KAN HNEH ANG

“...petrol lâkna hmuna kal, ...dawra kal, ..venga kal chu mahni inpuan tur a ni e” tih ang thu puan hi kan hre thut thut chho dawn niin a lang. Engtia hmachhawn tur nge? 

1. Sorkarin chhuah a khap leh a phal vang ni chuang lovin, ṭul tawpkhawkah lo chuan chhuah a him lo nasa ta hle tih entirtu chu tunlaia thil thleng mek hi a ni. 

2. I inpuan hian hri i kai tihna a la ni lo, i mualpho tihna pawh a ni lo. Nang leh i hmangaih i chhungte himna tura sorkar duhsakna thupek i zawm tihna zawk a ni.

3. Hri kai lova i inring a nih pawhin, i kai lo ngei a ni tih finfiah vat kha nang leh i chhungte leh i vengte tan a ṭha zawk. Inzêp hi natna, inpuan hi himna a ni. 

4. Inzêp tum suh. Mizo hi inzêp tham lo khawpa hnam tlem kan ni. A lang chhuak tho dawn a, a ni telin, inthupte chunga an vengte demna a zual tial tial bawk ang. I inpuan har zawh poh leh miin an demna che a nasa ang. Inthup hi mi mawl, inpuang hi mi fing leh changkang tihna. 

5. Hri kai hi tuman an dem ngawt lo. Loh theih loha chhuahvahna lama kai chu kan lainat vek. Ṭul lova chhuahvahna lama hri thehdarhtu erawh chu kan dem nasa tial tial dawn. Hming thup hun a liam ṭan. Pawn lamah an kalh hnan cheu ang a, in chhungkaw hming puangin an aukhum thei reng che. Wuhan video kha hre reng rawh.

6. Test man hi a to lo. Zu man leh zûk leh hmuam man nei reng theite hian test man hi to ti tur kan ni lo.

7. Hmai tuam hi ‘dawihzep leh fimkhur lutuk’ entirna a ni lo. Mahni invenna ngawt pawh a ni lo. Hre lova i lo vei palh a nih pawhin mi dang i kaihhnawih lohna tura i venpuina a ni zawk. Puipunna hmuna hri tidarhtua an puh mi pahnih zinga pakhat ni ta la, hmai tuam lo zawk i nih chuan a hming chhe zawk i ni ang. 

8. Chhuahvahna hmuna hmai tuam hi Kristian ṭha, mi changkang, lehkhathiam, ram hmangaihtu leh khua leh tui ṭha tih entirna a ni. 

9. Mi tam tak an tlûk laia dama Pathianin min siam hi lawm ringawt tur kan ni lo. Nunna tiderthawngtu ni lova nunna humhimtu ni tura mawhphurhna neiin keini hi Pathianin min hum a ni. Kan mawhphurhna hlen awlsam tak hlen tur hian i ṭang sauh sauh zel ang u. 

10. AIDS leh Cancer avangin khawvelah Mizoram kan mualpho mek a. Mi zingah kan zak ṭhin. Hawh u, he hripui leng hi kan lo hmingchhiat tawhna hnehna remchangah i hmang hlauh ang u. Thil dangah khawvel hriat hlawh ve phâk lo mah ila, “Pandemic Hnehtu

Hnam” tia khawvel history-in a chhinchhiah theih kan ni a sin. Mizoram lo hmingchhiat tawhna chhilh theitu chu tuna Mizorama damte hi kan ni a sin. Kristian, ṭawng khat hmang, hnam inlungrual, tlawmngaihna neitu kan nihna hi tun atan hian a ni dawn lo'm ni Kan hah ang, kan chau ang, mualphona lai pawh kan nei ang. Mahse, hneh tuma kan inthurual phawt chuan Pathian zarah kan hneh ngei ang.