Pathian thu leh khawvel thu sawina tur pulpit

Tunlaia inhnialnaah hian ka tel ve duh a, Pathian thu sawina hmun tur chu Pulpit ti an awm a, Pulpit-ah Political Education kalpui a ṭha ti an awm a, Pulpit-ah Pathian thu ni lo hrim hrim sawi duh lo bur pawl an awm bawk a, keia ngaihdan rintlak lem lo takah chuan siam ṭhatna thu a nih chuan Pulpit hi a sawina tur hmun dik tak a ni.

Revd Chuauṭhuama khan KTP Inkhawmnaah Politics a sawi a, chu chu he inhnialna lo chhuah chhan hi a ni a, Revd Chuauṭhuama thusawi kha a thupui thlan kha i en chuan, "I Ramin a ko che," tih a nih kha, kha kha chu Pathian thu ngialngan a kawl lo a, Politics lam a kawk a ni. Hman deuhah khan T Shirt pawh "I Ramin a ko che" tih an hak ṭhin tawh ang; khan he thupui hi Politics au hla pakhat a nih avang hian, "I Ram lo thleng rawh se," tih te leh "Ram chu Lalpa ta a ni," tia an sawi dan diak diaka sawi theih a ni hauh lo.

Revd Chuauṭhuama thusawi an helh chhan lian tak chu siam ṭhat duhna rilru 'Reformist Zeal' an tih nen ṭhahnemngai taka a sawi vang a ni. Miin ṭhahnem a ngaih tak tak chuan mi pawi sawi a hlau tawh lo, a inveng ṭit ṭet tawh lo, a mawi a zawng tawh lo, mi sawisel mai mai a hlau ve lo, a turtu lam aṭanga sawi tur lo chhuak chu tím loin a sawi pawp pawp a, chu chu Revd Chuauṭhuama khan a rawn phur chhuak ṭha khawp mai. A thusawi kha ei lo a tam rualin a tam zawk kha chu thu ṭha tak a ni. Mizoram siam ṭhat a duh vang a ni tlat a ni.

Kan sawi tum lamah han kai lut dawn ta ila, Pulpit-ah hian Mizoram hian Bible thu mahni hrilhfiah dana sawi mai mai tu pa emawin "Ka dawn thar," an tih te sawi ai chuan, Revd Chuauṭhuama thusawi ang siam ṭhatna thu kha ka ei zawk. MNF leh Congress a bei kha an sorkar tawh vang a ni, ZPM pawh sorkar tawh se tihsual nei se, Revd Chuauṭhuama hi chuan a bei ve tho ang, Revd Chuauṭhuama avanga debate lo chhuak Pulpit hman dan pawh hi tun aia kan phal zau a ngai zawk lo maw? Tiin mi dang chhàn atan zawhna ka zawt a ni.

- Lallianmawia Chhangte