MPF-in Sum Sem a sawifiah a ngai
Mizoram People Forum (MPF) hian MLA inthlan lo awm turah sum sem a do tlat dâwn tih thu a chhuah leh ta a, sum sem hi a hrilhfiah loh chuan MPF hi a mualpho dâwn a ni. MPF hian sum sem venna turin House to House campaign-te a khap dâwn an ti a, House to House campaign khap aia pawimawh chu tunah hian Politician hi ven an ngai a ni.
Tun apangin langsar takin pawisa sem hi a hluar ta niin ka hria. Minister leh MLA ṭhenkhat hian pawisa an chelek hmiah hmiah tawh. MLA nih tum ṭhenkhat pawhin tun aṭangin bial chei tih hmangin an che ṭan tawh. Hei tak hi MPF hian a vil si loh chuan inthlan dawna thianghlim taka Campaign-na hmanraw ṭha ber House to House campaign khap tlat hi a sàwt lo ang. Tunlai chhanah chuan Online Payment (GPay, Phone Pe, Pay TM etc) hmangin an inthawn thei tho tho tawh a, pawisa sem dan tum avanga House to House campaign khap hi chu thil kalhmang lo a ni.
Candidate tur pakhat chuan Admission Fee a tumsak tur thu a tlangaupui ta piap piap a, hei hi pawisa sem nen a danglam em le? Miin pawisa chu nei ve se, Admission Fee peksak hi an duh ang, an neih ve si loh chuan pawisa nei zawk Vote zawnna tur a ni a, MPF hian pawisa sem a ti nge ti lo? tih hi hriat a ngai asin. MPF hian khawtlang kohkhawma ruai ṭheh bung bung a duh lovin, Candidate senso tam hian eirûkna a siam an ti ṭhin a, pawisa sem kan sawi nasat lai hian nuai tel senga khawtlang ruai nena hrài hi kan khap zingah khan a tel em khah? tih zawhna hi chhan a ngai a ni. Damlo inkan dan pawisa tam tham em em pawh hi pawisa sem ni lo mah se, vote leh tumna a ni tho lo maw? Mahni chhungte ni miah lo ruang thawnte pawh hi pawisa sem duh lotu MPF hian engtin nge a ngaih le? Vote lei tumna tho a ni lo maw? Mitthi ral pawh mi dang aia tama inral a la awm ta zel a, hei hi vote leina a ni tho em le? Nakinah MLA Minister nih huna rulh leh tur a nih chuan a fel lo a ni. Kan MPF hian pawisa sem hi a thliar a ngai.
MPF hian Candidate duh dan a zam a, a duh dan Candidate ruat a fak leh chuang loin an duh dan kalh a Candidate ruat a khak leh ngam lo a nih chuan, Candidate atana mi hmingṭha, eiruknaa fihlim, mipat-hmeichhiatnaa hming chhe lo a tih lai a, hetiang mi Candidate an awm si hian MPF hian a khak ngam dâwn em? tihte pawh hi kan hre lawk duh a ni.
MPF hian bân a phar ngam a nih rau rau chuan tun aṭangin bân hi phar ngam rawh se.
- David Lalremruata