MIZORAM HMABAK ENG NGE NI DAWN LE? -Party 3 te Flagship Program thlirna-
Hei, kumin 2023 November thla khian MLA General Election chu kan nei dawn a nih hmel a, Pol.Party tin ten Mizoram mipui tam berte hamṭhatna tur nia an ngaih- Flagship program an duante chu an rawn zuar leh ngei dawn a; mipuite chuan kan tana ṭha tur nia kan ngaih Policy neitu Party chu kan thlang tling leh ngei dawn a ni.
Kum 20 lai rambuai kan nih hnu 1986-a Remna leh muanna kan neih aṭang kha chuan, Economic Rehabilitaton/Economic Policy ṭha tur nia kan hriat neitu Party apiang lalna kan chantir zel a ni ber a. Kumin inthlan hunah pawh hian, khuarel chhiatna Covid-19 tuar zo hlim kan ni bawk a, Economic Policy ṭha nei nia kan hriat Party bawk kan thlang tling leh ngeiin a rinawm a. Tichuan, kan Party neih zinga a lian 3-te Flagship Program te hi thlir(zir)-hona nei ila, tichuan ram mipui tam berte hmabak tur kan hrethiam thei dawn a ni.
a) CONGRESS Party chuan TANGPUIH, hna thawk tak taktute, mahni hna thawka ṭang tak takte hnena Rs. 200000/- pek zel chu Flagship Program an neih a nih hmel a. He Policy hian ṭhatna tur leh ṭhat loh theihna tur a nei ve ve awm e. Congress hian ‘kan ti ang’ an tih chu an ti deuh zel a; tin, thawk tak takte hnena puihna Rs. 200000/- pek chuan hlawhtlin a awlsam ngei dawn a ni. Mahse an term hmasaa NLUP an sem khan Party mite hnena sum sem mai anga a ngaih theih a, bakah an term tawp lam phei kha chuan Sawrkar Official te khan an duh dana sum an semte khan mamawhtu mipui nawlpui a thleng pha lo a ni ber a. Tun ṭumah hian an Policy enkawl (implement) dan tur azirin a hlawhtlingin a hlawhchham thei ngei ang a, tichuan heng TANGPUIH Policy hian Zofate kawng dik min zawhpui dan tur engtin nge ni dawn le?
b) MNF hian SEDP bawk hi Flagship Program-a hman zawm an tum niin a lang a. He SEDP hi a bua ziak ang leh an zawrh dan ang kha chu Policy leh Program ṭha em em, ram Economy chawi kan dawrh theihna tur pawh a ni ngei a. SEDP tihlawhtling ngei turin MNF sawrkar hian Development Board 10 chuang lai din mah se, an chet ṭan dawn laia Covid-19 thlen avangin heng Board te pawh hi hna an thawhtir hlawm lo a ni ber a. Project based (hna thawh mil zel) a thawktute pui tura insawi ni mah se, an term tawp dawn lamah NLUP sum sen ang deuh maiin Rs. 25000/50000 te an sem thei ta chauh mai a. Tin, an SEDP bua inziak lam ai mahin cheng 300000/- sem tum leh sem lawk si loh chu mi tam tak sawisel a hlawh hle tih kan hria. Chutih rualin, Covid-19 thlen avanga sawrkar Budget sum vbc 3000 vel kum 2 chhung an dawn loh avang leh, chhan dang dang avangin an tum angin an che thei ta lo a ni fahmiang. Chupawhnise, SEDP atan aia hmun dang leh contractor ṭhenkhatte hnena sum luantir awm fo nia thuthang awmte chuan SEDP ngai pawimawh tawk lovah mi tam takin kan ngai a ni. Engpawhnise, tunah chuan khuarel chhiatna te thleng tawh lo va, tha thar leh boruak thara he SEDP hi enkawl zawm an tum a nih chuan engtin nge enkawl (implement) an tum, an duan dan leh sawi dante azirin mipui hian ngaihdan kan siam thei dawn a ni mahna.
c) ZPM chuan BANAKAIH, kuthnathawktute puih an ngaih apianga ṭanpui zel chu Flagship Program an neih ber niin a lang a, tin, chu bakah thlai thar chi 4 emaw chu man ṭha tawka leisak vek tumna an sawi uar hle bawk a. He/Heng policy hi tihhlawhtlin theih chu ni ngai se mipui tan chuan ‘Pheichham man’ ang thaw nihna tur a ang thei hial mai. Amaherawhchu, Zoramah hian banakaih (ṭanpui) ngai tur kan tam tur zia chhût chuan sum mamawh tur chu NLUP leh SEDP atana hmante aiin a tam hial mai thei a; chu bakah thlaithar chi 4 vel leisak zel dawn chuan sum dang a ṭul tam dawn em avangin World Bank/ADB adt. aṭanga pukte pawh an ṭul ngei mai thei a; tin, sawrkar hi chu thlaitharte lei ṭhintu nih a ṭhat lohzia Zoram hian kan lo tawng tawh kha a ni a. Chuvangin, tum dan dang, mi thiamte leh Party dangte pawhin an lo sawi ang deuh thoin Business Farm leh Company rintlakte nena in-tie-up/thawhhona siam a support price te hmanga hmalak tumna pawh a ni mai thei e. Engpawhnise, he ZPM Party Flagship Program te hi ṭhatna nei leh ngaihzawnawm tak, implement dan tur erawh ‘mumang ram’ ang deuh a la ni a, Flagship program Banakaih dan remchang ber chu ‘sum sem’ tho a nih a rinawm. A tak ramah engtin tak enkawl ang maw?
Aw le, heng Party 3 te Flagship program te hi dik tak leh fel taka enkawl chu ni hlawm se, ram mipui hian (leh ram hian) kan ṭhatpui dan tur a awm vek a. Tu party pawh hian lalna chang se, an policy pui ber hi rorelna dik taka an enkawl ngei beisei phawt mai ila. Zoram hmabak tur chu kan thlan lalte'n an Flagship Program an enkawl dik leh enkawl ṭhat dan (rorelna dik kenkawh) ah a innghat thui hle dawn a ni.
- H.Lalhmachhuana, Zobawm In.