Rev Chuauṭhuama thusawi ka hmuh ve dan
Mizorama Pastor thawm na tak Rev Chuauṭhuama thusawi tun hnaia Aizawl Hmar Presbytery Ṭhalai Meet, Sihphir (Aizawl East I CM Bial) kha ka lo ngaithla ve a, haw duh tan chuan huat tur a tam khawp mai. A thusawina hmun kha Sihphir a nih vang pawh a ni thei a, Chief Minister biala thu; rum tak tak a sawi khan sawi zui a hlawh a, ṭhenkhat chuan anchhia an lawh mawlh mawlh chu a nih kha.
Sermon pahnih kha ka ngaithla chhuak a, Pastor thusawi naran chu a ni lo a, a ngai haw duh tan chuan huat theih a ni a, ngaihtuah chian chuan a hua hua chu mahni mawng an hlim tihna a ni a, party tin kha a dim lo va, amah Rev Chuauṭhuama hian tum nei rànin thu a sawi lui a nih rinna ka nei a ni. Rev Chuauṭhuama hian a thusawina hmun a hria a, a sawina hun pawh a hre chiang a, kum tawpah kan inthlang dawn tih hre chungin ṭhalai rual thinlungah tuh tum neiin a sawi a, chu a thusawi chu a hriam hràk loh chuan an ngaihven loh hlauin tihluihna nen a na thei ang berin a sawi a, a nghawng nat danah hian a tum tak a hlawhtling niin ka lo ngai a ni.
Pastor dang thusawi hi chuan politician hi an vái hma a, an sawi pawhin a hming hi an lam ngai mang lo niin ka lo hria a, Rev Chuauṭhuama hi chuan Party hming mal a lam a, mi a dem dan hi a chiang em em a, hei hi pawm an harsat lai chu niin ka hria. Rev Chuauṭhuama hian Congress leh MNF a bei bika a lan chhan chu an sorkar tawh vang a nih a rinawm a, ZPM pawh dim chuang lovin ZPM Bial Viltu ruat pakhatin Zu a support nia a ngaih avangin a lim erh bawk a, tu mah thliar lovin a bei hmiah hmiah a ni. Rev Chuauṭhuama hi ngaisangtu ngah tak Pastor a nih lai hian, pastor zingah hawtu a ngah ber hial thei ve tho bawk a, Mizo pa hlu tak a ni tih hi chu a sawi chhetu lam pawh hian an pawm a rinawm a ni.
Rev Chuauṭhuama thusawi ka ngaihdan dik takah chuan Party lian awmsa pahnih hi chu a side vak lo em aw, ka ti a, siam ṭhat duhna thusawi a nih rual rual hian MNF leh Congress hi chu a ngaina lo tih chu a hriat a, hei tak hi Pulpit-ah a sawi avang hian sawisel zui a hlawh niin a lang a, he thilah hi chuan amah Rev Chuauṭhuama zuk dem ngawr ngawr aiin kum 40 dawn Mizoram kaihruai tawh Party pahnih hi an demawm zawk a, sawisel thiang lo anga inngai ang maia Rev Chuauṭhuama haw tlat an awm chuan a dik lo zawk a ni. Rev Chuauṭhuama hi a mimal hian kan inhre lo va, kan inhriat pawh ak ring lo bawk. A hnathawh hi chhunzawm zel se ka ti a, Party tin hi khak ngam se; Pastor lamṭang duha thusawi him deuh deuh ai chuan kan ram hian a mamawh zawk a. Pastor huaisen Rev Chuauṭhuama tiin ṭhangtharte chuan an hre reng tawh dawn a, chu chu Pastor-in a thih hnua a hnutchhiah theih ropui tak niin ka hre ve tlat a ni.
- Lalhmangaiha