Pastor pakhat thusawi

Presbyterian Pastor Revd Chuauṭhuama thusawi chuan Zoram khawvel a hneh hle mai. Politics khawvel phei chu titi dang a leng thei lo a ni. Revd Chuauṭhuama thusawi kha ngun taka kan lo ngaihthlak ve danah chuan a duh ve bawrh bawrh a tih theih rualin a sawi tur tak a sawi a tih ve theih bawk a ni.

Revd Chuauṭhuama thusawi kum 35 chhung Mizoram enkawl tawh tuten intodelh an hlat thu a sawi hi a dik hle a ni. Kan state dinhmun pachhe tak hi a chhan chu kan thatchhiat vang a ni bîk hauh lo va, kan state enkawltute hian intodelhtir min tum lo a ni. Congress khan Rs 100000 kha an sem a, NLUP kha lo ṭha se chu Rs. 100000 kha din chhuahpui tawh tur a nih laiin NLUP awm hnu pawhin kan intodelh lo a ni. Tichuan, MNF chuan SEDP min han sem leh diat diat a, hei hi chu Rs 25000 diat diata sem a nih avangin intodelh a hla lutuk tlat.

Kan sorkar budget a kal ralna hi en ta ila, a sema sem hi thil ṭha chu ni se kan intodelhna tur pawisa kan sem zo tawh a, kan intodelh si lo a ni. He kan intodelh loh chhan Revd Chuauṭhuama sawi chhuah hi kan hua a nih chuan kan nihna tak miin min rawn hrilh a, kan hua tihna a ni. Kan ram hi kan khawngaih asin, kan ram riang te a nih hi.

Revd Chuauṭhuama sawi ka pawmpui loh ve thung chu Zu chungchang kha a ni a, zu a huat em avanga Hnahlan Grape thleng thlenga a hmer tel kha chu a over hret zawk a ni. Hnahlan ah chuan miin pawisa lakluhna atan an hmang a, eizawnna a ni a, kuthnathawktu tán hnathawh man hmuh letna a ni. Kuthnathawktu hlawh hmuhna grape wine Siam thleng thlenga beih hi chu thil ṭha lo a ni. Hei hi chu Pastor thu mah ni se, kei chuan ka hnial ve tlat dâwn a ni.

A dang lehah chuan hei hi kan sawi chhuah loh theih loh a awm a, Revd Chuauṭhuama hian kan ramah hian sorkar awmsa a sit kan tih rual hian thudik a sawi chhuak ve tlat a ni. Kan hotute hian Nuai 3 min tiam a, intodelhtir min tum a, pawisa min pe tlem si a, intodelh theih a ni tawh lo va, Pastor-in sorkar a bei kan tih hian Pastor-in thudik a sawi pawh a tih ve theih tho a ni.

- Lalchhandama Hnamte