Sorkarin Zoram Mega Food Park aṭanga a zir túr pawimawh :

Zoram Mega Food Park khu ka zuk kal ve tawh a, a hmuna kal ai mahin You Tube lama en hian thil nih dân a chiang tlat zawkin ka hria. Sum an seng hnem a, an sawi danin cheng nuai 7,500 zet an seng an ti a, zuk hmuh chiah chuan an sum hmanna pawh a ṭangkaiin a dik pawh a dik viau niin a rin theih.

Hmun zau tak, Khamrang ramah, Airport leh nakin lawka Rail Station hnaih tak tûr leh Aizawl aṭang pawha hla lo têa awm a ni a. A remchang kher mai. Cold Storage te, Kudam lian te, thlai thar dah rona tûr te, hnathawkte chênna turin leh he Project bika hman tûr, Captive electric Power Generating Plant, Megawatt 2 leh a chanve dawn lai pe chhuak thei te, thei chi hrang hrang sâwngbawlna khawl ropui tak tak, cheng nuai 100 tel man tûr tih hriat pawh an ngir khup mai.

A hung chhunga lirthei veivahna tur kawng pawh a tamin kawng pawh Alkatra luan vek a ni. Video lama en phei chuan a thawktute chuan Uniform leh lukhum leh kutkawr nên khawl inher kual chhuak a, bur ruak, a khat tâwk chiaha thei tui rawn thun thei te a awm vek a ni. Hetiang hian Zoram Mega Food Park chu a inring ṭhap mai a, a thawktute pawh mi tam tham tak awm angin Video lamah kan hmu thei a ni.

Mahse, an sum sen pumpui cheng nuai 7,500 aṭanga khawl ṭha pui pui leh Cold Storage leh sâwngbawlna khawl hrang hrang hi cheng nuai 3,000 man vêl zet tur a nih laiin khawlte hian ni khatah a hláwk tham túra hman (Optimum Use) nan darkar 10 chhungte an thawh char char a ngai ang a. A thawkte pawh chhun chaw ei hahdam tih loh chu ding ngar ngarin an thawk túra ngaih an ni. Mahse, kum tluana thawh chu sawi loh – Uniform han inbelin hnathawk tûr lam hi ngah viau mah se, her leh sawngbawl tur kha a tlêm lutuk avângin Minutes 20 vêl lekah an thawk zo vek mai dawn si a. A thawkte, nupui fanau, chhungkaw châwm ve meuh rual kha, khati lek kha thawk tur an nih chuan a khawl neitu tân khan sum khawhralna mai kha a ni ringawt dawn tih a chiang reng mai a ni. Employment Generate-na hi sorkar hian a ngaihtuah a ṭul. Chutih rualin hlawkna awm lo, Sumthuni nu ni ringawt turin Employment hi kan generate tur a ni lo. Sum thawk chhuak thei, kan hlawkna tur zawkin employment hi kan generate tur a ni zawk.

Hei váng hian Mizoram hian thlai leh thei emaw ran vulh emaw kan tih tak tak dawn chuan uar bik tlêm tê leh thar chhuah tamna hmun bik tur, ram zau tak, khaw hrang hrangin bawh bikna Zau te ruahman a ngai a. Himachal Pradesh te'n Apple ringawt an ching a, Gujarat te pawhin bawnghnute tam tak hmanga keini ram thleng thlenga Amul chi hrang hrang an thawn chhuak ang khuan, kan uar tûr hi ti duah lovin Sorkar remhre tak remruatna hnuaiah thar chhuak tam tak tak túra ṭan lak a ngai dawn a. Chumi atân chuan Primary Agriculture Credit Society (PACS) leh Special Economic Zone te hi kan ngaihtuah tûr pawimawh hmasa an ni. Hei hi Prime Minister Modi-a pawhin a ngaih pawimawh em em a ni a. Congress Party ṭhalaiten Sihphira PACS zirchianna an neih leh an party President Pu Lalsawta’n Ratu khuaa PACS zirchianna an nei kha a ṭha ka ti hle mai. PACS hi mi retheite ban phak, mi retheite khai chhuahna tur atana thil pawimawh tak a ni a. Special Economic Zone hi siam a nih phei chuan PACS tan hnathawh a awlsamin mi retheite khai chhuahna tur pawimawh tak niin ka hria a. Congress Party-in an Manifesto-a "Ṭang Puihna" hmanga chhungkaw tam tak ṭang em em, la ding chhuak rih thei lote ṭanpuina tur an duante hi loneitute dinchhuahna leh ram hnuk khawih pha an ni a.

Mipui lawm zawng leh Vote hip tûr mai ni lo, a tak ram min thlen thei tûr Economic Policy hi mipui hian ngaihtuah chiang ila, a chunga kan sawi ang khian thar leh vulh chhuah tam hi a hnuk chu a ni reng ang.

- Lianhleia, Sihphir Venghlun.