MPCC CHHUNGKUA BIHCHIANG ANG (Old Guard Party)

Mizoram Pradesh Congress Committee (Mizoram Congress Party) hi Organisation & Administration ṭha, Policy & Manifesto ṭha, Strategy sang, Election hmachhawn thiam nia Party dangte entawn ṭhin a ni. Congress Party symbol hmanga MLA tlingte pawh an tlinna bial aṭanga khin thlak/paih thlak an khirh thei hle. Grassroot politics aṭanga mipui zinga chengin, bialah leh khawiah pawh an luang hniam a, Assembly/Parliament chhung thlengin Legislator ṭha nih pawh an thiam ṭhin.

Eng ngati nge heti tak maia MPCC chhungkua buai a, MPCC Treasurer Pu Zodintluanga’n Treasurer a nihna banna a thehluh tak hial? a banna thu leh MPCC President, Pu Lalsawta LPS Pu Vana Interview na thusawite atangin, lo sawi (analyse) ve ila.

Pu Zodintluanga’n (Pu Mama) MPCC Treasurer a nihna aṭanga banna a thehluh chhan points – Congress Party innghahna lungphum sawi nghina tihchhiat mek a ni - Political Affairs Committee (PAC) chungchang – a khal ṭelh ṭawlhin, a serious takzet. Tichuan, Congress PAC in Autonomous District Council pathum area chhunga Congress Party in Party dang thawhpui neih chungchang a ni a. MADC Election 2022 result ah khan Party Majority nei phak an awm lo (BJP 12, MNF 9, Cong 4) Congress 4 & MNF 9 khan sorkarna (Congress CEM kaihhruai) an siam ta a. Election chu number game a ni bawk si a. Elected ten sorkara tel an duh a, mipui pawhin an duh tih hi sawi nawn ngai lo a ni. Vairamah pawh Result chhuah rualin thlantlin/elected te khungkhawm an ṭul fo ṭhin.

MPCC President, Pu Sawta hian MADC sorkar siam thu-ah negative comment - MPCC in Action lak ngai tura sawiin, Show cause notice pawh an pe ta hial nghe nghe a. Tin, Congress PAC hian ADC's area chhunga political Party dang thawhpui chungchang an rel ta a, hetah hian President ngaihdan lam chu a tlang ta lo niin a lang, amah President interview pawhin a sawi a. MPCC President in a ngaihdan lo zawnga thu pass, thutlukna pawmpui harsa tia chumi thu a sawi lang ta mai hi a fuh lo lai tak a la ni zel.

India ram Politics - National Party kalhmang chhungah meeting thurel tawh dodal tlat ang chi hi a thleng khat viauin ka ring. Mizoram Congress Party chhungah Pu Hawla’n, “He thil hi ka ngaihdan a ni ngai lo reng reng," a ti chunga kan kalpui tlang tho pawh a awm nual, Meeting Chairman, Vice President, Pu Zira tihtauh chhuah pawh a awm.

MPCC President Pu Sawta, Vice President Pu Patea, Treasurer Pu Mama te thawkho (team work) hian PAC awmsa chu ṭhiat lovin an ring zui a. Mahse President hian PAC hruai hneh lo, dik nia hriat kalpui thei lo tia inngaihna a nei leh si a, tuna buai lan chhuah tawh hnua PAC ṭhiah (dissolve) leh rup si hi, a damdawi a ni ang em? The Old Guard Party tan hian - Party chhung inlungrual lo chunga Election hmachhawn hi Result a ṭha duh lo ṭhin asin.

MPCC Nomination Committee chungchang - Nomination Committee member ruat belh a ni a. MPCC Treasurer, Pu Mama chu ràwn a ni lo a, ruat fel a nih hnuah President-in a hrilh chauh hi Political Party chhunga administration & organisation fel fai thlentir tur chuan mihring/hotu ràwn tur ang inrawn tlan a, inngaih pawimawh tawn thiam a ngai. Party chhunga pawimawh lutuk Nomination Committee din emaw ruat belh turah phei chuan inrawn tlan a ṭul tak meuh. Inthlan zawh strategy/damage control-ah phei chuan, hnathawktu Party worker-ten an mawhpuh leh an puh rawn chu Top Party Leader, Candidate thlangtu-Nomination Committee member te an ni fo. MPCC Treasurer nihna mai bakah, Congress Legislator Party Leader dinhmun zahawm tak chelh bawktu, palzutna hi thil mak deuh a ni.

Mizoram Politics boruak inher mek sawiin, ZPM MLA pakhat nen kan inkawm a, "ZPM Party chhungah MLA te min dah pawimawh vak lo, bial 35 viltu tur puannaah kan tel ṭawk a ni ber e," tiin min hrilh a. Keiin, "E khai! MLA ding laite Zoram dung leh vang, nangmahni bialah ṭheuh in Party-in an chawi sang hmasa ber phawt tur che u a lawm le. Mi dang tling thei 10 bawr nen puangin, hengte hi an tling ngei dawn e, tiin mipui min convince tum hmasa phawt ula," ka'n ti ngawt a. A chhan chu, Congress Party ah kha chuan MLA tlem te chauh pawh neih chang a awm a, kha'ng MLA te kha an awphawi pawh khamphei da mai, a ṭhen chu translate ngai viaute kha an ni ṭhin a. Mahse, Party chhung aṭanga Legislator tling phak kan neihte an ni a, kan chhuangin kan chawisang em em. Rank lamah Top Cop or Director General angin Party chhungah an thu leh hla kan ngaichang ṭhin.

Congress Party chhungah hian Assembly House chhungah Pu Mama CLP Leader, Legislator & Debator ṭha tak Strategist hriam tak ni bawk an nei a. Autonomous District Council Area pahnih - Mara leh Lai aṭangin MLA Pu-te Ngunlianchunga leh Pu K.T Rokhaw Senior Legislator ṭha tak an nei bawk a. Heti chung hian Political Affairs chhungah District Committee te duh dan chu MPCC President berin a pawm dam thei tlat lo! Pu Lalsawta hi tute'n hian nge advise pe ang aw? Area-Area politics zel hi Mizoramah pawh a awm asin.

MPCC hotu siam rem chhoh dawn khan Congress hotu ṭhenkhatin “MPCC OB (Elected) hi eng Size in nge din ṭha ang, Vice President, ni awma inngai pawh kan awm fur a, Senior Vice, Vice President post siam belh duha nawrtu pawh kan tam si a," tiin min rawn der a. Keiin, Party dang tih ang lovin – President, Vice President leh Treasurer bak chu, Post phuahchawp siam chiam chiam ve suh u. 3 Top Leader inlungrual se, chak takin Party a hruai theih, tiin ka lo sawi a. Hei hi Political Party zahawm - Old Guard Party, (Oldies & Goldies) Political Party Organisation set-up zahawmna a kawk thui viau. Mahse, Congress OB elected pathumah chuan MPCC Nomination ruat belh chungchangah MPCC Treasurer chu thlim a ni tlat si!

MPCC Treasurer chu a bang fel a, a hmun ruak pawh Dr Lalmalsawma Nghaka, mi fel – Nehru thlah kal zel nih hmel tak luahtir nghal a ni. Chutihrual mai chuan Pu Mama chu MPCC General Secretary atan ruatna Appointment Order 22/5/2023 ah pek a ni leh ta tlat a! President-in Dan thuneihna pek a nihna tlawhchhana ruat a ni. Social Media lamah Pu Zodintluanga GS appointment order thlalak a lo lang a, keiin, “Order lem, siamchawp, a sign-tu hming lang pawh hi tak tak a ni dawn em ni?” tiin ka comment a, fiamthu a nih ka ring deuh hial.

Mi ṭhenkhatin, “Pu Mam, GS tur hian an sawipui che em ni?” tiin an lo zawt a. A chhanna chu, “GS Order min pek hmain tu mahin min sawipui hmasa lo, OB Elected post Treasurer nihna ka bang a, GS-a appointment order inpek zui chu ka pawm lo,” tiin a chhang. Pu Mama GS appointment Order pawh hi tak tak a lo ni reng a! Bhavan pawh chuan a sût ve leh ta mai bawk a! GS ruatna chu a pawm duh ringa Order siam an nih rin a va harsa em aw! Congress Party hotu lawk zingah amah Pu Mama hawtuten Congress tichhetu tia puh mualpho a, a hmai tihbalh tuma umzui a, Politics Ṭhi dum (Black Necklace) awrhtir tumna a kawk zawk mai thei.

Old Guard Party - Culture & Tradition zahawm tak bakah Democratic Organisation mawihnai takin a kal ṭhin. MPCC ni lovin Aizawl District Congress Committee (ADCC) hian MLA bial 28 chhung Organisation a enkawl a. ADCC OB elected emaw GS & Secretary thlengin remkhawm fel fimkhur ngai a ni. Mak ta deuh chu, tunhnai kum 2 vel mai hian ADCC President pathum an nei hman a (Pute- Lalzuiliana, VL Robiaka, Lalhmingthanga Pachuau ) Hetianga ADCC President thlakna kawngah hian MPCC OB emaw Executive Committee pawhin ngaihtuahho a awm lo, an ti lehzel a. Congress Bhavan Aizawl rorelna hi khaw nge a kal zel dawn/Quovadis?

Congress Party hian eng inthlanah pawh performance ṭha/result ṭha a nei pha lo hle. A chhan chu Party hrang hrang kil thum/ kil li anga inbeihna Politics War an zir uluk peih lo a ni. Heti zel a nih chuan Congress mipuite hi Party dangten an inchuh hut hut a hnai palh ang e.

(Next ah party dang)

- Lalrozara