KRISTIAN CHHUNGKAW INEN FIAH HUN

Thuhmahruai:

Kristian chhungkua tih hi kan hriat lar leh kan hman lar tak ṭawngkam a ni awm e. Kristianten chhungkua kan siam leh kan din hi zau deuha kan sawi chuan Kristian chhungkua a nih mai theihna a awm ang. Nimahsela, Kristian chhungkua kan tih hian chumi aia thûk zawk chu kan rilruah a awm ngei ang. Kan tun hunah pawh hian Kristianin chhungkua kan din ni vek si, Kristian chhungkua tih ngam loh khawpa chhungkaw nihna vawng nung thei si lo kan ramah hian kan tam hle a ni. Kristian chhungkuate hian inenfiah kan mamawh ta viau a ni, Kristian chhungkua tiin kan inchhal ngam chiah em le?

1. Kristian chhungkaw bulṭanna

In sak a nih dawn hian a bulṭanna (foundation) a ṭhat loh a, a ngheh loh chuan in mawi leh nalh tak sa mah se, a satute ngei pawhin ngaihngam takin an luah ngam ṭhin lo. Zirnaah pawh, a bikin science subject hrang hrangte phei chu a bulṭhut aṭanga kan man loh chuan a ler aṭanga man tum chu thil harsa leh khirhkhan tak a ni tawh ṭhin. Chutiang chiah chuan Kristian chhungkaw din tur chuan a bulṭhut, a inṭanna hi a dik a a ngheh a ngai tlat a ni.

Kan rama nupaa insiam zawng zawng zatve aia tam fe hi chu bul ṭanna dik fumfe lo aṭanga nupa leh chhungkuaa insiam kan ni ngei ang. A chhan chu kan ram leh kohhran dinhmun thlir hian chu chu a lang chiang tlat a ni. Krista tel lohna chhungkua Kristianten kan din nasa hle mai. Chhungkuaa tel ngei ngei tur tel ta lo hian chhungkaw hrang hrangte min tirum mek a nih hi. Bul ṭan dan dika bulṭan tura inzirtir leh infuih thar zel hi kan mamawh langsar tak a ni mek.

2. Kristian chhungkaw inrelbawl dan

Chhungkua kan din a, Kristian chhungkua kan din bawk a. Kristian chhungkaw tih awma mawi leh awm dan tur awm ang hi chu kan hrethiam ruak vek ang. Krista chenna chhungkuaa awm member te ah hian Krista hi a chen a, a awm a, a lal hi a ngai hle a ni. Kristian chhungkua tiin kan inchhal zel ngam dawn em?

Chhungkaw awhawm, chhungkaw ropui ve deuh nih duhna Kristian chhungkua ah a lut nasa hle mai. Chu chuan Krista ai chuan mahni ropui duhna ah min pawt kual mek a ni. Kristian chhungkua aṭanga chhuak nula tlangval, naupang thleng pawhin a niang chu, Krista thil ngaisang lo leh ngai pawimawh lo kan tam em em a ni. Nu leh pa tam tak ten kan fate hmun dangah zirna avangin kan dah a, mi an phak loh kan hlau hle. Kan fate kan biak chang hian eng nge kan sawi ṭhin le? Mama, Mami lehkhazir ṭha rawh aw...tih hi kan inhrilh leh kan infuihna lian ber a ni mai em aw ka ti. Ṭawngṭai turte, Bible chhiar ngun turte, inkhawm zel turte hian phone call pawn kan fate hi kan hrilh ngai em le? Khawvel thila hma an sawn loh kan hlauh puina tluk hian Pathian lama hma an sawn loh hi tam tak chuan kan hlauh pui lem lo. Chu kan inrelbawlna leh kan inzirtirna dik tluantling lo chuan min ei ṭan ta mek a, kan heti ta nuaih mai a nih hi. Inrelbawlna dik, inzirtirna dik hi Kristian chhungkaw tin hian kan zir thar leh a ngai tlat a ni.

3. Ram, hnam leh Kohhran ṭha ni turin Kristian chhungkaw ṭha chi kan mamawh

Kristian chhungkaw ṭha chi leh Kristian chhungkaw chhe chi kan awm theiin a lang. Kristian chhungkaw chhe chi hi kan ramah hian kan tam zawk mai thei. Chhungkua hi ram, hnam leh kohhran siamtu kan ni si a kan ṭhat hi a ngai a ni. Tun hunah hian kan tu leh fate inkhawmte, kohhrana an tel ve mai te hi duhtawk ringawt chi a ni tawh lo. Pathian thutakah an awm em, Pathian thutak hi an pawh em tih kan ngaihven a hun em em a ni. Kohhran lian pui pui, ropui khep khup kan ramah kan tam lutuk, mahse chûng a lawi, tel ve ziah te zingah chuan thutak Lal Isua pawh lo a telve mai mai ṭhalai zingah, nu leh pa zingah tam tak kan awm. Chuvang chuan kan ram leh hnam, kohhran thleng hian kan ṭawih tlat si a nih hi. Kristian chhungkaw ṭha chi, thutak Lal Isua pawh chhungkua kan va mamawh tehlul em!

Tlangkawmna:

Kristian chhungkuaa inchhal te hian Krista nun kan lanchhuah tir hlei thei lo a, hei hian inen fiah kan ngaihzia a tilang. Chhungkua min din saktu Pathian hian chhungkaw tin hi chhungkaw ṭha ber ni turin min duh vek a, chumi tur chuan kan inen fiah fo va, kan dik lohna lai kan in hriatchhuah zung zung a ṭul hle a ni. Kan tu leh fate an ṭhat hleih theih lohna te hian Kristian chhungkaw tin te inen fiah a ngaihzia a rawn ti chiang viau. Ṭha lo tur hian tumah, tu chhungkua mah Pathian hian a duang lo, keimahni tih hnawk hi a lo ni leh ṭhin a, chuvang chuan ṭhat lam pana kawng dik zawh turin inen fiah a hun a ni.

- V. Lalramthara