MNF leh Congress buaina ve thung

ZPM in candidate an puan aṭangin Social Media chu ZPM-in a luah khat a, inhnialna a sosangin a ZPM aiin MNF leh Congress an phur a, ZPM Candidate tur chu MNF leh Congress-in set-sak an tum ti ila kan sawi sual tam pui lo ang. ZPM chu bial inchuh avangin chhim lama bial pahnih Lunglei West leh Lawngtlai East ah an chiar nawk nawk a, MNF leh Congress lam hi a rukin an inngur ve chhar chhar a, chu lam chu i han ziak dawn teh ang.

MNF buaina lian ber pakhat chu Ṭawi Bial Candidate inchuhna a ni a, VL Kroshnehzova hian a senior Lalrinenga Sailo chan tura an sawi hi a chuhpui tlat. Hetihlai hian Pu VL Kroshnehzova hi Saitual pa a nih bakah a nu hi Keifang lam niin; khaw lian pahnihah vua leh vang a ngah a, chu bakah Saitual District Demand Committee hotupa a nih avangin Saitualah hian a lian tlat a, Aizawl Mayor bial tur a chuh rap rap hi a kaikuang kan chhui chho dawn a ni.

Aizawl West I bialtu Pu Zothantluanga (Pu Valtea) hi duhkhawp lohna a awm avangin thlak tumna a awm a, a aiawh tur hi tu nge an dah dawn hriat phak a la ni lo. Pu Robert Romawia Royte chu an veng Chhinga Veng ah ber an duh lova (Kohhran lam thil kha chu sawi chhuak lo law law ta ila) tlanchhiat a tum hi chu Nomination Committee siam hmaa Hachhek Biala a lo chet danah khan a lang chiang a, Pu RRR hi duh duhnaa ding thei khawpin MNF-ah hian a thu tawh a, MNF senior bial pawh chang ve lo ha cháng ṭhial ve bap bap an awm.

MNF lamah Chalfilhah hian din tum mi pathum an awm a, MNF MLA Pu Lalrinliana Sailo hi a chhuak dawn tih a chian avangin an inchuh boruak pawh a sang tawh a, Pu Mafaka Hmar, Dr C Lalsangzuala leh Pu J Lalchhanhima hi an sawi lan an nih laiin, Chalfilh Bial hi CM Bial pahnihna turin an hual tih a awm a, Chalfilh Block MNF ten Pu Lalruatkima an sawm tih pawh thu chiang a ni tih sawi ngam a ni.

Pu R Lalzirliana hi MNF hian chawlh hlentir an tum tih a lo chhuak leh bawk a, 2018 inthlana an chak chhan boruak siamtu hi a thinlung a MNF tak tak lo nen, Ṭawi Bial chhuahsan thu a puan aṭangin dinna tur a vàn ta ruai a ni. Pu Zira hi Aizawl North I ah ding tura ngaih niin Durtlanga a bazar zak zak hman laiin, Aizawl East II ah a ṭhianpa Pu RRR-a chhuahsanah ding tura tih a ni leh a. Pi Lalawmpuii zawk East II ah a ding dawn tih chu thu thar ber a ni a, a tak tak kan la hmu chiang phak lo thung a ni.

MNF buaina chu Pu Zoramthanga dinna tur a ni a, Aizawl East I hi chu chhuahsan ngam a ni lo va, CM ber a tlanchhiat chuan an tla dawn tih signal a ni. CM hi East I ah hian a tling tawh dawn si lo va, a tlin theihna tur bial pahnihna an zawng a, East I leh East II din kawptir tumna a awm hman a, Rinliana Sailo chhuahsan tur Chalfilh Bial an sawi a, ṭhenkhat chuan Mamit bial pawh an sawi a, MNF President hi East I ah chiah an dah chuan a tlin loh ngei a rinawm tawh a, a ṭhatna bera ngaih Zemabawka Local Council ah CM duh lohna avangin MNF zawng paih an ni tawh a, Sihphirah ZPM an ṭhat si avangin CM hi a buai hle tawh a, SASCI leh SEDP a thawk na lo; East I chhungah.

Pu Zorama last term a nih tawh avangin Leadership inchuhna hi a kal na tawh hle a, MNF chhunga MZP Background nei zawng hi an inhlawmkhawm a, chaw an eikhawm zauh zauh a, chu chu Pu Rinenga Sailo aia VL Kroshnehzova rawn inlar nawlh ngam chhan a ni, an ti. Dr R Lalthangliana tan MNF President chance a bo ta a, Pu Tlanghmingthanga an dah ṭhat tawh bawk avangin Pu Zorama chawlh hnuah Pu Vanlalzawma vawrh chhuah hmanga Dr Thangtea hnawl zet a, MZP background nei leh an sangawi zawnpui Leadership siam an tum tih a ni. Pu Zorama aṭanga duhsaka dawnga invawrh tum leh dang chu Pu RRR leh amah zuitu Er H Lalzirliana, Dr K Pachhunga, Lawmawma Tochhawng, H Lalbiakzauva te lam hi an ni tih a ni a, Pu Zorama, Pu Tawnpuia leh Pu Lalchamliana din theih last chance hi MNF tan a pawimawh dan chu kan hrethiam thei ang.

Heti hian kan la sawi lan loh chu Pu Zorama vengtu Pu Lalthlengliana leh Pu K Vanlalauva te pawh an lo upa ve ṭan tawh a, MNF ṭhangthar MZP rim namte hian a remchang hmasa bera paih an tum ruk tho a ni a, vangvat kai hi kum 70 an chuang deuh nual tawh tih hre rengin MNF thar ṭha zawk din tumna boruak a inmung reng a, chhim lam MLA zawng hi thu lo taka dah leh rah beh tawk an niin chhim lam MNF thu leh hla hian. Aizawla Hnam Run hi a lut phak lo tih chu an kal danah hian a lang chiang tawh a ni.

Pu RRR tál vel hi MNF Senior lamin an lo thlir reng a, an helh em em laiin President a duh hun huna be ngam ber a nih avangin a tlatlum tlat a, chumi avang chuan a chhungah inngeih lohna a awm thu chu Pu Rinliana USA kal interview ah khan a chiang a ni. Pu Rinliana'n Pu Tawnluia eiruah a puh (A Department chhungah nuai 100 ziah bo thu a sawi baka inpuhna a awm thei lo) chung pawhin Pu Tawnluia chu Tuichang bialah vote a hmuh tlem phah hlauin MNF chuan an hotupa Pu Tawnluia eirua puhtu MLA ve tho chu an haider a, Pu Rinliana hian 2018 style chiah khan inthlan dawnah MNF hi chhuahsanin MNF hi tla chhunzawm theiah an awm a, Pu Rinliana interview ngaihthlak kha chuan MNF-in discipline an lekkawh ngam lo hi chu nakina an buaina tur a nih hmel a ni.

Congress buaina chu Pu Zodintluanga bang khan a rawn tichiang tawh a, mahni party dan pawh ngai pawimawh lova mahni ngaihdana kal, Pu Lalsawta a President avangin Pu Mama a bang hlawl a, Pu Lalthanhawla chawlh hnua Congress hmel (Face) bera mipui leh ṭhangtharin an ngaih pa chuan Congress Bhawan ah thuneihna a lo nei lo va, Pu Sawta duhsak zawngten ro an rel tih hriain a bang hlawl tawh. Pu KS Thanga banna lehkha chhiar hnu phei kha chuan pawna ZPM chhungkaw buai an sawi let tam takin Congress an lo buai reng a, a puak chhuak ta a ni. Pu Lalthanzara hian Congress hi a la phuarkhawm a, Pu Thanzara hi chhuak ve se a keh chhe dawn a, Pu Sawta aia Congress a senior zawk Pu Thanzara chu Pu Sawta bula ngawi renga lo ṭhu phak tawkin an dah a, Pu Hawla zunzam tel lo Congress ṭha zawk din tumin anmahni siam liantu Pu Hawla leh a kaihhnawih hrim hrim kha, ṭha lo tiin Ṭhat loh theih lohna Bawm an siamah chuan Pu Hawla hunlaia Congress Politician hausa tak tak chu an inkhungkhawm mek a ni.

Inthlan kum politics inlumlet hi a ngaihnawm (Interesting) ṭhin avang hian thiam leh thiam lovin kan han ziak bawp bawp a, tu'n lung lovah la lo se, Politics hi chu titi nen thil kal kawp tlat a ni.

- Lalmuanpuia