COVID 19 DARH CHAK LEH TESTING

Tunlai chu veng hrang leh khaw hrang hrangah, "Covid-19 a kâi leh ta," tihthâwm leh sample testing an tih mek thu hi kan hre chamchi a ni ta ber mai. Chuvangin eng ang chiaha he hri hi kai awl nge a nih leh mi tin ngaihchân sample testing chungchang hi lo hriat chian tum ila. Heng aṭang hian fimkhur dan thar kan zir nghal zel bawk ang chu.

KÂI A AWL

He Corona  virus hi natna hrik zawng zawng a tê ber chi a ni a. Kâ, hnâr leh mit aṭang chauhin taksa an lut thei tih kan hria a. Heti an an luh hnu hian hrawk leh hnâr kaw tawp (nasopharynx) velah an inthlahpung ta chiam a ni. Heng hi khuh, hahchhiau, kâ leh hnâr khawih aṭangin midang an kai darh ta ṭhin a ni. A rei  deuh hnu chuan  chuap lamah an chhuk thla thin.Hei vang hian Covid-19 hi chuap natna tih a ni rêng a ni. A veite êkah hian a hrik a chhuak bawk nain, êk aṭanga inkaidarh hi chu report a la awm rih lo. Sahbawna kut silfai ziah chu a tha ngei ang.

A vei mekte'n natna hrik (viral particle) an thehdarh dan chu hetiang hi a ni. (source CDC, USA,0706,1210)

Natna hrik kaite aṭang leh hmun hran hrana a hrik an hnutchhiah aṭangin  midangin lo kai ve an ni ber a.

Covid-19 kai tur hian viral particle (vp) eng zat nge kan mamawh le?

A CHHANNA chu : A tlem berah a hrik  sangkhat (1000 vp) tal kan taksaah a luh a ngai a ni. A hrik pai Positive-te hian an khawsakna vela natna hrik an thehdarh theih dan lo thir phawt ang.

THÂWK (Breath) : Minute khat chhungin a hrik 20 vel an thawchhuak thei. (20 vpmin)

ṬAWNG (Speaking) : Minute khat chhungin a hrik 200 vel ṭawng zawngin a chhuak thei (200 vpmin). Chuvangin minute nga aia rei inbiak hian kaitheihna (chance) a tisang.

KHUH (Cough) : Khuh hian natna hrik maktaduai zahnih (200 million vp) vel a per chhuak thei. Heng hrik khuh chhuahte hi pindan khar khip (poor ventilated room) ah chuan rei tak boruakah an châm thei. Chuvangin, a kaite nena in chhung (Room) hmun khata awmho reng a him lo.

HAHCHHIAU : Hahchhiau hian virus maktaduai 200 (200 million) vel bawk an chhuak thei.

Chuvangin khuh hahchhiau hian kut lawnga hup lovin Tissue paih mai tur emaw  kiu (elbow) kawrchhana inhup ngei tur a ni.

Khing khi natna hrik pai tam (High viral load) hoah a dik tlangpui.

    

SAMPLE TESTING aṭanga

kan hriat theihte.

(source, ICMR- NIOH,Ahmedabad)

Sample testing an han tih hian testna  Rt-PCR ,TRUENAT khawlte hi chuan a hrik pai tam leh tam loh an hre thei nghal a. An pai tam dan azirin hetiang hian an ṭhen.

1. Hrik pai tam (High viral load) - 17 to 24 Ct. (cycle threshold).

Heng hrik pai tamho hian natna (Symptoms) khawsik, khuh ro, hrawk na etc. an nei a. Thawhah pawh an nei thei. A kaidarh nasa thei (super spreader) an tihte an ni a. A tlangpuiin a kaiho zinga 8-10% vel an ni ṭhinin Gujarat-a an zirnaah chuan an hmu. Anni hi chu khung hran ngai an ni. Contact tracing pawh a umzui nasat ngai an ni.

2. Hrik pai tam lutuk lo (Moderate viral load) - 24 to31 Ct.

Anni hi 10-15% vel an ni tlangpui. Hri an thehdarh thei a, natna symptoms an nei thei a. A chunga miho ai chuan an ziaawm deuh. 

3.Hrik pai tlem (Low viral load) - 31 to 38 Ct.

Hengho hi a positive zingah a tam ber 75% - 80% vel an ni ṭhin. Hengho hian natna an nei hran lo va, hritlang satliah leh awm nuam lo deuhte an nei ve ṭhin.Asymtomatic kan tihho hi an ni. Natna an thehdarh ve thei nain an thehdarh nasa vak lo thei bawk. Contact tracing-ah pawh umzui nasat an ngai vak lo. An sample test result a 34 Ct chung lam phei chuan midang an kaichhawng vak lo tura ngaih an ni. Enkawl  ngai loa  an dam leh mai avang hian State tam takah chuan in lama enkawl 'Home Isolation' an duhtawk. Kan state ṭhenawm Manipur leh Tripura pawhin an ṭan tawh.Kan hmabak a nih hmel e.  

HRI KAIHO HI ENG CHENIN NGE

AN HLAUHAWM

Natna langchhuak nasa loho (Mild to moderate) hian insawiselna (symptom) an neih aṭanga kar hnih chhung (14 days) midang an kaichhawng thei.

A damlo nasa leh hrik pai tam (Heavy viral laod)-ho hian a natna lanchhuah 

aṭanga kar thum (21days) chhung mi an kaichhawng thei.

Hetiang hnu hi chuan tumah an hlauhawm tawh loa ngaih a ni.

TEST-NA KHAWLTE

RT-PCR

Hei hi khawvel pumin an hman lar ber a ni. Natna hrik a hmuh theih dan hi 80% vel a ni (Sensitivity 75-85%). He khawl hi a laksawn ve theih loh. Natna hrik pai dan viral load a hriat nghal theih. Result hi nghah deuh a ngai, darkar 4 vel tal niin an sawi.

TRUENAT

Hei hi PCR tluk dawn a tha,Mini PCR an tih mai a ni a.Viral load a hriat theih.A result hi darkar 1-2 chhungin a chhuak.

RAPID ANTIGEN TEST

Hei hi tunlai kan hriat lar tak ber hi a ni a. Khawi hmunah pawh a kalpui theih a. A test man hi Rs. 450 vel a ni. Viral hrik pai tam (High viral load)-ah chuan PCR-te nen a sensitivity hi a inang deuh reng (Weitzel et al 2020, Chile).

Hrik pai tlem lamah PCR a tluk loh avangin PCR-a ennawn ngaih chang a awm a, a result hi darkar chanveah a hriat theih.

Khing kan hmuh ang khian eng khawl mah hian Covid-19 vei 100% a hmuhna khawl a la awm lo tih kan hre thei ang. A khawlin a hmuh loh - a hrik pai tlem zingah an awm zeuh zeuh thei tih hi hriat reng a ṭha.

RAPID ANTIBODY TEST

Hei hi natna lo vei tawh ṭhinte Screening tih nan hman ṭangkai ṭhin a ni. A veitir zawnna atan an hmang lo tlangpui.

Chuvangin testna zawng zawng aia mitin tana ṭangkai tur chu 'FIMKHURNA' bawk hi a nih avangin a thunawnah hmang leh teh ang.

MI TIN TIH TUR

Kum upa leh natna benvawn neihote hi hmun tinah a tuar nasa ber an ni zel a. Damdawi in leh ICU mamawhtute pawh an ni ber. Nunna chan tam ber pawh an ni. Chuvangin anniho venhim hi kan zavai mawhphurhna a ni. Kum upa takho chu inah an awm mai thei a. Natna benvawn nei tam tak hnathawh ngai site zawm tur leh kan vaia zawm tur i han sawi leh teh ang.

1. MASK

Hei hi mi tinin hman tur. Natna benvawn nei chuan englai pawhin hnathawhnaah mask vuah tur. A theih chuan surgical mask hi ni tin thlak a tha. Pakhat Rs 10- 20 vel a ni a. Kuhva melzial man tluk pawh a ni lo. A suk theih chi chu ni tin suk zel a him ang. Mask vuah lo chu tumah biak loh ngam a ṭha. Tumah chibai loh leh biak tam loh a him ber.

2. SOCIAL DISTANCING

Natna benvawn nei leh kum upa tak chuan mi an biakin hlam khat dan (6 feet) tal ni thei se a ṭha. Minute nga aia rei inbiak hian hri kai theihna a tisang. In chhung/room-a midangte nena awm an nih chuan a thawveng thei ang bera hawn tur. Hetiang tihtheih lohnaah chuan kal loh hram tum tur. Mahni inah pawh midang hlat deuha awm tum tlat tur. Ṭhutkhawm tam deuh chuan mask vuah mai a ṭha. Tu leh fa te pawh chhawnchhaih loh mai a him.Naupang hian an kai awl a,an damlo ve lem lo .Chhiatnithatni ah kum upa lam leh natna bevawn nei ho hi chu kan beisei loh a tha.

3. INVAWN FAI Kut sil zin bakah kut sahbawn a sil hmasak loh chuan hmai, kâ, hnâr leh mit khawih loh tur. Hand sanitizer inchhawp reng a him.

Midang zawng zawngin keimahni inveng chungin heng 'vulnerable group-ho' hi kan venpui ṭheuh chuan kumin kum tawpah hrikai 5000 lai kan lo awm a nih pawhin kan buai lutuk lo turah ngai ang.

FRONTLINE WORKER TE

Kan front line workers-te hi kan chawmawi an ngai khawp mai. Kan himna tura dai min theusaktute an ni. Heng a thawk tam tak zingah a bikin medical lam a thawktute hi kan hriatthiam an ṭul. A tam ber hi hna nghet lova chhungkaw chawm  an ni a.Thla tawp a hlawh lak theih lo chang pawh a thawk 

ṭang ṭang an ni. An lo positive palh pawhin  diriam mai lovin naktuka kan positive ai min lo va positive-sak a ni tih theih ṭheuh i tum ang u. Sawrkar lam aṭangin a harsa a nih pawhin vanduai vanga positive palh ate hi chu vantlang zinga mi inphalte hian puihna te siam thei ila, a entawn tlak ngawt ang. Kan doral lian chhumpui zing a kian deuh hunah phei chuan an zavai hian kan sawrkar chak tak hian dahnghet vek se ka va tihpui tak em!

TRACKING, TRACING & TREAMENT

Tuna kan hotute'n an tihdan hi chhunzawm zel thei ila. Kan sawi ang khian a hripaiah pawh a hripai tam leh tam lo hi thliar tawh ila. Hripai tam (High viral load) ho chauh hi contact tracing a umzui  nasat ngai chu an ni. Hripai tlem phei chu umzui nasat an ngai lem lo ang. Tuna a positive te leh contact tracing kan tihduhna lai 'Containment zone' a puan mai emaw Quarantine mai zel hi kan kal dan tur a nih hmel e. Kan eizawnna leh hnathawh tibuai lo thei ang bera kal hi kan tum chhoh zel a tha ber ang. Contact tracing pawh hi  mipuiin pui tha bawk ila. Thil ṭha tak nia kan hriat, kan tlin lem loh hi chu tih loh ngam a ṭha mai.

 

A hlauhawm rualin a hlauhawm lohna lam hriat tel ve a ṭha. Fimkhur loh phah nan hmang chuang lo ila. August ni 21, 2020 hian India ram hrikai 29,04,329 an awm tawh a. Mitthi 54,975 an tling tawh. India ram a veizat atanga thi zat chhutna Case Fatality Rate (CFR) chu 1.92% chauh a ni rih.Natna kan hriat tamtak ai hian thihpui kuminah pawh an la tlem zawk.Chu chu khawvel hmundangah pawh a ni.Khawvel pum huap hripui a lo leng fo tawh a.Reh hun an nei vek. Tuna covid Hripui pawhin reh hun a la nei ngei ang.

Chuvangin  keini pawh thu kan awiha,kan fimkhur tlan vek chuan, tuna keipui hliam huala kan hual mup mup hi nakinah chuan PATHIAN zarah a la reh duak ngei ang.  Fimkhur takin thuawihin i ṭangrual zel ang u.