Bial inchuh ka hriat ve chin chin - II

MLA inthlan lo awm tura ka ngaihdan leh mi titi lakkhawm satliah ka ziak a, ka beisei phak bakin miin an lo ngaihven a ni. Ngaihventu zingah hian pawm an awm a; pawm lo an awm a, pawm lo mai ni loa haw lek leka min fiam an awm a. Heng thute hi politics ngaihdan leh pawm dan nena sawi pawlh mai mai a nih avangin duha rin theih duh loha rin loh theih a nihna lai hi i hmu fuh ang u. Ṭhiante min rawtpui ang hian a Part II ka ziak leh a ni a, a Source hi chu kan sawi thei lo va, tlang titi leng vel, a dawngsawngtu ngeiin min hrilh, an sawi lai pawh ka lo hriat ngei, leh ka rin thu satliahte hi a Source chu a ni.

A fing hmasa pu RRRa:-

MNF hruaitu chin hi chu ZPM anga duh duha ṭawng ve puat puat lo, Party Discipline nei ṭha an nih avang hian an chhungril buaina pawh hi mi nawlpui hriat phak a ni lo chungin tun lai hi chuan thup sen a ni ta bik lo. Minister ni lai zingah Bial zawng pathum pali an awm tawh hi chuan a chhung hi a buai tih loh rual a ni lo va, Assembly Speaker an discipline ngam loh chhante pawh ziah tel kan tum ang a. Chief Minister Bial hnihna nih hi Bial an en kualte hian an chak tlat lo hi eng vang nge ni ang? tih zawhna a awm a, vice president aṭanga chawlhtir Pu Tlanghmingthanga chuan din tumna reng reng a neih tawh loh lai hian, senior zingah Pu Tawnluia leh Pu Lalchamliana din tum thar leh chhan pawh kan rin dan kan sawi dawn a ni.

Aizawl East II Bialtu leh MNF Minister zinga lar ber Pu Robert Romawia Royte chu Hachhek lamah a kal dawn tih ka ziah khan ring lotu an tam a, tunah chuan Hachhek Biala MUP te Aizawlah tour a buatsaihsak tih an hriat bakah; khu lam khaw lamin a motor an hmuh tàk sek avang hian a chiang tawh a ni. Hachhekah hian Congress MLA ṭha tak Pu Lalrindika a awm a, ZPM lam Candidate hi chu a langsar lem lo va, RRR leh Rindika straight fight ni dawn ta se, a ngaihnawm tur chu a ni. Pu RRRa tluka mahni bial chei ṭha hi a ram pum huap hian an awm dawn em ni? tih zawhna hi min chhang teh u. Chite lama Convention Centre, Armed Veng Field Phullem, Tuithiang leh Chhinga Veng inrina lei, veng chhung inkalpawhna kawngpui hrang hrang hi en ila Bial chei ṭha ber award awm se, hlan chi a ni.

Pu RRRa tluka damlote kan taima (pawisa pawh a pe tam ang) an awm em? Pu RRRa tluka chhiatni ṭhatnia bengvar hi an awm em? tih pawh hi min han chhang dawn ta ula, bial vil ṭha No. 1-a tling tura ngaih theih a ni. Pa taima a nih bakah pa fing a ni bawk a, bial tan pawh chhenfakawm a ni. Mahsela, a bial sawn a tum an ti hi a mak kan tih ka ring a, chhut chian chuan Pu RRRa hi a fing hmasa zawk a ni leh daih thei a ni. Bial vil leh damlo kan, mitthi ral tih hian mark a pu vak lo va, a MNF nin hrim hrim hian khawpui hian an ning tih hmu chiangtu chuan Hachhek a pan nalh mai. CM bial tluka bial hmasawn leh pawisa lalut tam an awm lo chung hian Local Council inthlanah an Nil tawh a. Sap ṭawnga "The Writing is on the Wall" an tih kha a ni tawh a, MNF hi Aizawl hian vote tlin an tum lo tih hi Pu RRRa ang mi fing chuan an lo hmu thiam zawk a ni. Hachhek tan pawh a tlin chuan bialtu MLA ṭha tak a nih leh ngei a rinawm a, pa chak leh hmangchang hria a nih angin bial tan malsawmna a nih zui a rinawm a ni.

MNF hian Aizawlah MLA an la nei nual a, heng MLA zahawm tak takte tan hian tun hi inngaihtuah hun a ni. CM pawhin a bial East I him lova hriaa Bial dang vil kawp tur a melh lai hian; tute mah hi an him a rinawm loh avangin tun hi bial insiam rem hun a nih a rinawm a. Politics ṭawngkam "Bial tlanchhiatsan" hi chu opposition lam puhna a ni a, tlawmah lak tur a ni lo va, Party chuan ami ṭhate dinna tur leh tlin theihna tur zawngin "Bial Insiamrem" hi a kalpui ṭhin a, Indian Politics ah pawh kan hmu reng a ni, insiam rem hi.

Politics Titi ah chuan Pu Rinliana'n Pu Tawnluia a chhuahchhal kha, "Tuichang bial inchuhna" an ti daih nia. Pu Rina hi Tuichanga Congress MLA hlui a ni a, MNF a zawm hnuah Chalfilh lamah kalin din nawn tumna a nei lo va, a duh ber Tuichang a nih avangin Pu Tawnluia Department chhunga Nuai 100 ziah ral a sawi chhuak kha a tihpalh ni lovin, a tih luih liau liau niin an sawi a, Mizoramah an ngaithla leh dawn tih hre chunga a sawi a lo ni. Tichuan, Pu Tawnluia leh MNF Party chuan Nuai 100 ziah bo chu an ngawih bopui a, Pu Rinliana Sailo an discipline ngam loh chhan chu Tuichangah Pu Tawnluia vote a kiam an hlauh vang an ti daih a, Politics hi chu a ril hle a lo ni.

Ṭawi Bialah hian Pu Lalrinenga Sailo aiin Pu VL Kroshnhehzova an sawi ri ta a, ka article hmasaa ka ziah kha chuan Social Media lamah pawh a la darh vak lo a, tun hnaia kan hriat chu Pu R Lalzirliana Bial fannaah Pu Kroshnehzova hian a ṭawiawm a, Pu Lalrinenga zawk pawh a kal ve leh a, Ṭawi Bial inchuh hi MNF chhungah hian a na tawh hle tih a ni. Hei aia rilah hian Pu Zoramthanga chawlh hnua MNF Leadership fight hi tunah hian a kal ṭan tawh a, Dr Thangtea chu a lang tawh lo tih a ni. Pu Tawnpuia, Pu Lalchamliana te hi a MNF chhungkuaah pawh chawl tura an sawi kan hriat ṭhin kha tun hnaiah hian an fit chho leh ṭan a, Party pui aṭangin mi thar indah ngamna Election a nih loh avangin hming langsarsa ding tura nawr an nih angin an la tum leh dawn tih a ni a. Pu Tawnluia hi kum 80 a ni dawn tawh chung hian pa fing tak leh smart tak a la nih thu hi an sawi chho ṭan a, hei hi thu dik tak niin, pa smart tak hi a ni.

Aizawl West II Biala MNF Candidate tura sawi nikum aṭanga thilpek pea bial fang tawh - Chief minister adviser Er K Lalsawmvela hi fing tura rin a ni a, mahse Pu Lalthlengliana hian chance hnuhnung ber a nih avangin a din mai a rinawm tih an han sawi thar leh a, hei hi chu a thingpui dawr titi mah mah lo maw? tih keimah leh keimah ka inzawt a. Aizawl South II hi MNF hian an la tifel thei mai lo bawk a, sorkar hnathawk Kohhran upa pathum an sawm chhuah zawh loh hming kan thup hi mimir chuan an lo hre tawh tho a, ZPM MLA hi a tling leh nge nge dawn a ang a. Congress Treasurer thar Dr Lalmalsawma hian Aizawl West II beidawnsanin South II hi a zuan dawn an ti bawk a ni. MNF zingah Chalfilh bial a ruka inchuh a taka lang chhuak ngam si lo leh, Chief Minister bial hnihna tih te sawi a tam laiin, Minister pahnih hming pawh a lang leh tho a. MNF hian Tuipang bialah Congress MLA ni lai Pu KT Rokhaw hi Candidate tura sawm luh an tum, tihte pawh a awm a ni.

Congress chhungkaw buaina:-

Congress chhungah buaina lian tak a awm tih chu thup ngai lovin Pu Zodintluanga banna lehkhaah khan chiang takin a inziak a ni. Congress ti-Congress-tu leh a ziding kan tihte chu Pu Lalsawta hian hnawk a lo ti hle tih a lang zel. Pu Lalsawta hi pa dik duh leh ṭha taka kal duh a ni a, mahse mahni chhungkua tiphel zawnga dik a duhna kawngah hian; a hmaa a thurualpui thote kha Congress dik loh chhan leh tlak chhana puh ang maia a paih zel chuan; Congress hi tho leh tur awm tawh lovin a tlu chhe hlen thei a ni.

Congress hian an Party zahawmna pawh hum zo tawh lovin Candidate atana an sawm pakhat chu Vice President-ah dah an tum tih hriat hian Congress lo ni ve ngar ngar ṭhin leh Grand Old Party inti tan chuan thil mak a ni a, ZPM-ho kalphung mumal loa puhtu Party hian kalphung an nei lo zawk a, Party President chuan mi dangte rawn lem lovin thutlukna a siam hmiah hmiah tih Pu Zodintluanga ziah kha a lo dik hmel ta. Pu Zodintluanga sawi danah kha chuan Pu Lalsawta Congress President a nih hnuah Congress innghahna lungphum sàwi nghìn a ni a, tih chhiat mek a ni a, an party rorelna sangin an lo relho ṭhin zawng zawngte pawh, President-in mi pahnih khat lek rawnin thutlukna a siam ta fo a ti tawp mai. Dictator-ah a puh a ni ta ber mai a, Treasurer sawi a nih bawk si avangin a dik hmel hle.

Congress-ah hian MLA leh Minister hlui zingah Pu KS Thanga, Pu John Rotluangliana, Pu Robiaka leh hruaitu ṭhenkhat hi ngaithei lo an awm a, hei hi President lamṭang an nih avang hian a chhunga inhrui pawh hi a na tawlh tawlh a, Pu Sawta hian a rem thiam loha Congress Exodus a thleng a nih chuan, president sual vang ni lovin mi a huikhawm thiam loh vang leh, dik a duh luatah a patling tawk loh vang a ni dawn a ni. Pu Zodintluanga nau Pu Mavala chuan Candidate nih a tum lo an ti a, Pu Zodintluanga te u hi Pu Lal Thanhawla monu Pi Rosie a nih bawk si avang hian, Congress hruaitu thar hian Pu Hawla lam hnai hi an ngaithei lo ta tihna a ni thei em? Chutih lai chuan Pu Hawla nau Pu Lal Thanzara chu Pu Sawta Vice President a nih si avangin a chhungril tak hi zuk hriat a harsa. Pu Sawta tan chuan mahni hmelma sawm luh mah a harsat avang hian mahni Party mi leh sa leh, a bikin hruaitu chin hi chu chân loh dan zawn hram hram a ngai a ni. Congress hi Party ruhrel lian leh hlun, mi hausa tam na ber party a ni a, chutiang dinhmuna an din theihna tura an hotu lian Pu Hawla a chhuah ruala 'ṬHAT LOH THEIH LOHNA BAWM' siam an tum hi chu Pu Hawla kha ṬHAT THEIH LOHNA tiin an puh tihna a ni si a, Congress siam liantu ber kha an ṭhat loh chhan puhtu Congress Leadership avang hian a chhungril a khi mek a ni.

Congress President hi pa dik leh dikna duh a ni a, insiam ṭhatna khua a la tlai lova, a awmsa chhe veka ngaia sawm luh chawpte dinhmun ṭhaa dah a, Congress Veteran rual vawm bo tumna hi an tih tawp loh chuan Manipur, Nagaland leh Arunachal iangin Mizoramah Congress hi kan phum bo hlen thei a. Congress mihlun tan tun hun hi au chhuah hun lai a ni a, a tlai hma hian Congress hi a la chhan theih a ni. Kum 2023 ah rorel lo mah se inpumkhata an awm chuan 2028 chance a la bo lo. Dik tum luata mi dang huikhawm thiam lo President hian a tikeh darh a nih chuan Mizoramah chuan Congress hi tun hma sawina atan an hmang tawh ang.

ZPM Party hi:-

ZPM hi Mizorama Party phúr ber an ni a, an boruak pawh a ṭha a nih hmel a. Bial viltu an inruat hma lutuk hi an chhiatpui rinna ka nei a, 'mahsela thil en hian an ṭhatpui hlauh dawn a nih tak hmel a, rin ai tak hian ZPM aṭanga titaua party danga chhuak ta sawi tur an la awm lo. Party inrelbawlna nghet lem lo an nih avang hian viltu an tih Candidate an puan hnu khan bial vil ve dangte kha an input chhuah sup sup rinna ka lo neih chu a thleng ta lo. Party mai ni lovin pawl reng reng hi discipline a awm loh chuan a len poh leh a tluk chhiat a hnai a, ZPM pawh hi discipline nei lo anga ka hmuh avang hian an lian tawh si a, an keh mai hlauhthawnna ka lo neihpui a. Mahse sorkar rim a nam ve tàk deuh vang pawh a ni fahmiang; chhuah tum pawh chu kan zuk hre phak lo va, an inthlém dam liam liam a nih tak hmel. kan hriatpui ve si lo.

ZPM hian Social Media hi an tawngpawng zuam a, an ta emaw an ti hman a, a lo ni der si lo va. Anmahni ṭantu hlir an au hmasak avang khan mi dangin an beih let hi na an ti em em a, ZPM ṭantu ni lo hi Social Media ah hian awm ve thei lo emaw an ti a ang a, mi zawng zawng awmkhawmna a nih ang hian miin ZPM an beihin an buai chuk hi an la puitlin lohzia tilangtu a ni. ZPM hian Lunglei leh Champhai lamah bial buai pakhat ve ve an la nei a, Mamit lamah pakhat an la nei bawk a, hei hi an chinfel theih chuan mi rin aia hmain thapui an thawh thei dawn a, an chin fel theih loh chuan party thar ni bawk, a chhunga inpawhna awm bawk a nih chuan ṭan a sak ve fat ang. Thlir thuak hi chuan Aizawl leh Lunglei hi chu an hui duak hmel a, Lunglei piah lam leh tlawng thlang lam hi chu an beuh ve fe chu a ngai a ni. ZPM hi buaina puh nasat ber kha an ni a, tunah tak hi chuan an buai lo zaw ber a ang a, party insawh ngheh lamah chuan an taimak fàl loh chuan party mi nghet an la nei tlem a, hei hi inthlan dawnah chuan a pawimawh ṭhin a ni. Part III lamah chiang zawka ziah kan tum leh dawn a ni.

- Lalawmpuia