ZIRTIRTU INDAIH LO TIH RENG MAI HI

Pa fel tak pakhat (Tlangval pawh ni tawh lo), chu BA a zir zawh hnuin thingtlang khaw pakhat, kilkhawr deuh maiah hian Middle School Zirtirtu hna a hmu a. A hna hmuh, Private Middle School-a thawh chu duh viau mah se, a nupui fanaute nena khawsa tur chuan, a khaw mi a nih loh avangin a tan chuan in luah tur chu harsa a ni tlat mai a. Chu School Managing Committee chuan zirtirtu an zawn reng laia chutiang miin thawh mai a duh chu an lawm khawp mai. Amah an kawmna/interview-naah pawh mei zu lo, kuhva pawh ei lo, zuk leh hmuam ti lo a ni tih an hriat chuan an duh tulh tulh ta mai a ni.

Chu khuaah chuan Forest Department hian Quarter 4 vel lai, sak zawh hlima sak ṭha zet zet mai, tu m'a luah si loh luahtu tur Staff (Forest Guard) an indaih a lo ni awm a. Sak zawhna a rei tawh hlawm avang chuan a ban leh bang pawh Tlumpiin a ei bal/hèk nual tawh a ni. Khua leh School aṭang chuan chu Forest Quarters chu a fal/hla deuh hlek a, quarters chhungah chuan hnim chi hrang, hruizam chenin a lo awm fur tawh. Chu School chu private School tak tak, a khaw awmna a kilkhawr avanga zirtirtu pawh hmu hlei thei lo an ni. Chu khaw VC chuan zirtirtu an hmuh thar pa hnenah chuan, Forest quarters chu luah hawh atana an dilsak tur leh, amah pawhin lo dil ve ngei turin an hrilh a.

An beisei loh takin Forest Department hotute chu an lo fel hle mai a. Luah chu an lo phal em em bakah luah man pawh a ngaih loh tur thu thlengin an lo sawi hmuh a ni. Zirtirtute chhungkua chuan kum 15 dawn lai an luah ta a, a vel chu chuktuah huanah an siam hnum ṭha a, a in pawh repair ngai lai an repair ve zel a, quarters dang pawh chu a luah duh awm ang ang an luahtir ta hlawm a ni.

Chu khuaah vek chuan Middle School-a zir zo, zir zawm zel duhte chuan an khua chhuahsana khaw danga an kal a ngai ṭhin chu ngaimawhin, High School an din ve leh ta a. Zirtirtu ṭha tak, khaw dang mi bawk an High School zirtirtu hmuh zingah chuan a awm leh ta. Chu zirtirtu thar chuan a hna a’n zawm dawn chuan chenna tur chu a harsatna a lo ni ve bawk a. Kum chanve chhung chu a khuaa awm thei deuh chhungkua chu a hrawn a, khawlai lun lai leh kawngpui kama in hmun nei a hriat chu, a luah hawh tur atan in sa turin a sawm ta fo mai a. A hnuah chuan pa pakhat hian rangva in te fel ṭha ren rawn a sa a, zirtirtu chuan a luah hawh ta a. Ngaihngam leh lungmuang takin High School-ah chuan a thawk ta a ni. Chutiangin an khuaa School te chuan a hma aiin an kum tawp result pawh a ṭha fo ta a nih chu.

Ka’n sawi tum/Subject ber chu – Sorkar Department hrang hrang hian thingtlang chengkerh deuhah pawh Quarters hi an nei ṭha em em deuh vek a ni. Education Department erawh hi chuan an thawktu/Zirtirtute chenna tur hi an ngaihsak ve reng reng lo ang a ni ti mai teh ang; Department dang lakah chuan. Hei hi tun hnai maia ngaihsak loh leh ngaihthah pawh an ni lo, tun hma kan UT tirh aṭang tawh khan Zirtirtute luah tur Quarters hi thingtlang school awmna, a bikin Sorkar school awmnaah chuan sak a awm ngai lo va, zirtirtute pawh hian chu khuaa thawh chu an hreh phah em em a ni. Aikal lak sorkar hian han phal lo ṭhin teh mah se, he chenna/Quarters harsatna avang hian zirtirtuho zingah hian Aikal la hi an tam ber awm asin. Hei hi kan Education/zirna hian a tur khawp mai. Khaw tam taka School tam takah zirlai naupang mamawh ang zirtirtu an awm lo va, subject hrang hrang pawh làk kim lohvin a awm phah pheng phung a, zirlai kum tawp result-in a tuar leh khawp a ni.

Heng Education Department-a harsatna, a bul berah chuan (1) Zirtirtu te chenna tur quarters awm lo, hemiin a nghawng, (2) zirlai naupang mamawh zat zirtirtu awm lo, (3) subject ṭhenkhat zirtirtu awm lo, (4) zirtirtu pakhat chauh awmna School te, (5) Kum tawp result chhe lutuk, Artelukawn thlengin, sut kian dan tur zinga pakhat chu Zirtirtute lungmuanga thingtlang khua/school-ah an post-naa an khawsak vena tur Quarters sak hi a ni. School building lian pui pui, an zirnain a mamawh room te bakah zirtirtu eng emaw zat chen/accommodate theihna tur sak a ni. A nih loh chuan, School Compound chhungah emaw, a hnaivaiah emaw chuan zirtirtute luah tur in mal din emaw, chhungkaw eng emaw zat luah tur sa thluah mai se, tuna kan result chhia eng emaw zat hi kan su kiang ve ngeiin a rinawm. He quarters thla tin luah man a luahtuin a pek dan turah chuan, sorkarin dan dinglai, khawpuia a hman ang hi emaw, a nei thoin a rinawm.

A thuhrimah, heng quarters hi mi pakhatin, a rei berah, kum 15 aia rei luah loh ni se, hemi hun chhung hian a luahtu zirtirtu chuan he khuaah hian he kum 15 hun chhung hian amahin in-leh-lo a din hman ngei turah ngaih ni mai se. Middle School, High School leh Higher Secondary School zirtirtu te luah tur a hran veka sak a ṭul pawhin Sorkar chuan ṭan la mai se, a rahchhuah, naupang result ṭha, kha rilrua hriat ni se. Education-a a Mizoram pumin result ṭhaa hma kan sawnna tur ngaihtuah a ngai e.

- Ropiangliana, Nursery Veng