Huaisen nge Campaigner?

Kum 2006 ah khan Vaivakawn khelmualah Revival Centenary Lawmna programme hman a ni a, a buatsaihtu Mizoram Synod anih miau avangin mipui kan tam lo thei lo va. Ni 04.04.06 ah chuan Synod Moderator Rev, Chanchinmawia’n ( L ) Pathian thuchah khal tak mai a sawi a, amah kha a ṭang bawk a, tun hnu lama Social media-a han thlir leh pawh hian a ṭhahnemngaihna kha a lo ropui thlawt a ni, tawtawrawt ang main a au tuarh tuarh a ni ber. A sermon thupui chu kan hriat tlan vek a ni a, ram chhiatnaa mawhphurtute khak leh kamkhat a ni ber. Mipui lamah pawh a thawk na a, sawi zui pawh a hlawh viau; Mipui hmaah, "Pastor ka ni a, Sawrkar office ah ka leng ngai lo," a tih te kha ngaihtuah a tithui khawp mai. Chu mai ni lovin, “Tuna kan Politics hian kan thlarau nun a do a ni,” tih thu a sawite kha a huaisenthlak hle. Khami ṭuma Rev Chanchinmawia (L) thusawi kha tun anga Social media chakte chu hmang tawh ila kan comment pui hem hem ngawt ang. Puithiam huaisen tak chu mak danglam tak leh mipui rilru khawih zetin mual min liamsan ta a ni.

Ṭhi beh pha lo - heng Revival Speaker te hian, Politics chungchang chu an phak tawk leh hmuh dan tawk te tein Pulpit aṭangin an tlangaupui ve a. Anniho thusawi hi chu a nghawng (impact) a na vak lo va, arsa buhchiar hmehpuia lawm tawk kha an ni a, eng ang pawhin au ṭhin mah se, nemngheh (ordained) rawngbawltute thusawi ang ema umzui a hlawh lo. Mi hlim kan tih leh zawlnei chi hrang hrangte pawhin Politics chungchang an sawi ve nasa a, chumi khami a lo thleng dawn tiin daitheu turin min au khum a. Pathianin min hriattir an ti thei zel bawk a, tak tak a nih chuan Pathian inpuanna chu a sai sa khawp ang. Tuna kan CM lu chungah meuh kut nghatin mi hlim pakhat chu a ṭawngṭai a, CM a la nih zel tur thu a dawng a ni. Chutianga Pathian hriattirna puan a nih laiin mi dangin Pathian hriattir tiin CM thar kan hmuh tur thu an lo puang ve bawk a, Pathian zahawmna hi kan zawlnei inti leh mi hlim intite hian an man pha lo a ni. Evangelist te, zawlnei chhuak thar te, mihlim vak velten Politics bawlhhlawhna an au chhuahpui hi chu barah kan khawn lo. Mahse, Ordained rawngbawltu chinte thusawi hi chu kan ngai thutak deuh a, mipuiah thu tuh chin a awm ve a ni.

Ni 08.05.23 Pathianni chawhnu inkhawmah Rev. Chuauthuama chuan ‘tunlai thil awmzia’ tih thupuia hmangin thuchah a sawi a, a sawina hmun hi Kolasib ah niin KTP General Coference programme kal zelah a ni. Ṭhalai sing bi chin hmaa sawi a ni bawk a, social media hrang hrangah a lang nghal chuai chuai a nih kha, ram hruaitute pawh a dim vak lo. Pastor meuhin khatia ram hruaitute a bei ta mai kha mipui ngaihdan hriat chakin media lam an vir sawk sawk a nih kha. Ngaihdan hrang hrang a thlur nghal sung a, ṭhenkhatin a huaisen mang e an tih laiin ṭhenkhat ve thung chuan, Pastor sawi atan chuan a mawi lo lam hret a ni tihte a ri nuaih mai. Kohhran chanchin kan bih chuan siam ṭhat hna thawk puithiam tam tak an awm a ni, Kohhran siam ṭhat leh Politics siam ṭhat lamah sulhnu hrawl pui pui nei an awm nawk mai. Kan sawifo angin Kohhran hruatute hian ram inrelbawlna Politics hi indirect taka thunun dan an dap niin a hriat, Pastor Chuauṭhuama thusawi 'titia distinction' tih ṭawngkamte kha thudik a nih rualin Politician te siam ṭhatna atan a tling zo em? nge ram hruaitu mipui nuihzatbura chhuahna mai mai zawk. Puithiam pension ten Political Party ṭhenkhat an khak hian mipui lam chuan Party awn lam neiah kan ngai fo. Hindu Nationalist Politician Baba Ramdev-a organistion-in kum 2014 vela Modi atan an campaign ang lek kha a ni palh ang tih a hlauhawm hlel lo ve, berampu campaigner hmuha hmute pawh awm theih a ni. Kan Puithiamte hi an fimkhur a va ṭul em! Kohhranho thlarau nun chawm turin taimak chhuah se a tawk viau mai.

Ni 10 – 12 February 2023 ah khan Hnahthialah Mizoram Baptist Mipa Pawl Inkhawmpui a awm a, Rev. R. Lalbiakliana chuan, 'Ram leh hnam tan min tiharh rawh' tih thupui hmangin thuchah a sawi a. "Kohhranin sum kan hman dan ang hian sawrkar hian hmang se la, kan ram chu khitah kan awm ang," tih thu ṭawngkam khatin a sawi a, chu mai ni lovin, “Baptist Church of Mizoram hi term khat ram min enkawltir ula, kan siam ṭha ang," a tihte kha a ropui khawp mai. Kan ram chhiatzia tiin Nehemia anga tungding leh turin chet chhuah a ṭul tih thu sawi a ni ṭhin, heti tak maia ram hruaitute duhkhawp lohna a rik lai hian roreltute chu Pathian min pek tiin kan sawi leh si a, chu mai ni lovin roreltute thu thuin awm rawh u, kan inti leh bawk a. Pastor-ho zingah ram leh hnam vei tak tak an awm lai hian, Pastor nihna hmatheha sawrkara tlaktlum tum an awm tih thawmte pawh a ri ve fo mai. Dawhsan (Platform) aṭang hian huaisen tak leh thu khal tak sawiin au au ṭhin mah se, hruaitu ṭha kan neih hma loh chuan eng kan ang lo vang. Napolean-a khan, “Sakeibaknei za awmin an hruaituah ui awm se la, indonaah ui angin an thi ang. Ui za awm se la, an hruaitu sakeibaknei a nih chuan indonaah sakeibaknei angin an thi ang,”. Ram leh hnam tan hi chuan kan harh reng, mahse kan thawhchhuahpui lo mai zawk a ni.

Salvation Army (Chhandamna Sipai Pawl) a hruaitu Dr. Major. J. Thanruma thusawi kha kan la hre ṭheuh ang. MNF Official Programme ah Mizo National Revival tih thupui hmangin thuchah a sawi a, hemi ṭum hian a thusawi darhzau em em a awm a, “Kohhran hruaitute leh Politician te hian ram kan tichhia a ni,” tih hi a ni. A thusawi hi mipui lam chuan kan ei tlang hle a, a dem zawnga comment pe zui pawh a awm lo. Chutih laiin, a rawngbawlpui Kohhran hruaitu ṭhenkhat chuan an helh ang reng hle. Inthlan kum a nih miau avangin ram vei thar thut mi tam tak an awm a, ram chhiatna hi mipui chunglam aṭanga bul ṭan niin mipuiah hlet a chhuah chauh a ni. Mizo mipui hi kaihhruai nuam tak kan ni a, roreltute lakah han lungawi lo ṭhin mah ila, ban phartu an awm chuan kan inrem leh mai ṭhin. Heti khawpa hnam enkawl nuam kan nih lai hian ram rethei leh pachhe takah kan la awm cheu, eng vang nge? a chhanna chu Dr.Major.J. Thanruma thusawi ang hian tisa lam hruaitute leh thlarau lama hruaitute khawsak dan dik loh vang a ni ngei ang.

Kan sawifo angin inthlan kum hi chuan berampu aṭanga beram bo thleng hian politics-a party thu kal lam haw lam ngaichangin kan awm a, kumin kum chanve chhung lek pawh hian induhkhawp lohna leh inchirhthehna thu leng vak a tam tawh hle a. Kum 2022 ah voters 833426 awma ngaih kan ni a, ni 09.11.23 ah khan Draft E Roll tih chhuah leh niin voters 831272 kan nia tarlan a ni. Voters nuai 8 chuang hret bumin kan awm leh ang tih hlauvin mi ṭhahnemngaite kan au chhuak phawng phawng a, eng emawte chu a herchhuahpui mahna. Kohhran lama nemngheh rawngbawltute pawhin thu an sawi hnem tawh hle a, huaisen tak taka aute pawh an awm a ni. Mahse, Party nek nat deuh an neih hian mipuiah zawhna a siam fo, ani hi chu a MNF ru riau asin, a ZMP ru riau asin, Congress lam a awn deuh lo maw? tiin kan Judge tho tho.

Kohhran hruaituten Politician te dim lo taka an chilh sak sak lai hian, seasonal politician pakhat ka interview chuan heti hian chhanna a pe a, chu chu “Keini politician te hian kan sakhaw hruaituten khawvel thil an duhzia te, Minister office a rawn kal fo te, an nihna hmatheha an duhsak zawngte hna a thun tura min nawr dan te, an enkawl Kohhran mipuite lungawi lohnate hi Pulpit tlang aṭangin sawi ve ta ila an lawm emaw chu?” tiin. Ngaihtuah a tithui khawp mai, mahni mita khanchhuk awm si a, mi dang mita hmawlh te tak te awm ngaimawh viau si tihna a ni ber ang chu. Kohhran nge siam ṭhat ngai Politics tih hi buk dawn ta ila, a inbuk tawk fu lo maw? Chakai nufa kal inzirtir ang chauh hi kan ni ti ila a na lutuk lo ang chu maw. Ram kalphung siam ṭha turin Political Party kaltlang lovin a theih loh, Arvind Kejrewal-a pawhin ram siam ṭha tak tak tur chuan Politics-a party kalpui a ṭul tih hriain AAP din a ni ta a ni. Kohhran hruaitu; a bikin Pastor level aṭanga ram chungchang au chhuahpuitute hi an huaisen vang nge indirect Campaigner ? mi sawi chhuah ngam loh ka rawn sawi a ni ber e.

- Rosangzela, Vh (Ph : 8974138026)