Tu m'a thàl ve theih loh PMJVK
Pradhan Mantri Jan Vikas Karyakram (PMJVK) hi kan la hmelhriat rei lo va, an website lama a inziah dan chuan, 'Centrally Sponsored Scheme (CSS), is an area development programme under which community infrastructure and basic amenities are being created in the identified areas. The scheme is being implemented under the aegis of the State Governments/ Union Territory (UT) Administrations on a fund sharing pattern and the projects are implemented and managed by the concerned State/ UT Government' tiin a inziak a ni.
Mizo ṭawnga kan lehlin chuan ka lehlin dik loh ka hlau si a, a tawpna sentence, 'The projects are implemented and managed by the concerned State/ UT Government' tih hi han la chhuak ta ila, hei hian a kawh tum chu state sorkarin a Project hi an kalpuiin an enkawl tur a ni a, chuvangin a Project thlan dan tur pawh hi state sorkarin an dah pawimawh phawt chuan PMJVK atan hian an duh an thlang thei thui dawn tihna a nih a rinawm a, mi pakhat chiahin a thàl theih bik tuikhur a nih a rinawm lo a, Mizoramah hian Minister Pu Robert Romawia Royte hi chuan a thàl thiam bik a ni.
February, 2023 khan PMJVK hi ka lo ziak tawh a, Mizorama PMJVK Project chu Pu Robert Romawia Royte enkawl Sports lamin an chang hnem a, Minister thiam vang leh chak vang a ni ngei ang. State dang chuan Health leh Education atan an hmang tam si a, PMJVK sum hmu ve thei lo School Education Minister Pu Lalchhandama Ralte bakah Higher Education leh Health Department enkawl tu Dr R Lalthangliana te hi Minister ngaihna hre lo chu an ang ta khawp mai, inthlan a hnaih hian a rawn ri chhuak leh ṭhin dawn a ni.
Kan lo hmuh ve dan kha chuan kum 2020-21 chhung khan PMJVK hnuaiah hian Mizoram Project 70 zet chu pawm a ni a, thil mak chu heng zinga 63 hi Sports Project a nih chu. Mizoram hi India pumah pawh PMJVK hnuaia Sports Project ngah ber a ni. State dang chuan a tlangpuiin Education kaihhnawih Additional Classroom, School Building, Residential School, Computer Laboratory, College Additional Infrastructure leh Health atan an hmang a Mizoram chu Sports a ni ta ngawr ngawr a.
Mizoram School Education Department hian cheng nuai 3500 vel NABARD aṭangin zirna in sak ṭhatna tur, Mizo mipui pawisa aṭanga rulh leh tur sum a pûk a, PMJVK hmu ve thei lo ta chuan a pûk mai loh chuan. Minister pakhat hmuh theih, Minister dang hmuh ve theih loh PMJVK hi MNF kar tipheltu a ni daih thei. Tun inthlan lo awm turah hian, hetiang te te hi Politics ah chuan balance thiam loh chuan Opposition beih ngai lo hian MNF leh MNF hi an inpawt thei daih a ni.
- Lalhmachhuana