ZORAM PAVALAITE LEH HAW LE, IH E...

Hrî avânga kan boruak rip leh up tak kârah Bungzung Pavalaiten nikum, 2019-a an music video tih chhuah daih tawh, ‘Zoram Pavalaite’ chuan mak tak maiin min chiah ta miah miah mai a. Social media-ah an lang châmchî mai tih chu mi tinin kan zaipui rût rût dânah kan hre vek ang.

‘Lalpa'n min ko ta, Zoram pavalaite’ ti pahin vawk chaw kan pe a; nu leh nulate'n ei rawng kan bawlpui rût rût a; kan inthiarpui rualin kan inbualpui bawk a. Zokhaw lamah kan fehpui a, chaw ei kham kut sil rualin kan sakpui âwl chuang lo. Dik tak chuan he hla hian min fan vek a ni. Hei hian kan hriat loh laia social media-in mi tin tih theih deuh thaw min fan hneh tawhzia a hril chiang viau âwm e. 

Kan social media 

ṭhang chak lutuk hian, mi tin zah rawn kan Kohhran - thianghlim leh fiamthu thawh nân pawha kan hman ngam loh… mai ni loa uanthuan nana mitthlà pawh kan mitthlà ngai loh, bâwl phâka kan ngaih miah loh piah lama kan serh hung chhûng a rawn luh chilh ta mai hi - Kohhran mite hian en liama nuihpui piah lamah, mite fiamthu thawhna video clip theh darhtuah kan ṭang leh zêl duh ta ang maw?

Hmân ni lawkah kan gospel singer lâr berte zînga mi, chumi piah lama kan revival speaker ni bawk, khawvêl lam hla a sak lai pawha Mizo ṭhalai zawng zawng tih theih deuhthaw kawr sen min hâktîr vek thei khawpa mi ‘influencial’ Vanlalsailova fakna hla ṭha tak pakhat, ‘Thinlung A Thlír Zawk Ṭhin E’ tih chu, tute'n emaw an lo fiamthùpui chiam mai a. Amah ngei pawh a lâwm lo nasa a nih kha. Pathian mite hmaa sak leh pawh a tih phûr tawh loh thu leh mite pawn fiamthua an lo bengkhawn tawh tlat tûr thu a sawi chhuak hial a. Pawi hi ka va’n tihpui tak!

Sailova hian he a hlaah hian sermon ropui, darkâr tam fe daih a phûm ṭên ṭûn a; a hla chang khat mai pawh ni lo, a tlar tin mai hian thu tam a pai a. Victor-a @ Victor dA Sacavenger-in a kawmnaa a sak laia a rilru put dân a sawinaah phei chuan, Sailova hian, ‘Piangsual leh induh khawp lo ka phuah chhan ber,’ a ti hial a. Mit kalh palh, ha kuh palhte thlengin a lo huap vek a ni. Chu chu kan lo fiamthupui ta a; kan thil thiam thar social media lamah kan uanpui a; a phuahtu leh a copyright neitu phalna nei hauh loin kan lo ti-viral ta a. A hla phuahtu leh a satu ngei pawhin mipui hmaa sak tîm khawpin kan sawisak-sak ta chiam mai a… He hla petu leh neitu, Pathian duh dân a ni chiah ang em le?

He kan Zoram Pavalaite case pawh hi chuti tho bawk chu a ni. Tlang deuhin sawi ila, Zopa dik tak (typical Zopa) ten, thinlung leh tihtakzeta lâm darh darh chunga ‘Lalpa'n min ko ta, Zoram Pavalaite’ tih music video kan lo sawisa leh a. Mi tam tak zawhna chu ‘He hla hi engtia rawn lâr hluai nge ni a?’ tih a ni. A lâr chhan bera pawh hre loten, he video, miten an sawisakna kan hmuh ang ang, a tilârtuah kan ṭang tih pawh dâwn eih lo a, dawng leh nei hmasatu nih châkna 'rauin min tur avânga kan theh darh chiam vâng mai niin ka hria - hetia a lâr hluaina chhan ber hi.

Ka sawi duh tak zâwka chu hei hi a ni - Fiamthu kan duh. A duh berte zîng mi pawh ka ni. Hri léng kâra fiamthu min hlui ṭhintute an hlu zual. Mahse, Pathian din, a Kohhran leh ami hmante nêk dân chin tâwk erawh hriat a ṭha hle. Engtin nge Bungzung Presbyterian Kohhran Pavalai Zaipâwlte hian Pathian mite hmaah, ‘Lalpan Min Ko Ta…’ tia an zai leh ngam ang! An mitthlà tûr chu a kotu Pathian lam ni tawh loin, Neymar-a te, khawi lai ‘Kore’-nula emaw te, Lammuala làm thaia insír sàwn emaw hote leh khawi lai lai video eng eng emaw te a ni daih tawh mai dâwn a. Pathianin a lo hman ṭhin he hla hmanga Thlarau pâwlna dawn thar chu a har duh tawh khawp ang le!

Chutiang zêlin kan thuhriltute thusawi pawh … Sailova sawi ang chiah khan, a nuihzatthlâk lai lai la chhuaka, lo compile a, fiamthù nâna lo hmanpuia hi sermon petu Pathian hi a lâwm ang em le?

‘A ho e… sâpho leh hnam changkângho khu a lâwm a chîng nasa ber ber ni. Fiam a dàwl lohthlâk êm mai a!’ kan tih chhûnga kan infiam piah lama kan inbàwl phawnna hi a vanram rim nam lo zâwng a nih si chuan, a Neitu Pathian a lâwm dâwn chuang lo! Tin, sâp kan ni ve lo bawk! ‘A ho mai mai,’ kan ti rei mah mah em ‘Mizo ṭheuh ṭheuh,’ kan intih chhûnga kan inhriatthiam tawn zêlna hian jail bang min zûttîr lo mai mai zâwk a ni lo maw tihte pawh hi, Facebook leh Instagram lama account hawng pha thei chin chuan hriat ve a ṭha a, ngaihtuahna fîm tak hmang chunga inngaihtuah harh a hun tawh mang e. Kan smart phone kan smart-pui leh si lohna lamah hian, jail-a tlawhkan ngaiin kan awm lel thei a nia!

‘Lalpa’n min ko ta, Zoram Pavalaite…’ tih sawisatu te leh an music video lo her kawitute hian, he hla petu Pathian an ráwn ka ring lo khawp mai, kei chuan.