Sports Minister a tlanchhe lo
Tunlai Social Media-ah Sports Minister Pu Robert Romawia Royte chu Aizawl East II Bialah ZPM Candidate Pu B Lalchhanzova a hlauh avangin Hachhek Bialah a tlanchhia tih a tam hle a, Pu Robert-a hian Pu Chhanzova hi a hlau ni lovin party-in kal tura a tih angin MNF hamṭhatna tur zawkin a bial a sawn dawn zawk a ni.
Minister ni chunga term khat chiah a la awp a tlan chhiatsan avang hian chirhthehna a tam hle a ni. Pu Robert-a hi mahni bial hmangaihtu a ni tih chu a hnathawhah hian a lang a ni. Pu Robert-a hian a bial hi a che hnum ṭha a, tlin leh ngei pawh a inrin bakah din leh ngei ngei pawh a tum tih a bial a chei danah hian a lang a, mahse MNF hi an boruak a hniam deuh avangin an tlin leh theih dan dapin strategy ṭha tak neiin bial an siksawi a, Pu Roberta hi a chhuak zawk a ni.
Pu Tawnluia pawh hi Aizawl West I biala dah tumna a awm an ti a, chu chu Deputy Chief Minister a tlanchhia ni lovin MNF strategy bawk a ni. Pu Tawnluia hi kum 80 tling tur a nih tawh avangin km 200 dawna bial vil turin a taksa a chak tawk tawh lo va, term tawpah phei chuan kum 85 vel a nih tawh dawn avangin Aizawl West I lamah dah an tum a, a bial chhuahsan hi MNF-in an lak zui theih chuan chânna awm miah lova tlin kawp an tum.
Pu Lalruatkima pawh Chalfilh biala ding tur anga sawi a awm hi a tak a nih pawhin tlanchhia ni lovin, MNF tana bial humhim theih tur zawn a pawimawh avanga insiksawina a ni. Chutiang zelin Pu R Lalzirliana pawh Ṭawi bial aṭanga chhuakin Aizawl East II ah an dah dawn tih hi tlanchhia ni lovin, MNF Stratery a ni. Hei lo pawh hi Minister Pu C Lalrinsanga pawh hi chawlh hahdamtir tumna awm leh Pu Lalchamliana pawh chawlh hahdamtir tumna a awm an ti a, Chief Minister Pu Zoramthanga hi bial hnih ni lovin thapui thawhin Aizawl East I ah chiah dah tumna a awm an ti a, MNF hian strategist fing tak tak an nei a, kum 2018-ah mi rin loh karah an dawk zawk a, tling nawn turin an tlin nawn theih dan ral an rel mek a, Social Media-a hriat nei uk si lova Minister an tlanchhia tih fo hi chu politics hriat loh vang zawk a ni.
- Maremmawia