LLTF/ VLTF TE VIL LEH KAIHHRUAI

Tunhnai deuha Aizawl leh khaw ṭhenkhata Covid-19 rawn hluar thar deuh chuan Aizawl hlauhna min neihtir hlawm a. Aizawla khawsa leh cheng tawh hrim hrim chu hmun dang ami ten kan hlau a ni ta ber. 

Khaw tin leh veng tina VLTF-te'n ṭhahnemngai takin khawtlang leh veng himna a nih beiseiin an thiam ang leh theih ang tawk zelin inkaihhruainate siamin dan an zam a. Awmze nei deuh leh nei em em lote pawh a awm ang. 

Khaw ṭhenkhatah chuan riak tur mikhual neih phal a ni lo a. Aizawl aṭanga haw hrim hrim chu VLTF-te'n ni 14 chhung anmahni leh an chenpuite home quarantine turin an ti bawk a. Ni tin mamawh leh chakkhai bakah ei leh in, chawhmeh leh thil dangte lakluh leh thawnchhuah kawngah pawh khuahkhirhna siam a ni a. An khuaa lut tur reng reng an lo kalna khua VLTF-te lehkha phutte pawh an awm. Heng bakah hian dawr hawn hunbite siamin khawtlang huap dan tesep tam tak zam a ni bawk a. Khaw kar kawnga lirthei veivahna leh chetvelnate pawh eng emaw chen chu a buai phah a ni.

VLTF-ten hetiang hma an lak chhan hi hripui Covid-19 laka khawtlang/veng a him theihna a nih an rin vang a ni a. An ṭhahnemngaihna a fakawmin a lawmawm tak zet a ni.

Hetiang hi Champhai District kan nihphung chu a ni mek a. District dangah pawh hetiang thil thleng hi a awm nual ngeiin a rinawm. District thuneitu lam an inrawlh a, an hnuaia awm VLTF-te awmze nei leh mumal zawka an kaihhruai a ṭul hlein a lang. VLTF-in an thuneihna leh tihtur chin te, an mawhphurhna leh an hmalak dan turte pawh hrilh thar fo a ṭha hle awm e. VLTF tan tak pawh tihtur chin leh hma lak dan tur a hriat lehzual ang a. Kal dan tur ber hre loa bangbo taka awm tan pawh rorel thiam a awlsam phah ngei ang. 

Hlawh leh hamṭhatna engmah phut miah loa hah taka Covid-19 dona ral hmatawnga ṭang LLTF/VLTF-te hi a fel ber ber leh a hre ber ber an ni vek lo a. Sawrkarin dan a siam leh kaihhruaina a zamte pawh hre reng reng lo leh ngaih pawimawhna chang hre lote pawh awm theih a ni. Kaihruaitu leh thurawn petu, faka fuih phur fotu, an kal sual palh tur vengtu an mamawh em em reng.

India ram inawpna kalphungah thuneihna insemzai dan fel tak a awm a. Covid-19 avanga Lockdown/ Unlock Guidelines MHA-in a siamte kengkawhtu chu State leh UT sawrkarte an ni a. Chutianga Central sawrkar MHA-in Guidelines a siamte kalh leh do zawnga chet chu a rem lo a. MHA-in chutiang zawnga chetna a awm leh awm loh thlithlaiin beng a chhi reng ṭhin.

State leh UT-te'n MHA-in Lockdown/Unlock Guidelines a siam hrúlah inkaihruaina an lo zam leh ṭhin a. Chu chu kawng hrang hrangin kenkawh niin a kengkawhtu langsar tak chu LLTF/VLTF te hi an ni. An hna ber pawh anmahni remhriatna leh ṭhahnemngaih thila dan leh kaihhruaina siam ai mahin state sawrkar leh an awmna DC-te'n kaihruaina an siamte kenkawh leh a hlawhtlin theih nana theihtawpa ṭan lak a ni. 

Central sawrkar-in State leh UT-te a vil tlata an chet velna a enthla ang tho hian State sawrkar pawhin VLTF-te chet velna leh hnathawh, an thiltih dan engkim a enzui a, a vil hi thil nihphung tur pawh a nih hmel. Vengtu nei lo beram rual ang maia mahni duh ang anga kan tlat chuan danin awmzia a nei thei dawn lo a. Thil ṭha ti emaw kan intih lai hian dan palzutna leh mihring zahawmna inrahbehna thil hial pawh thleng palh thei a ni.

Lockdown puan angte phei chu Deputy Commissioner/District Magistrate thuneihna niin a lang a. DC/DM hriatpuina pawh ni se LLTF/VLTF-te hi a puang theitu niin a lang lo. Mipui chet velna leh ni tin mamawh leh bungrua chi hrang hrang chet velna khuahkhirh thuah leh kawngpui dan chungchangah pawh DC hi thu tawp siama thu petu tur niawm tak chu a ni.

Mahni khawbil leh vengbil te tea kan kal nat lutuk hian khawtual mi tan bakah khaw dangte tan harsatna a thlen ṭhin a. Ram inawpna kawng hrang hrangah buaina a thlen chang a awm. Tin, mahni thuneihna piah lama chet hi a zahawm loh bakah dan hmaah pawh a him lo a ni.

Tunlai khawvelah khaw tin leh veng tin inmamawha inban tawn vek kan ni a. Mahnia khawsa thei kan awm lo. He hripui hian chuti maiin min kiansan pawh a rinawm bawk lo a. Tum teh mah ila a bil te tea inkharkhip leh inhungbing hi tuman kan tlin reng dawn chuang lo. Chuvangin rilru zau tak pua, kan tih tur chin leh sawrkar dan siamte pawh en pah zela him leh ṭha tho si kan duan hi a ṭul hle. Aizawl te, Lunglei te, Champhai te leh Dist.hqrs. dangte hian riaka mikhual neih phal lo vek mai se kan buai dawn em mai.

District thuneitute hian an district chhunga LLTF/VLTF-te vil uluk leh zual se. An hmalaknate hriatpuiin an kal thiam lohnaah zirtirin kaihhruai se a va ṭha lehzual dawn em.

Duhthusamah phei chuan State sawrkarin guidelines a siamte duh tawk ta mai ila. Hemi kalh zawng hi chuan tualchhung leh veng bilin dan dang lo zam lo ila, kan lungrual tlang berin a rinawm a. A ṭul ta  a nih pawhin kan thuneihna huang chhungah zel chêt ni se. State sawrkar leh DC-ten Guidelines an siamte hi kan mamawhna zâwn leh kan mil tawka a siam a ni ṭhin a. A ṭha tawk viauin a hriat. Heng an dan siamte pawh zawm hleithei loin a dang kan siam belh chiam zel hi ṭul loah buaina kan insiam mai mai ni te pawhin a lang e.

Eng chen nge he hripui chimawm tak Covid-19 hian min la tihbuai ang a, engtia rei nge kan la do zel dawn kan hre lo. Kum hnih thum lai pawh a ni thei. Kan innghahna ber tur hi LLTF/ VLTF te bak an awm chuang lo ang. Hun lo kal zel turah tun aia awmze nei leh zahawm zawka an chet a, dan hmaah an him zawk theih nan sawrkar lamin nasa leh zualin vilin kaihruai se a duhawm hle. 

LLTF/VLTF-te zahna chibai kan buk a. Ṭhahnemngai leh fimkhur lehzuala kan ram him nana thawk zel turin duhsakna kan hlan e.