Zui an rui e...!
Pep Guardiola enkawl Manchester City chuan Premier League, Champions League leh FA Cup te an chawi kim vek a, season khat chhunga nomawi chawi theih hluzual pathum an la vek tihna a ni – English club zingah chuan Sir Alex Ferguson enkawl Manchester United hnua hetiang ti leh thei hmasa ber an ni hial.
Man City hian an champion hi nasa takin an làwm – England ramah mai lo, Spain rama nuam tawlna hmun pakhat Ibiza-ah champion lawmna hun an nei a, hei mai hi an la duh tawk lo – Manchester khawpuiah kawng an zawh a, kawtthler khat tlatin mipuiin an pasalṭhate hi an lo lawm a, hlimna vawrtawp an chèn a ni ber mai.
Mizoram aṭang pawhin Man City-ina champion an lawm dan hi kan lo hmu ve. Jack Grealish chu a rui hle tih pawh kan hmu a, a khelhpui Julian Alavarez chuan, "In theih zawng zawng a in," tiin a sawi hial – English forward hi an kalna lam apiangah a rui em em a, an boruak siamtu ber pawh a ni.
Grealish leh a ṭhian ṭhenkhatte an rui em em a, hetih lai hian player ṭhenkhat erawh zu in ve lem lo, rui buai miah lo leh an nungchang thlak danglam ve lem lo an awm bawk a, mihring kan thuhnmun fo thei lo – an insawisel zui chiam chiam lo bawk.
Kar tawp lam a la ni a, champion an lawm aṭangin ni thum pawh a la ral hman lo. Manchester City tana nasa taka champion lawmtu player-te kha England tan inkhel tura koh an ni a, smart takin an ram tan training an nei chhunzawm leh nghal mai.
Nasa taka zu an ruih avang khan misual lutuk anga sawi zui an hlawh lem lo a, ar pán chuk tui lo khawpa chhuah pawh an ni hlei lo – an hlimna leh lawmna kha an lawmpui a, a hunlai a ni bawk nen hlim taka an awm kha hmuhnawm ti takin an chipuiten an lo en mai a ni.
Sap kan ngaisang a, an nunzia tam tak kan la. Mizote pawhin zu kan kalsan thei lo – kan pi leh pute aṭanga kan chhawm tlat a ni a, a bik takin hlimna leh lawmna kan chanin zu nen kan chawhpawlh ve nasa hle.
A hunlai leh a hun bikah chuan zu rui chunga thil tih a nawmna a awm a ni chek ang chu, a nuam an ti thei em mai. Mahse, a tih tur pawimawh leh ṭul an thlah phah lo a, an nun ti chhe vek khawpin an atchilh lem lo – hna thawh a hun a, harh a hunah chuan fim takin an nung leh thei mai, hei hi kan entawn tel a ngai.
Intihlim turin Aizawl dai velah ka kal ve fo a, ṭhalai kalkhawm zawng zawng chu ni lo mah se, ka hmuh tam zawk hi chuan zu an in ṭhin, zu ruih avanga buaina siam tum leh rui â kan tih ang kha hmuh tur an awm ta meuh lo, ka hmu ngai lo ti ila a sual lo zawk hial ang.
Zu hi khap beh tum mah ila a awm reng dawn a, kan khap nasat poh leh a hluzual dawn tihna a ni mai. Chuvangin, a in mite hian a in dan kan thiam a, kan taksa leh hnain a tawrh phah loh tura kan in thiam ve a pawimawh hle.
Duhthusamah chuan 'In Loh' a ṭha ber. An zawrhna hmunpuiah pawh zu in lo an awm ve tho, chutiang mite ang chu nih kan tum ber tur a ni ang. Zu khapna hi thu leh police hmang ni loin, thinlunga duhthlanna dik siam thei tura hma kan lak a pawimawhin a hun takzet ta.
- Lalthansanga, Saitual