna nei tura rilru kan siam kum) aṭanga chhut chuan kum 40 kan hmang liam dawn ta. Pumpelh kawng nei ṭhin hnam hian eng ngati nge, Politic kawng kual hi kan ngainat viau si le?

Ram tiam (Kanaan) thleng turin kumin inthlan chu rilru fim pu chungin vote thlak ang aw.

- Vanlalhuma Kawlni