Pu Sawta puhna finfiah a ngai

Kan hriat angin, Congress party sawrkar laia parliamentary secretary leh minister ni ṭhin Pu KS Thanga chuan Congress party aṭanga a bân thu June 9, 2023 khan party president Pu Lalsawta hnenah a thehlut a. Chu a bânna lehkhaah chuan Pu Lalsawta hnena mi tuin emaw Rs. 25,00,000 an pek, ama (KS Thanga) in ngei aṭanga laah Pu KS Thanga'n Pu Lalsawta a puh a nih kha. Kha thil kha ngaih thutak a ngai viau lo maw?

Pu KS Thanga'n a bânna lehkhaa a ziah dan chu: "...Kan sorkar laia thil thleng daih tawh a ni. I in sak lai a ni a, sum i mamawh lai a ni. Mi thilphal leh mi tam tak lo pui ṭhin ṭhian leh chhungkua anga ka neih an awm a, chu mite hnenah chuan i harsatna hi ka lo sawisak ve dawn che em ni ka ti a, i remtihna thlapin ka sawisak che a ni. Pawisa pawh hi ka hnenah an rawn dah a, Luangmuala ka in aṭangin sorkar motor-in i PSO leh driver rawn hruaiin, nangmah ngeiin i rawn la thlap a, i hawn ta a ni. I inah pawisa kha i hriat lohin tu mahin an lo dah lo. A hnuah ngaih ṭhat lohna i nei ta nge, hlauh i nei ta nge kei chuan ka hre lo va, i pe kir leh niin i sawi a..." tih a ni.

Pu KS Thanga'n Pu Lalsawta a puhna kha a dik leh dik loh mipui nawlpui tan hriat theih a ni lo a, hretu mi tlem te chauh an awmin a rinawm. Hetianga inpuhna lian tak a awm takah chuan a dik leh dik loh hriat a chakawm a; an puha hi Mizoram hruai tum, Chief Minister nih tum a nih bawk avangin mipui hian thu dik hriat kan phu ve bawk a ni lo'm ni?

Pu KS Thanga'n Pu Lalsawta a puhna hi thu dik lo a nih chuan Pu Sawta hian "Ka la lo" tih emaw sawi ringawt lo leh pha mar ringawt loin, amah a dikzia finfiah nan inpuh hmingchhiat thubuai, defamation case a file ngei turah ka ngai a. Chutianga a ti (ngam) lo a nih chuan Pu KS Thanga sawi hi a dikah ka ngai ang.

Pu Lalsawta hian dikna a duh tak tak a, dikna a lan chhuah a duh takzet a nih chuan, amah hi dan rorelna ngaina tur chi, law graduate a lo ni bawk nen, a tih ngei turah ka ngai a ni. "A la" tih leh "Ka la lo" tih vel ringawt hi chu politics-a inpuhna leh insawithiamna mai a ni thei a; dik zawk leh dik lo zawk a hriat miah loh tlat. Chuvangin, Mizoram CM nih tum Pu Lalsawta hian ṭawngkaa sawi loin, a dikzia emaw, Pu KS Thanga sawi a dik lohzia (a dik lo a nih chuan) a finfiah a ngai a ni.

- Kezo