Ruihhlo: Engtin nge kan tih rèm theih ang?

2nd Assam Rifles sipaite leh Mizoram Police-a CID (Crime) hnuaia Special Narcotics Police Station mite chuan Nilaini khan mi pahnih hnen aṭangin Zemabawk dáiah heroin kg. 1.026 an man a, Rs 5,13,00,000 hû a ni. Central YMA-in ruihhlo do tura September 9, 2022 aṭanga Central Anti Drug Squad (CADS) a din thar leh hnuah April 16, 2023 thleng khan cheng nuai 3,547.24 man hû ruihhlo an man tawh a, chumi kaihhnawihah chuan mi 1,561 an man tawh bawk.

Kan rama ruihhloin heti taka bu a khuar zel mai han hmuh hi chuan thinlung a na takzet a, a ngaihven lutuk lem lo tan phei chuan, "Heti zozai ruihhlo hi engtin nge kan ramah a chèt vel reng theih zawk le?" tih mai awl a ni a, heti zat an man a nih chuan, man loha bo hi eng zat nge awm ang? tih pawh hi inzawh fe tham a ni.

Aizawl khawpui thlir ila, zan rei tak tak thlenga ruihhlo ngai tih hriat ngawih ngawih, ṭhalai la naupang tak tak khawlaia veivak hmuh tur an awm reng bawk a, he hnam hi eng ngati nge, heti taka ruihhlo bawiha kan tan tak mai le, tia zawhna inpek a awl khawp. Ṭhalai, ruihhloin tibuai lo se, nu leh pa, chhungkaw tana ṭangkai tak tur hi an ruih thlèk mai mai si chuan, kan hnam hi engtin nge a kal zel ang? Mangan a hun a nih chuan, tun hi mangan hun a ni tawh.

Nu leh pate pawhin ngaihtuahna thar seng a, kan fate nunphung kan chik a ṭul – kan hriat loh lai, khawtlang, kohhran leh hnathawhnaa kan hun tam zawk kan hman lai hian, kan inchhungkhur chu ruihhloin a lo luhchilh reng si em? Kan rawngbawlna tura bawl loin ramthim kan lo hai reng em? Ngaihtuahna sen a ṭul takzet. Nu leh pa tam tak chuan kan fate hi mi fate anga sual turin kan ngai phal lo a, ruihhlo ti ve turah kan dah lo – mahse, kan hriat loh lai hian thui tak an lo dai a, kan hriatchhuah meuh chuan a tlai tawh ṭhin. Tun hi mahni inchhungkhur inenfiah hun lai tak a ni.

Ṭhalaite pawhin ngaihtuahna thar kan sen a ṭul. Ruihhlo kan tih chhin hian kumkhaw chawr no lohnaah min hruai lut thei a, rei lotê nawmna hian kan hma hun zawng zawng a tichhe thei tih i theihnghilh lo ang u. Vawiina kan nawmna hi naktuka kan khawvel tichhe theitu a ni.

Kohhran tin pawh hian tun aia nasa zawka ruihhloin kan ṭhalaite a run dan hi kan ngaihtuah a ṭul tawh a, ralkhèl dar kan vuak a hun tawh a ni lo maw? Ṭhalai tam tak Pathian fak leh chak taka an kal nia a lan lai hian, anni aia tam zawk chu khawlaiah, ruihhlo hruai âta awmin an tal buai mek. Ngaihtuahna thar kan sen a va hun êm!

Sorkar pawhin ngaihtuahna thar seng se a duhawm ngawt mai. Lal loh hlaua sum sem leh dawt thu intiam ngawt karah hian kan hnam hi a boral mek tih kan hmu thiam em aw? Heti taka kan ram min runtu ruihhlo um bo tur hian kan hmalakna ngai pet pet piah lamah hian, tihdan thar kan ngaihtuah a ṭul a ni mai lo maw?

Political party tin pawhin hei hi kan ngaihtuah a ṭul – kuminah inthlan kan hamchhawn dawn a, sorkarna chang ta ila, ruihhlo um bo tura hmachhawp kan nei em? Nu leh pa tam tak ruihhloin an fate a tihbuai avanga rum mekte tana beiseina siamsak theitu kan party hmachhawp zingah a tel em? Chutiang chu kan party hmachhawpah a lo tel lo a nih chuan, ram hi kan vei tak tak tawk lo a ni mai lo maw?

Ngaihtuah ngai tam tak a awm – a tawp berah chuan he hnam hi a boral lo a, a dinchhuah kan duh takzet a nih chuan kan zavaia kan ṭan rual a, he hnam tiretheitu ruihhlo um bo tura ke kan pen a ṭul a ni. Hawh u, tunah i thawk ang u.

- John Zothansanga