I nunna turin tlan chhuak rawh

MNF MLA tan chuan Aizawl tlan chhuahsan hmasa nih hi thil finthlak a ni. Aizawl hian MNF thlan nawn an tum tawh lo tih chu titi khawchangin a nemnghet chho mek a, taxi driver zawng zawngin Ruling Party chu mipuiin an nin thu an sawi chinah hi chuan Ruling Party MLA nih chuan tlan chhuahsan hi thil finthlak a ni.

Congress hun lai kha hmanni lawk niin; Aizawl bialah khan Pu Lal Thanzara, Pu R Romawia, Pu KS Thanga, Pu H. Liansailova, Pu Lalsawta, Pu Lalrinawma, Pu R. Vanlalvena, Pu Lt. Col. Zosangzuala te an tling a. Pa ṭha tak tak, pa fel leh pa fing, thiamna lamah bakah khawtlang leh kohhran lamah pawh mi zahawm rual an ni a, tunah erawh zawng tu mah hi an tling tawh lo. Mipui kha Congress an ni fai ta duak emaw kan tiin, Congress kha an tling nasa a, mahse mipui khan an hawi lam an thlak hnu chuan Congress mi leh sate kha la awm reng mah se, tu mah an vote tling zo tawh lo a, Aizawl chu Congress MLA neih lohna a ni ta dèr a ni.

Hei chiah hi MNF tan pawh darthlalang a ni a, MNF tan chuan, "Ka la ṭha tawk a lawm, kan party ruhrel a lian," tih hi inhnemna a tling lo a, Party ruhrel lian chung hian an lo tla fo tawh a, MNF MLA tan chuan Aizawl khawpui chhung ni lovah hian tlin theihna a awm tho chuan chhuah nal nal hi thil finthlak a ni. He thu hi sawi mah ila Aizawla tling tur hi chu mipui duhzawng mi nih a ngai a, Party Party chuan tu mah an tling zo lo va, mipui duh rawn zel an tling a, Party mi ni lote vote hi a pawimawh si a. Chuvangin, MNF tan chuan Aizawl pawnah boruak a awm zawkin a rinawm a, a hunin a zir loh chuan Chief Minister pawh ni se, Aizawla tlin hi huphurhawm tak chu a ni a, tlan chhuahna awm se chu I nunna turin tlan chhuak rawh tih a ni.

- David Lalremruata