Beichhua ban ngam, Rinliana ban ngam lo

Pu Dr K Beichhua kha MNF chuan Minister aṭangin an ban a, chu bakah chuan MNF Primary Member aṭangin an ban ve bawk a, a dinhmun a chhe hle a ni. Dr Beichhua bantute hian USA aṭanga Deputy Chief Minister Pu Tawnluia enkawl Department hnuaia cheng nuai 100 chuang eirûkna awm tia puhtu, Speaker Pu Lalrinliana Sailo chu an ban ngam miah lo. Hemi phena hian thuruk a awm ngei chu a rinawm a ni.

Pu Dr K Beichhua kha an ban chhan kha tun thleng hian ka la hre duh lo. Social Welfare Minister leh Vety leh Excise Minister ṭha tak a niin ka lo ralkhat hmuh a, Minister dang aia a tih chhiat pawh kan hre lo. An ban chhan kha MNF party chhungkaw buaina a ni a, ban kan tih hian Minister aṭang hian banna a thehlut a, CM-in a ban dawn tho tho avangin banna a thehlut. Thil dang kan sawi kai hmain Pu Dr K Beichhua Department hnuaiah khan Minister/MLA zinga mi tu emaw, hna beisei ṭhin pek duh loh a neih avangin an inkar boruak a chhia tihte Facebook lamah chuan kan chhiar kha kan la hre reng ang a, Siasi-Chakhei kawngpui siamna Restricted Tender hmanga Kamrula pek a nih hnu khan Pu Dr K Beichhua leh MNF hotupa PWD Minister hi an in-best friend thei tawh lo tih a ni.

Pu Rinliana Sailo thusawi YouTube ah khan MNF Sorkar a bei char char a, BJP zawm a hnial loh te pawh a sawi a, Pu Tawnluia a beih dante kha tunlai ṭawng takin a personal hle a ni. MNF-in an hrem loh chhan hi Tuichawng Bialah MNF-in an tawrh phah an hlauh vang niin Pu Tawnluia Vote a kiam phah an hlauh avangin, Pu Rinliana an ban ngam lo an tih hi thudik a ni reng em? MNF hian an ngaihtuah chian loh chuan inthlan dawn hnaihah buaina a awm phah chuan siam ṭhatna khua a tlai tawh ang.

- Lalremruata